Monday, September 28, 2009

PI HUAPLIANI KAN THEN TA

Pi Huapliani (76), Section-II hi ni 10.1.1933 khan Se-hlawh khuaah a piang a, a nu leh pa chu Pu Chana leh Pi Zahnuni an ni. A unaute:

1. Biakveli (L), Bawngkawn
2. Huapliani w/o Mana (L), Chanmari
3. Upa Dawngliana (L) h/o Dengluaii, Bawngkawn
4. Lalzawmi (L) w/o Thanghlira, Bawngkawn
5. Rohuali (L) w/o Chala, Bawngkawn


April ni 7, 1950 khan Mana s/o Daia, Sentlang khua nen an innei (Pu Mana hi vanduaithlak takin kum 1968, April ni 2 khan a boral). Fa sawm an nei:

1. CT. Zuali w/o VL Muana (L), Mission veng. 2. Zasiami, Chanmari. 3. Zaneihi w/o Thangmawia, Chanmari. 4. Zabuangi (L), Chanmari. 5. Zasangliani w/o Lalchungnunga, Maubawk. 6. Zatluangi (Apuii), Chanmari. 7. Zathangpuii, Chanmari. 8. Zachungnunga h/o Irene Lalrinpuii, Chanmari. 9. Zahmingliani (Ahmingi), Chanmari. 10. Vanlalhruaii Hrahsel w/o Upa R. Lalhmangaiha, Khatla South

Pi Huapliani hi nu lian leh taima tak a ni a, a zaidamin huatthu a nei lo a, a miziaa langsar tak chu a pasala chhungte a vuan nghet em em reng hi a ni. Mi thu ngaichang thiam tak a ni a, eng hna pawh thawh a hreh lo a, Kohhran bel tlat mi niin Kohhran pawhin a ngaihsak hle a ni. Mi biang biak peih tak a ni a, alo upat deuh hnu pawh hian mi kawng kal te a be peih em em a, hei vang hian mite ngainat a hlawh phah hle a ni.

Mi hrisel tak leh hnathawk thei tak a ni thin a, tun tum hi damdawiin vawi khat a awmna a ni. A kum alo tam deuh hnuin awm na, thawhah leh tha na benvawn a nei a, a theih ang angin a inenkawl thin. Ni 17.9.2009 khan hritlang khawsik neiin in lamah enkawl a ni a, a ziaawm mai loh avangin ni 24.9.2009 khan uluk lehzuala enkaw turin New Life Hospital, Chanmari-ah dah luh a ni. Doctor te leh Nurse ten theihtawp chhuahin an enkawl a, investigation hrang hrang an tih hnuin a mita lungte awm leh pneumonia a nei tih hmuhchhuah a ni a, a thisen lam a fel tawk lo tih hriatchhuah a ni leh a. A natnain ziaawm lam a pan loh avangin, ni 26.9.2009 (Inrinni) zan atang khan oxygen pek tan a ni. A hriatna pawh a tlahniam zel a, ni 27.9.2009 (Pathianni) chawhnu dar 3:15 khan chatuan ram a lo pan ta a ni.

Sunday, September 27, 2009

SABEREKA KHUANGKAIHIN A LAK MI 4 RUANG HMU KIM

Sabereka khuangkaihin a lak mi 4 ruang chu vawiin ni 27.9.2009 (Pathianni) khan hmuh kim an ni ta. (Pick Up driver, Malsawmdawngliana (25) Sesawng khua, tuna Electric Venga cheng, handyman, Lalthlamuana, Ratu, Lalrinchhunga (20) Bethlehem leh Lalfamkima (27) Chhinga Veng)

Ruang pahnih chu Tuirial leh Muthi lui infinna bul suarah hmuh an ni a, pahnih dang chu Tuirini chhuah kaiah leh Nausel bul, sih lui bulah hmuh an ni.

Ruang zawng te hi Branch 18 an ni a, Chanmari Branch YMA atangin mi 200 chuang zet an thawkchhuak a, City Bus 3 leh motor eng emaw zat thawhchhuahpui a ni.

Saturday, September 26, 2009

PI ZD. LALCHAWII KAN THEN TA

Pi ZD. Lalchawii (76), Sec III hi Pu Lalpuia Zadeng leh Pi Thangpuii te fa 7 zinga a 4-na niin kum 1934 April khan Hnahchang khuaah a lo piang a. Kum 1970 khan Zathiauva nen inneiin fapa pakhat LR. Muana an nei.

Kum 2007 khan Pangzawl atangin a fapa LR. Muana hnenah a khawsa a. September 2007 atang khan thisen sang leh diabetis natna avangin a damlo a, a taksa khing a zen phah hial a ni. In lamah enkawl niin ni 22 September (Thawhlehni) zing dar 9:00 atangin biak hleih theih lovin a awm a, New Life Hospital-a dah a nih hnu tlai dar 6:10 ah chatuan ram min lo pansan ta a ni.

HNAM LAM INTIHSIAKAH CHANMARI BRANCH YMA 6-NA


Art & Culture Department leh Central YMA tangkawp buatsaih, Chief Minister Running Trophy Cultural Dance Competition vawi 9-na AR Lammual-a neih chu zawh a ni ta. Hnam lam intihsiaknaah hian Branch YMA 40 telin Chanmari Branch YMA chu a pumpuiah 6-na a ni.

Hetiang hi result a ni: Cheraw: 1. Vaivakawn 2. Dinthar 3. Armed veng. Khuallam: 1. Chanmari West 2. Dinthar 3. Chaltlang North. A tel Branch zawng zawngin Rs. 4,000/- theuh an dawng a, a pumpuia 1-na Dinthar Branch; 2-na Chanmari West; 3-na Vaivakawn Branch te an ni.

Top Ten: 1. Dinthar 2. Chanmari West 3. Chaltlang North 4. Armed Veng 5. Ramhlun South 6. Chanmari 7. Vaivakawn 8. E. Lungdar 9. Khatla 10. Tlangnuam te an ni. Art & Culture Director Award - Zemabawk North hnenah hlan a ni.

Friday, September 25, 2009

Pu R. Lalhuapzauva, Serchhip a boral

(Pu R. Lalhuapzauva hi Pu Lalhmangaiha, Chanmari Branch YMA President unau zinga upa ber a ni)
Pu R. Lalhuapzauva (Serchhip khua) hi Upa Hualrothanga (L) leh Pi Lalngurliani te fa 6 zinga upa ber niin ni 27th May 1952 khan Lungleng khuaah a lo piang a. A unaute:
1. R. Lalhuapzauva h/o R. Neihkimi, Serchhip
2. Lalramhluni w/o Vanlalsiama, Serchhip
3. Lalhmangaiha h/o Romawii Varte, Chanmari
4. Lalbiakthangi w/o Sangzuala, Thingsulthliah
5. R. Lalnunenga h/o Lalromawii, Serchhip
6. Lalfakawmi w/o Lalzuala, Serchhip

Kum 1975 khan R. Neihkimi nen inneiin fa pathum an nei a, chungte chu:
1. Marlin Chanchinmawia h/o Lalrinpuii
2. Andrew M.S. Dawngsangzela h/o Ruthi Lalnunfeli
3. Kennedy Malsawmtluanga te an ni.

A mah hi mi harhvang tak a ni. Serchhip khuaa raido, tape recorder leh type writer siamtu ber a ni. Thian ngaina leh rualpawl tak a ni. Ei leh in, zuk leh hmuam lama mi insum thei tak a ni.
Zirna & hnathawh: IGNOU atangin Class – XII zovin. B.A. thleng a zir chhunzawm. Kum 1976-ah Midland English School-ah zirtirtu hna a thawk. A thih ni thlengin Govt. PS, Chandmary, Serchhip-ah a thawk.
Rawngbawlna: Kum 1970-ah Piantharna a chang a. Pathian rawngbawlin hmun hrang hrangah a thiante nen an zin thin. SS kaikim leh exam-ah lawman eng emaw zat a la. NPSS zirtirtu leh Leader lo nitawhin K.T.P Branch-ah OB chanvo zawng zawng a lo chelh tawh. Serchhip Pastor Bial K.T.P. Secretary kum 10 chhung a zawnin a chelh. Bial K.T.P Chanchinbu ‘Thalai Arsi’ bul tantu Editor a ni. Kum 1996-ah S. Kawnpui Kohhran Committee Member-ah thlan a ni. Kum 1999-ah Chhimchhak Presbytery Inkhawmpuiah S. Kohhran Upa atan nemnghet a ni. Bial SS Asst. Secretary leh Secretary mawhphurhna a lo chelh tawh. Synod SS Committee-ah term 1 a tang. Bazar Kohhran Active Upa atan kum 2000 Presbytery Inkhawmpui chuan a dah nghet.

Ni April 28, 2009 khan a thiante rawn angin Aizawlah an inentir a. Cancer a nih thu doctor chuan an lo hrilh a. Hemi hnu hian doctor te chuan zai emaw phailama kalin awmzia a nei chuanga a rin loh thu an lo hrilh a. A pianna khua Lungleng tlawhin a patea leh a chhungte a tlawh nghe nghe a ni. Cancer natnain a tlakbuak hnu hian Kohhran te duhsaknain Biak In hrang hrangah thuchah sawi tura sawm leh hun pek a ni a. Pathianin a hmang hle.
Ni 23.9.2009 (Nilaini) zan dar 6:40 khan chatuan ram min lo pansan ta a ni.

Tuesday, September 22, 2009

CHANMARI GAMES NI 4-NA

Ni 21st September 2009 (Thawhtanni) khan High Field-ah shot put, volleyball, football hmanga intihsiakna neih chhunzawm a ni. Hemi ni hian Branch YMA Executive Member leh Chanmari Branch KTP hruaituten football an khel! Pu Lalhmangaiha, YMA President leh Pu Zaiawnparlawma, KTP Leader te chuan thahnem an ngai thei hle a, chak lo zawk nih tum hauh lova an han innawr tak tak mai chu pui rem rem tak a ni. KTP lam hi 2-1 in an chak ta a ni.

Ni 21st September 2009 (Thawhtanni) result:
Shot put: 1st - Sec II; 2nd - Sec III; 3rd - Sec IV
Football (above 35): 1st-Sec II; 2nd-Sec IV; 3rd - Sec I & III
Football (below 35): 1st - SecI; 2nd - Sec II; 3rd - Sec III & IV
Attendance: 1st - Sec II; 2nd - Sec IV; 3rd - Sec III


Saturday, September 19, 2009

PU LALRAMLIANA KAN THEN TA

Pu Lalramliana, (39) Sec-I hi Pu Vanhnuailiana (L) leh Pi Lalthanzami te fa panga zinga a upa ber niin ni 27.12.1969 khan a lo piang a, fanu pahnih leh fapa pakhat a nei. Naupan lai atanga thuawih thei tak leh harhvang tak mi a ni a, zirna lamah pawh rualpawl ve tawk tak a ni.

Kum 1992 khan SOG hnuaiah Missionary Training-in Manipur-ah a awm a; Pathian hla pawh eng emaw zat a phuah a ni. Ni 13.9.2009 (Pathianni) atang khan a awm a nuam lo tan a. Bethesda Hospital panpui a nih hnuah Internal bleeding-in a zui ta nghal a. Doctor leh nurse ten theihtawp an chhuah chungin ni 16.9.2009 (Nilaini) zing dar 1:15 khan chatuan ram min lo pansan ta a ni.

PU REMSIAMA - NATIONAL AWARD TO TEACHERS 2008 DAWNGTU

Pu Remsiama, Sec III chu India Sorkar chuan rampuma zirtirtu tha lawmman National Award To Teachers, 2008 a hlan. He Award a dawn chungchanga Pu Remsiama chanchin tlangpui chu hetiang hi a ni.
Hnathawh : Pu Remsiama hian BA IIIyr a zirlai kum 1969 atangin Zemabawk H/S ah zirtirtu hna thawk tanin kum 1970-81 ah Thingsulthliah H/S ah a thawk a. Kum 1981-2000 ah Headmaster-in Democratic H/S, Khumtungah a thawk a. Kum 2000-2001 ah Govt. HSS, Saitualah Principal hna a thawh leh hnuah kum 2001-2009 ah Govt. Republic HSS, Aizawlah Principal niin kumin March ni 31 khan a pension ta a ni.
State Award : Mizoram Sorkar chuan August 15, 2008 khan Pu Remsiama hi Mizoram State Teachers’ Award a lo hlan tawh a ni.
National Award : Award dawng turte chu School an enkawl dan kawng hrang hrangte, kum 10 chhung Public Exam result leh tehna engemaw zat hmanga teh an ni. Tun tumah hian India ram pumah mi 302 in dawngin Mizoram atangin Pu Remsiama (Higher Secondary) leh Pu Lalaudinga, Headmaster, Ramthar M/S (Elementary) ten an dawng a ni.
Award hlanna : He Award hi Zirtirtute Ni, ni 5 September, 2009 khan Vidhyan Bhavan, New Delhi-ah India Vice President Ahmed Ansari chuan Pu Remsiama hi a hlan a. He Award hian Certificate, Medal leh pawisa fai Rs. 25,000 a ken tel bakah Award dawngtu leh a kalpuitu mi pakhat tan thlawhna, rel 1st class leh kal man dang zawng zawng bakah 5 Star Hotel a an thlenna (Ramada Plaza, ei leh in tel lovin riahman ringawt zan khatah Rs 6,000) leh an ei leh in zawng zawng a thlawnin India Sorkar chuan a tumsak a. Hei bakah Mizoram Sorkar chuan Delhi leh Kolkata Mizoram House-ah VIP room a pe a ni. Heng bakah hian hamthatna engemaw zat dawn an la nei bawk.
Entawntlak : Pu Remsiama hian zirna School tha, English Medium School leh State pawnah vawikhat mah lehkha zir lo mah se, zirna leh zirtir hna a mi hlawhtling, taima, hna thawhna hmuna tlai ngailo, mi invawng leh mi entawn tlak tak a ni a; tuna Zoram mihlawhtling tamtak te hi a zirtir chhuah te an ni. Zirtirtu hna a thawhna School hrang hrangah te hmasawnna thlentu a ni. Tunah hian IRS Republic School (ICFAI), Zemabawkah Headmaster hna a thawk mek a ni.

Thursday, September 17, 2009

AIZAWL CITY BUS - NI HNIH HNUAH SERVICE

Vawiin ni 17.9.2009 (Ningani) atang khan city bus chuan ni hnih chhung sorkar ruahmanna an duhloh lantirna chu sutin an Service tan leh ta.

Zoram Taxi Driver's Association (ZTDA) chuan sorkarin traffic jam tiziaawm tura taxi-te intlanchhawk tura ruahmanna a siam duhloh lantirna chu ZTDA chuan la chhunzawm an tum ni a hriat a ni.

Sorkar laka an lungawilohna hi engtia rei nge ni dawn tih ilo ngaichang phawt mai teh ang u.

Driver thenkhatte chu eizawn nan taxi hmang an nih avangin ni khat service loh pawh a uihawm hle.

Wednesday, September 16, 2009

CITY BUS & TAXI NAWRHNA CHHUNZAWM ZEL


City Bus service loh vangin MST Bus a ding ruau mai!!

Taxi stand-ah te chuan Police leh Taxi Driver duty hmuh tur an tam hle.

Aizawl khawpui chhunga taxi intlan chhawk tura Sorkarin ruahmanna a siam duh loh lantir nan taxi-te chu ni 14.9.2009 (Thawhtanni) atanga an tlan chhuah loh hnuah Mizoram Road Transport Union (MRTU) thu angin, ni 15.6.2009 (Thawhlehni) atang khan City Bus-te pawhin zawm vein an service lo. Hei vang hian Aizawlah nunphung a buai phah. Mipui harsatna zualpui phuhurk turin Sorkar chuan Department hrang hrang bus 58 a tlantir nghal a ni.

Saturday, September 12, 2009

PU LIANHMINGTHANGA KAN THEN TA

Pu Lianhmingthanga (70), Section-IV hi Pu Hrangchhuana (L) leh Pi Biakveli (L) fa pahnihna niin, ni 9th September 1939 khan Aizawlah a lo piang a. Pianpui unaute pasarih a nei. Kum 1962-ah Pi Siamliani nen inneiin fa pali an nei :

# Lalthlamuana Varte
H/o Lily-puii, Chanmari
# Lalzamliana Varte
H/o Lalhmingthangi, Chanmari
# Laldingliana (L)
H/o Lalhlimpuii, Chanmari
# Lallianzuali
W/o Zobiakvela, Chanmari

Mizoram buai avangin kum 1967 khan Silchar-ah chukin, damdawi zuarin eizawnna bul an tan a. Kum 1972 khan Aizawl rawn chhuak chhovin a pa hming chawiin Hrangchhuan Pharmacy an enkawl ta a ni. Amah hi pa ti ti thiam, fiamthu duh leh rual pawl tak a ni. Pathian malsawmna a dawn atangin sawm a pakhat pek hmaih ngai lo mi a ni Kohhran pawh thliar bik nei lovin tanpui ngai a hriat apiangte a tanpui thin. Thu leh hla lamah pawh mil ungleng thei tak niin hla tam tak a phuah a ni. Politics lamah pawh a tha leh zung nasa taka seng hle. Kum 1987 khan MNF ticket-in Serchhip Bialah MLA leh kum 1998 ah Suangpuilawn Bialah a in candidate MNF(N)- ah Treasurer dinhmunte a lo chelh tawh bawk.

Pu Lianhmingthanga hi hun eng emaw chen a tang khan TB leh Diabetis ten a tlak buak avangin a in sawisel deuh reng thin a. Kumin August khan Nazareth Hospital-ah admit a ni. That lam a pan theih meuh loh avangin Aizawl Civil Hospital, Cardialogy Ward-ah ni 25th August 2009 khan admit leh a ni. A lung leh kal lamte a fel vak loh avangin Dialysis pawh tum hnih lak a ni a. Doctor ten theihtawp chhuaha an enkawl hnuin ni 11.9.2009 zing dar 6:45 khan chatuan ram min lo pansan ta a ni.

Wednesday, September 09, 2009

Hmatiang sawn tum Lengi leh Vala te


Khuangpute pawh duh leh khuang rap chungin......

Nulaho pawh an awm mai mai lo...an ke atang hian a chiang reng!!

Saturday, September 05, 2009

Pi Chawngthanpari kan then ta

Pi Chawngthanpari (Papari) hi Pu Thangliana (L) leh Pi C. Ronguri(L) te fa upa ber niin 12th May 1961 khan Lungleiah a lo piang a, an unau chu hengte hi an ni: #Chawngthanpari w/o Richard Lallawmzuala, Chanmari
#Chawngdingpuii w/o V. Lalbiaktluanga, Lunglei #Rebecca Lalzawmpuii w/o David K. Lalmawizuala, Lunglei

Papari hian B.A. a pass hnu hian hmun hrang hrangah zirtitu hna a lo thawk tawh a. March ni 5, 1990 atangin tuna a thawhna Mizoram Legislative Assembly Secretariat-ah hian Translator hna thawkin a thih ni thlengin he hna hi rinawm takin a thawk a ni.

May ni 10, 1990 khan Dawrpui Kohhran Biak inah Richard L.Pachuau (Patea) nen inneiin, fanu pakhat leh fapa pakhat an nei a, an fate chu Rosalyn Lalmuanpuii leh Reuben Lalremruata. Papari hi mi invawng fel leh insum thei tak, taima tak a ni. A phak ang tawka rawngbawlna chanvo a neih te theihtawpa hlen chhuah tum tlat mi a ni a. Tunah hian Chanmari Presbyterian Kohhran - Puitling Sunday School Zirtirtu niin, Kohhran Hmeichhe lamah pawh Bial puitu leh Bible Society ah Collector ni lai mek a ni a, Sunday School exam-a ti tha, a zawna kum 5 Honours hmu te chawimawina Zalawra Medal a dawng tawh a, Dawrpui Kohhrana a lawi laiin KTP ah Branch Committee Member a ni tawh bawk.

Papari hian insawiselna em em pawh a nei ngai lova. Thla hnih vel kalta atang khan lu na a sawi ve thin a. Medical check-up te pawh neiin engmah sawisel fak tur chu hmuh a ni lova. A lu na hi a la sawi fo avangin Nerve (hriatna tha zam) lam ha lo hnathawh a nih takin tih thil thuah 2nd Sept 2009 khan Nerve lam thiam Dr. Judy hnena inentir turin Appointment pawh an siam fel vek tawh a, an inentir hman ta lo a ni. A lu na hian a kian san tak tak lo mah se Office a kal reng tho a, a thawhpuite nen hlim taka inkawmin hun an hmang a, chawhma dar 11:20 vela bathroom-a inthiar tura a kal chu nikhaw hre lovin a tlu a. A thawhpuiten rang takin Civil Hospital panpui nghal mahse chhan hman a ni ta lo a ni.

Wednesday, September 02, 2009

GENERATOR EARTH LINE PHUM FEL

Ni 27.8.2009 (Ningani) zan khan earthing phumna tur chu YMA ram chin, LV Art kawt zawnah excavator hmangin a vang feet 3 leh a dung feet 15 a zauvin a khur tur laih a ni.
Ni 28.8.2009 (Zirtawpni) zan khan Silchar atangin service engineer mi pali rawn thlengin hna tawh zawh nghal niin hemi zan hian Branch Executive Member leh mi tlawmngai ten an phum fel.
Tunah hian Generator chu a awmna hmun turah dah fel tawhin current pechhuak thei tura fit mek a ni.

Tuesday, September 01, 2009

Pi Thanmawii kan then ta

Pi Thanmawii (85) m/o C.Lalrinzuali, Pu Parova Section I in luaha khawsa mek chuan 31st August, 2009 (6:05 PM) khan a chatuan ram min pansan ta.

Pi Thanmawii hi Pu C.Thasiama (L) nupui a ni a, kum 1924 khan a piang a, Baktawng khua atangin Chhingchhip-ah an pem a, Kum 1993 khan Chanmari vengah an rawn pem lut a, 1995 khan a pasal C.Thasiama'n a chatuan ram a pansan tawh a ni. Fa 5 (mipa 2, Hmeichhia 3) a nei a, tunah hian a fanu 2 te chauhvin an dampui tawh a, a fanu C.Lalrinzuali leh a tute nen tunah hian an khawsa mek.
Pi Thanmawii hi Pathian tih mi tak leh mahni phak tawk anga rawngbawl tum tlat mi a ni a, Kohhran inkhawm hi a dam phawt chuan a pelh ngai lo. Hun engemaw chen atang khan taksa insawisel tanin theih ang angin a tu leh faten an enkawl a, a lung (heart) lam that loh avangin Aizawl Hospital-ah enkawl a niin 31st August, 2009 (6:05 PM) khan a phak ang tawka a rawng a lo bawlsak thin, a LALPA hnenah min kalsan ta a ni. Amah hi Presbyterian Kohhran member a ni. (A thlalak hi 1st January, 2008 {Kumthar ni}-a lak a ni)