"ZONUN ZE MAWI" i dinthar leh ang u

Central YMA-in kumina ‘Zonun ze mawi’ inzirtir uar kuma a puang hi thalaite tan mai ni lo, thang leh tharten an chhawm nun zel tur a nih vangin inzirtir thar leh hi a tul tawh takzet a ni. Zonun ze mawi ti vul leh tur hian YMA Member te hi kan awm mai mai a thiang lova, chet a huna che chhuak nghal thei tura kan puan ven kan sawi chhin a hun ta.
Khawhar in riah chungchangah te, thlan laih leh khawhar chhungte kan tanpui theihna kawng hrang hrangah te leh a tul huna tlawmngaihna kan lanchhuahtirna hmun turah te hian nasa zawka Zonun ze mawi hi kan dinthar leh hi a tul tawh a. Zonun zia hi Mizo te thinlung chhungah hian a beh tlat avangin lak hran thei a ni lova, khawi hmunah pawh awm ila min suih nghet zawk a ni. Chu chu kan pi leh pute atanga kan chhawm nun a ni. A hun taka Zonun ze mawi kan lan chhuah tir hian midangte tan malsawmna kan thlen a ni tih hria ila. Hmanlaia mihuaisen leh tlawmngaiten Thingserh sata ‘Nopui’ an dawmtirte nen danglamna a awm chuang lova. YMA chu ‘Fak leh Chawimawina beisei lova midangte tana thil tha tih” a ni tih thu hi kan hriat nawn fo a tul ta hle.
Zonun ze mawi nena inzawm tlat chu rinawm hi a ni. Hei hian zahawmna leh malsawmna a keng tel a; aia upa kan biak danah te, zirnaah te, eizawnnaah te, inthenawm khawvennaah te hian rinawmna kan lanchhuah tir tur a ni. Khawlaia intihbuai leh au thler duai duai te, midangte tana bengchheng khawpa music play te, bawlhhlawh a hmun lova paih te, ran kan khuah khirh danah te leh zuk leh hmuam kan thlahdah dan han hmuh hian Zonun ze mawi dinthar leh a tul hle a, midang te tana malsawmna kan nih theih nan kan nitin nun hi kan her rem a hun takzet a ni.

Chanmarians ZAWLBUK Dinner

Dt 23rd July, 2009 tlaiah khan Chanmarians Zawlbuk Dinner chu member engemaw zatin San Adhi's Building, Chanmari Vengah an kilho.

Tum lawk angin he hun hi hman a ni a, amaherawhchu member tam tak Aizawl-a an awm loh avangin duh angin Member kal erawh an tam lova, mahse a kal chhunte chuan nuam an ti tlang hle. Dinner min thlengtu Pu Jeffrey Zohmingthanga (f/o Lana & Mawitea) te chungah Zawlbuk chuan lawmthu a sawi. A bik takin veng pawn lam atanga he Zawlbuk Pioneer Member pahnih, Tv.Asanga (Dawrpui) leh Tv Nunpuia (Dawrpui Vengthar) te rawn tel hram chu Member-te lawmna tizualtu a ni.

Chanmarians Zawlbuk Social Network hi May, 2009 atang khan siam a ni a. Hei hi veng chhung leh pawn thalaite inkawm hlimna atana tih a ni. Nitinin Internet user-te an pung ve zel a. He hmunah hian inkawm khawmin hun hlimawm tak an hmang thin a ni. He hmun hi veng chhung leh pawn, ram chhung leh pawna mite inpawh tlang taka an titi ho theihna hmun leh thianghlim tak leh zalen taka inkawm theihna hmun a nih avangin memberte chuan an hlut hle.

CHANMARI PRESBYTERIAN KOHHRANIN GOSPEL CAMPING A BUATSAIH

Chanmari Branch KTP leh Kohhran Hmeichhe Committee te Golden Jubilee thurel bawhzuiin Chanmari Presbyterian Kohhran chuan Dintharlehna Team ruaiin Gospel Camping, Agape Center, Durtlangah a buatsaih. Speaker hi Tv. C. Ziremmawia niin Camping hi chhawng thum neih tura ruahman a ni.
A chhawng khatna hi ni 14-18.7.2007 chhung neih a ni a, inrinni khan an lo chhuak. Camper te pual hian Kohhran chuan tawngtai khawl a buatsaih bawk a ni.
Camping-ah hian mi 141 an lut a, veng pawn atang leh Kohhran dang atangin mi eng emaw zat an lut bawk. Camper zawng zawngte hian Thlarauthianghlima harhna changin camp an chhuahsan a ni.
Branch YMA hruaitute leh Sub-Committee leh Section hruaitute zingah mi eng emaw zat camp-a an luh bakah rawngbawlna chanvo pawimawh tak an nei hlawm.
A chhawng hnihna hi ni 21-25.7.2009 chhunga neih leh tur a ni.

Side drain - VC hmalaknain siam tha

Chanmari Mini Sport Complex-a side drain chu VC hmalaknain siam that a ni.

Kawr haifai hian a bul hnaia chengte leh mi thahnemngaite vawi duai lo an hnatlang tawh thin a ni.
Helai hmun hi tunhma chuan Primary School kawt tih mai thin a ni a, naupang infiam nan a remchang hle a, naupang tualchaina tak pawh hi a ni. Kawr mumal a awm loh avangin School kawtah hian tui a luang mai thin a, helai hmuna infiamte tan a buaithlak duh hle a ni.

CHHIATNI FUND KHAWN DAWN

Chanmari Branch YMA chuan Chhiatni Fund Rs. 100/- a khawn leh dawn. Chhiatni Fund hi ni 15.8.2009 chhunga tihfel hman tur a ni.
Kumtir khan Chhiatni Fund hi khawn ni tawhin Rs. 99,200/- hmuh niin, hman tawh zat chu Rs. 82,995/- a ni. Nikum khan Chhiatni Fund hian min daih loh avangin General Account atangin Rs. 20,000/- chuang puk a nih bakah kumtira kuang 23 siam nan Rs.28,572/- sen a nih avangin Chhiatni Fund kuta awm zat chu Rs. 16,205/- chauh a ni ta a ni.
# Chhiatni Fund mi pakhat tana senso hi Rs 5,000/- vel a ni.
# Zan khat tlaivar senso hi Rs. 2,596/- vel a ni, hei hian bus hire, thlan lai ei leh in, pick-up hire leh kuang siam te a huam lo.
# Sawhchiar hi tlaivar zana sum sen tamna ber a ni a, a thlakna tur man tlawm zawk ngaihtuah mek a ni.
# Thingpui bawlhlo chungchang pawh sum sen a tam lutuk loh nan ruahmanna thar siam a ni.

MHIP DAY vawi 35-na ropui takin lawm

Ni 6.7.2009 (Thawhtanni) chawhma dar 11:00 khan Chanmari YMA Hall-ah MHIP Day vawi 35-na chu Chanmari Branch MHIP ten thingpui ruai nen an lawm. Chief Guest Pu Lalthanzara, Parliamentary Secretary. Chairman Pi Zopari, President. He hunah hian Pu T. Lalhluna, VCP, Pu C. Lianchungnunga, MUP President, Pi Vanramchhuangi, Chaltlang leh Pro Pastor Lalbiakhlira, Venghnuai ten thusawina hun an nei.

MHIP Day denchhena essay inziahsiak lawmman sem a ni. Hetiangin: 1st- Pi Vanramchhuangi (Chaltlang). 2nd - Nl. C. Lalthangpuii (Ramhlun S) 3rd - Tv. Lalbiakhlira (Venghnuai) an pathum hian pawisafai pek an ni.

MHIP Chanmari Branch in a lo rel tawh Vengchhunga topper hnena chawimawina chu VC inthlannaa vote hmuh hnem ber Pi Lalzuali hnenah pek a ni. Tawlhloh puan Chief Guest hi an present bawk a ni.

Chanmari Branch MHIP ah hian member 885 an awm. OB 6 leh committee member (adviser telin) 77 an ni.

MHIP te hmalakna pawimawh tak chu Charity Fund a ni, he fund atang hian loan a pung awmin mi 33 hnenah Rs. 5,000/- theuhvin semchhuah a ni.

Charity Fund thawhtute: Pi Thangliani Rs. 30,000/-. Pi Zochami Rs. 30,000 /-. Pi Lalrimawii Rs. 30,000/-. Pi Thangveli Rs. 30,000/-. Mr & Mrs P. Lalnithanga Rs. 10,000/- Mr & Mrs. Laltanpuia Rs. 30,000/-

Quiz leh Musical Chair-a intihhlimna neih zawhah Pi Lalrimawii, Treasurer-in lawmthu sawina a nei a, tichuan MHIP Day hlimawm tak chu chawhnu dar 2:00 ah zawh a ni.

Chanmari vengchhunga Office, Institution leh Sumdawngte tana Thuchhuah

Clean Chanmari Committee chuan Chanmari vengchhunga ei zawngte tan thuchhuah a siam. (hei hi lehkha sem atanga kaihtawi a ni)
1. BAWLHHLAWH PAIHNA : Vengchhunga bawlhhlawh paihna hi vengchhunga chengte bawlhhlawh paihna tur a ni a. Parcel te, in sakna leh thilsiamna nawi hrawmhraw tak tak paihna tur a ni lo. Bawlhhlawh hrawmhraw bik nei thinte chu mahni sensova inchingfel tur a ni, tui luankawrah bawlhhlawh paih loh tur.
2. BUNGRUA : Kawngpuiah vantlang chetvelna dip lo thei ang bera bungraw load/unload tur a ni. Kawng dip a dawr bungraw dah loh tur
3. HAWKER : Vantlang kawng dip phakin mahni dawr kawtah dawrte (Hawker) awmtir loh tur.
4. BAZAR : Chanmari Bazar hmun ni lo, kawngpui dung leh dawr kawtah inzawrh phal a ni lo. Dawr neitu leh in neitute pawn zawhtir loh tur. Man tlawm thei ang bera thil zawrh tur a ni.
5. ZIRLAITE : School, College leh thildang zirnaa zirlaite zingah anmahni Institution pawna bengchheng siam ching an awm. Khawlaia intawllen lova an zirna hmuna lut nghal tur leh an zir zawh veleha haw nghal turin zirtirtuten an zirlaite lo hriattir se.
6. ZU LEH RUIHHLO : Chanmari vengchhunga eizawng zawng zawngte, zu leh ruihhlo laka inthiarfihlim turin Clean Chanmari Committee chuan a ngen a ni.
7. THIL DANG : # Mipui nunphung pangngai tikhaihlak thei rally, road show, concert etc. huaihawt a nih dawnin Sawrkar leh khawtlang hruaitute hriattir tur a ni. Hnawmhnawk hnutchhiah lo tur. # Phalna lovin poster, banner etc. tar khap a ni. Banner tar duhte chuan VC hriattir tur.

TAITESENA RUHRO - Khuallian atan hman a ni

Taitesena ruhro hian kum 1976 YMA khawvel a nghawr hneh hle. Kawrthah khuaa Taitesena tupa Pu Lalmawia hnen atanga phalna lain Kawrtethawveng Branch YMA-te chuan 1976 March ni 9 khan an phawrh a, Taitesena hi Khalhvuuga Khiangte leh Dovi Pautute fapa a ni. Kum 1904-a kum 22 mi niin a thi.

Chumi kum August thla lamah chuan Central YMA hotute’n Taitesena, chu Aizawla zin tur leh Kolasib-a YMA General Conference hmang tura sawmzai an rel ta a, a phawrhtute’n an lo phal em em bawk. Kawrtethawveng atangin September ni 15-ah an rawn zawn chhuak a, Pu R. Tlanghmingthanga leh Pu Lalhmachhuana’n Sairangah lo hmuakin ni 17-ah Aizawl an rawn thlen a. Reception Committee-in a ruahman angin Chaltlang Dawrkawnah CYMA hotute’n an lo hmuak a, Scout and Guides hovin chibai an buk a. Chanmari kawnah zawitein an chhukpui a, hmuaktu mipui tamzia chuh! pawl tinreng chibai leh pangpar thi hi a vumin a vum a ni ber mai. Inkhawm zawhah Scout leh Guides-te’n hma an hruai a, Z.U.P lamin Kuang an zawn a, tlai dar 5-ah Central YMA Office, Threatre Hall-ah luhpui a ni ta. A hnu lawk YMA General Conference Kolosib-ah Khuallian atan phurhthlak a ni a. Kum 14 emaw lai Central YMA pisa a nghah hnuin 1990 January ni 17 khan hotute’n Kawrtethawvengah an phur thla leh ta a ni.

THLANMUALAH THINGPHUN

Ni 30.6.2009 (Thawhlehni) khan Chanmari Thlanmualah Branch Executive Member, Section hruaitute leh mithahnemngai te nen thingphun hnatlang neih a ni a, thing chi hrang hrang: April par te, Ngiau te, Bung te, Neem te leh Silver Oak te avaiin kung 220 phun a ni a. Ngiau hi thlanmual ramriah leh step tawn tawnah phun a ni hlawm a, April parte hi thlanmual kawt velah phun a ni bawk. Thlanmual ramri hungna chhe lai te pawh siam that nghal a ni.

Pu Lalnuntluanga, Section-I chuan heng thing phun hungna tur mau eng emaw zat a rawn thawh a, Pu C. Lalchhanhima, Section-II chuan Rs. 300 a rawn thawh bawk.
Picture: CBYMA President Pu Lalhmangaiha leh Vice President Pu Lalramliana ten Ngiau an phun.

Pu C.Chalkunga kan then ta

Tukin (1st July,2009) dar 7:30 khan Pu C.Chalkunga (71) h/o Pi Lalmuankimi (L) chuan chatuan ram min pansan ta. Vawiin chawhnu dar 2:00 khan vui a ni. Amah hi UPC (Mizoram) Kohhran member a ni.

Pu C.Chalkunga hian Police hna a lo thawk thin a, Hockey thiam niin Hockey-ah Goalkeeper a ni thin. A hna atanga a pension hnuah Chanmari Veng VC-ah te member a lo ni tawh thin a ni.

30th June, 2009 zana a lengchhuak chu chesualin a tlu a, chu a hliam chu tuar lovin 1st July 2009 dar 7:30 am khan chatuan ram min pansan ta a ni.