Saturday, March 27, 2010

2010 CHANMARIANS EDITORIAL BOARD

Sitting: Tv. Andrew Lalremkima, Pu Lalhruaitluanga, Tv. H. Thantluanga, Tv. Lalengliana, Pu David Lalmuankima

Standing: Tv. C. Lalrinliana, Tv. VL. Tlanchhuaha

PU C. ZORAMLIANA, CENTRAL YMA VICE PRESIDENT A BORAL

Pu C. Zoramliana (50), Central YMA Vice President chu nimin March 27, 2010 (Inrinni) zing dar 10:00 khan lungphu chawlin a boral. Pu Rampuia hi Pu C Kapthanga (L) leh Pi Chhunliani (L) te fapa niinTuikual North Aizawlah an cheng mek a, a thiannu Pi Lalhlimpuii nen fanu 4 leh fapa 1 an nei. Br. YMA ah Fin. Secy., Vice President leh President-ah te a lo awm tawh. CYMA ah 1991- 1996 chhung CEC member a ni a, 1997-1999 khan Fin. Secy. a ni a, 1999 -2003 khan Asst. Secy. leh 2003-2007 ah General Secy. leh 2009 leh 2010 ah Vice Presidet hna a chelh a ni.
Amah hi hrisel tha leh invawng fel tak, insawiselna nei ngai lo a ni. A boral hma ni hian CYMA kumpuan hnatlangah thawkchhuakin zanlamah pawh kulikawn Br. YMA kumpuan programme-ah thu a sawi nghe nghe. Ni 27.3.2010 tukthuan ei khama a pum na chu Civil Hospital panpui a ni a, zing dar 10:00 khan chatuan ram min lo pansan ta a ni. Vawiin chhun dar 12:00 ah hian vui a ni ang.
Nimin chhun dar 12:00 khan Central YMA Hall-ah CEC Emergency meeting neih a ni a, a sunna hun an hmang nghal.

BRANCH YMA HNUAIA COMMITTEE-TE JOINT MEETING NEI A NI

Ni 26 March, 2010 (Zirtawpni) zan khan Chanmari YMA Hall-ah Chanmari Branch YMA hnuaia Sub-Committee hrang hranga chanvo nei zawng zawng te pualin Joint Meeting neih a ni a, member 150 vel an kal khawm.
He Joint Meeting hi Pu Laldinpuia Sailo, President CBYMA in kaihruaiin Nl. Zuiliani Hrahsel, Executive member-in hunserh a hmang. Tv. Lalengliana, Secretary CBYMA in inchhiarna hun a hman zawhah Pu C. Vanlalnunga, Executive member hnen atangin sum vawn dan chungchang ngaihthlak a ni a. Hemi zawh hian Pu Lalhmangaiha, Vice President CBYMA hnen atangin chhiatni chungchang thu ngaihthlak a ni a. Chanmari vengchhunga chhiat tawh nikhuaa tan lakna tur hrang hrang a sawi.

CLEAN CHANMARI CHUNGCHANGA VANTLANG INKHAWM


Ni 25 March, 2010 (Ningani) zan khan Chanmari YMA Hall-ah Clean Chanmari Commiittee huaihawtin vantlang inkhawm neih a ni a, hall khat tlatin vengchhung nu leh pa leh thalai 300 chuang an pungkhawm.
He inkhawm hi Pu T. Lalhluna, Chanmari VCP leh Clean Chanmari Committee Chairman ni bawk kaihhruaiah hian khuallian Pu Lal Thanzara, bialtu MLA leh a nupui an tel a. Pu C. Lianchungnunga, President MUP Chanmari Branch in hunserh a hmang a, Pu Lalbiakliana, Secretary, Clean Chanmari Committee hnen atangin report ngaihthlak a ni a. Khuallian chuan Chanmari Veng chu ama chenna veng ang maia a ngaih thu leh veng hmasawnna tur atana hmalakna tur hrang hrang te tihhlawhtlin a nih theih ngei nan theihtawp a chhuah tur thu a sawi a ni.Vantlang inkhawm zawhah hian bialtu MLA hian a duh apiang ten an kawm theihna tur hun remchang a hawng bawk a ni.

Saturday, March 20, 2010

PI CHUHVELI KAN THEN TA

Pi Chuhveli (77), Sec-II hi Rev. Nikhama (L) leh Pi Tinthangi (L) te fa upa ber dawttu niin February 10, 1934 khan Chhingchhipah a lo piang a, unau 7 an ni. Kum 1955 khan Durtlang Kohhran Biak Inah Lalzarmawia nen inneiin fapa 1 leh fanu 2 an nei a, tu 7 leh tuchhuan 4 an nei a ni.

Zirna lamah chuan Govt. Sialsuk MAV (Middle Anglo Vernacular) School atangin Cl - VI a passed a, Nurse hna hmun hrang hranga a thawh hnuin Aizawl Civil Hospital- atangin Voluntary in a Pension.

Pi Chuhveli hi Chanmari Kohhran Hmeichhe Committee hruaitu hlun berte zinga mi a ni. Kum 1973 atang khan kumin, 2010 thleng hian hruaitu nihna post hrang hrang a chelh. Chairman-ah kum 19 zet a awm. Bial Hmeichhe Committee bakah
Central Hmeichhe Committee-ah hruaitu nihna pawimawh tak tak a lo chelh tawh thin.

September, 2009 atang khan luhai a neih avangin a insawisel tan a, kumin January thla atang khan a natna chu Alzheimers disease tih hriat niin chumi hnuah Pneumonia leh Asthma natna a nei tih hmuhchhuah leh a ni. February ni 25 atanga March ni 6 chhung khan New Life Hospital-ah admit leh niin Chuap Cancer a vei tel tih hriat belh a ni a. In lamah a tu leh faten duat taka enkawlin March ni 19, 2010 (Zirtawpni) zan dar 6:50 khan a tu leh fate chibaiin Pathian kutah ka awm tiin a kalsan ta a ni.

Friday, March 12, 2010

CHANMARI BRANCH YMA AIAWHA WORLD RECORD ATANA CHERAW KAN TE


Cheraw - Guiness World Record

12th March, 2010 Khan Mizoram chuan Tum khata Cheraw (Bamboo Dance) tum khata kan tam ber record kan siam ta. Record-a a landan chuan hemi tuma cheraw kantu zawng zawng chu mi 10,736 an tling. Hetah chian Chanmari Branch YMA pawhin Cheraw Bu 5 kan thawh ve a, AR Ground-ah Bu 3 leh Chanmari Kawnah Bu 2 an awm.

Wednesday, March 10, 2010

Art Gallery-ah Chanmari Nula

9th - 13th March, 2010 chhung hian Vanapa Hall-ah Chapchar Kut 2010 Art Exhibition chu Information & Public Relations Dept leh Mizoram Academy of Fine Arts (MAFA) chuan an buatsaih a. He Art Gallery-ah hian Paintings, Photographs, Cartoon leh Artwork thil chi hrang hrang pho chhuah a ni a, tlawhtu mipui pawh a ngah hle.

Movement of Life -- Day & Night
He Gallery-ah hian Chanmari Veng nula, R.lalremtluangi (Tluangi) d/o Pu R.Lalawmpuia, Sec-II chuan a Kutchhuak (Acrylic on glass) pathumte (Day & Night, Movement of Life, Dream of Fire & Passion) chu a phochhuak ve a. Heng Tluangi kutchhuakte hian Gallery entute mit a la hle a, a artwork danglamna hi mite ngaihtuahna hruai nasatu tak niin a lang. He Gallery hawn ni hian Mizoram Chief Minister, Pu Lal Thanhawla chuan heng Nl.Lalremtluangi artwork pahnih (Day & Night leh Movement of Life) te chu a leisak nghal hial a ni.
(Dream of Fire & Passion)
Nl.Lalremtluangi hian Fine arts lamah zirna mumal a nei hran lova, amaherawhchu High School a kal lai atangin hetiang lamah hian a ninhlei tan hle a, mahniin, in lamah a ngaihtuahnaa thil lo langte chu lemziak leh thilsiam hmangin a tarlang thin a ni. Nikum lamah pawh khan Chanmari Branch KTP-in Art Show an neih khan a kutchhuak engemaw zat a phochhuak tawh bawk.

Monday, March 08, 2010

53rd KTP General Conference

53rd Central KTP General Conference chu 4th - 7th March, 2010 khan Mamit-ah neih a ni a. Hetah hian Chanmari Branch KTP Member 100 chuang zet an kal. Chanmari Branch KTP hian 5th March 2010 chawhnu Inkhawma Variety Programme-ah CKTP ngenna angin Drama pakhat "Jeriko Kulh" tih chu an chang a. He drama hi conference palai kalten an hlutsak hle mai a. Inkhawmpui tiak zan, 7th March Zan Inkhawm ban Fellowship-ah khan an chang nawn leh a ni.
Chanmari Branch KTP Member te hi dam takin 8th March 2010 10:15 AM khan an lo thleng leh ta.
General Conference Vawi 54-na hi Thenzawl-ah 2012-ah neih a ni ang.

Saturday, March 06, 2010

MUALPUIAH CHERAW BU 2 ENTIR






March 6, 2010 khan Mualpuiah Rajiv Gandhi Sports Complex Lungphumna neiah Cheraw bu hnih entir a ni.

BASKETBALL LEH FOOTBALL ATAN INBUATSAIH MEK A NI

February thla atang khan zing leh tlai tin Football leh Basketball practice thin a ni. Football Coach atan Tv. Lalchawngliana (Vala), Sec-I leh Pu Vanlalpeka, Sec-II te ruat an ni a, Basketball Coach atan Tv. Samuel Lalthlamuana Sec-III leh Tv. Reuben Lalchhandama Sec.IV te ruat an ni.
Central YMA in a buatsaih tur Basketball leh Football hi April thla chhung hian neih a ni ang.

Friday, March 05, 2010

INPUAHCHAHNAIN A TAWP A HNAIH TA



YMA Hall hnuai lam zirna thin chu rawng hnawih thar a nih vangin ningani zan khan Main Hall, stage-ah lam zir a ni a, lam zir ten nuam an tiin an phur tawh hle.