Basketball-ah kan chak ta lo

YMA Platinum Jubilee, Basketball Tournament, 2010 ah chuan 28th April,2010 chhun dar 1:30 khan Chanmari Branch YMA Basket Team leh Tuikhuahtlang Branch YMA Basketball Team te chu an inkhel a, inkhel a hmuhnawmin an inhnehtawk hle a. A tawpah Tuikhuahtlang chuan 57-50 in Chanmari Branch lakah hnehna a chang ta a ni. Chanmari Players te hi veng mipui thahnem takin an tawiawm a, Players te inpekna a ropui hle.

CHANMARI VENG TIHMINGTHATU- Jewel Lalthasangzeli Fanai chanchin ngaihnawm

April ni 23, 2010 (Zirtawpni) a MBSE in HSSLC Result a puan takah khan kan veng atangin Jewel Lalthasangzeli Fanai, Pu A. Zohmangaiha leh Dr. Zokaitluangi te fanu, Sec-IV a cheng chu Commerce-ah Mizoram pumah PAKHATNA a ni. Jewel Lalthasangzeli Fanai hian a nu leh pate a chawimawiin Chanmari veng hming a va han titha tak em!

Nupuii tia koh Jewel-i hi July ni 6,1993 khan Presbyterian Hospital, Durtlangah piangin unau pali zinga (hmeichhia 2 leh mipa 2) a upa ber dawttu a ni. A naupan lai hian Neuhof, MICE leh Dehradun-ah te school a kal a. Neuhof School atangin Class VII chu Distinction-ah a passed a. Govt. Mizo High School atangin kum 14 mi chauh niin Matric chu Distinction-ah bawk passed lehin hemi tum hian Maths leh Science-ah Letter a hmu nghe nghe a ni.

A naupan tet atangin lehkha thiam thei tak a ni a. English a thiam rualin Mathematics hi a man em em bawk. A classmate-te zirtir thei khawpin a thiam a ni. Amah leh amah a infuih nasa a, “Mut thlahlel suh, i lo pachhe dah ange; i mit meng la chhang kham khawp i nei dawn nia” (Thuf 20:13) tiin a infuih sauh sauh thin. High school a kal atang phei chuan zirna lamah reng reng a nu leh pate puihna a beisei ngai lo a. A rilru hi a chak hle a, Dehradun-a School a kal chhung zawng hian Sanskrit-ah topper a ni char char a ni.

Kumina HSSLC a exam dawn khan amah tak chuan a zir vak tawh lova, a thiante’n an inah an rawn pan khawm a, a lo zirtir thin a ni. Kumtir atangin mar patin lehkha a zir mai thin a. A zirlai bituk a thiam hma chuan lehkha zir a in ti ngai lo. Amah bikah chuan tun HSSLC ah hian Business Studies-ah a hmu sang ber. Tin, Economis leh Accountancy subject te hi a tuipui em em bawk a ni. A zirlai chhunzawma Chartered Accountant ni ngei turin Delhi lamah min liam san thuai dawn a ni.

Lehkhathiam, mi danglam, Jewel Lalthasangzeli Fanai hi a nu leh pa, chhungkhat laina leh Chanmari veng tana lunghlu mawi tak a nih chhunzawm zel theih nan Chanmarians chuan duhsakna sang ber kan hlan e.

PI NGURBIAKI KAN THEN TA

Pi Ngurbiaki (60), Sec IV hi Pu Chawnbura (L) leh Pi Thangkhumi (L) te fa paruk zinga a tlumber dawttu niin March ni 15, 1950 khan Sialhawkah a lo piang. Kum 1976 khan Pu C. Lalruata nen inneiin fa pali- Lalthlamuana, Lalnuntluangi, Lalhriatpuii leh Lallawmsanga te an nei. Amah hi Champhai Kahrawt Kohhran Sunday School zirtirtu leh KTP hruaitu hlun, inkhawm ngaina leh Pathian tih mi a ni.
Kum 2008, June thlaah insawisel tanin kum 2009, March thla khan pumpui cancer tih hriatchhuah a ni a. Kumin March thla khan New Life Hospital-ah lutin hemi thla vek hian damdawiin atanga chhuakin in lamah enkawl chhunzawm a ni a. April ni 22, ningani zing dar 4:10 khan chatuan ram min lo pansan ta a ni.

CYMA Football-ah kan chak !!

24th April, 2010 (Inrinn) chhun dar 1:00 ah khan Central YMA Inter-Branch Platinum Jubilee Football Tournament 2010-a Chanmari Branch YMA Football Team inlanna hmasa ber, Ramhlum Sports Complex Ground-ah Chanmari Branch chuan Zemabawk (Airfield Veng) Branch YMA te chu tumin 11-1 in chakna a chang. He inkhelah hian Chanmari Branch Team atangin Lalhriatpuia chuan Goal 5 zet a thun.

Chanmari Branch YMA Team te hian 4th May 2010 (Thawhlehni) ah hian an khel leh ang.

Jewel - Chanmarian tleirawl chhuanawm

23rd April, 2010 chawhma khan Mizoram Board of School Education (MBSE) chuan Higher Secondary School Leaving Certificate (HSSLC) Examinations, 2009 Results a tichhuak a. Commerce Stream bikah hian Chanmari veng tleirawl, Jewel Lalthasangzeli Fanai d/o A.Zohmangaiha, Sec-IV chu a pumpuiah PAKHATNA a ni a, Chanmarians in a chhuang hle. Jewel hi Govt. Higher Secondary School-ah zirin 77.4% a hmu a, Distinction-ah a passed a ni.

Basketball Tournament-ah kan chak phawt

(Chanmari Branch YMA Basketball Team 2010)

Inter-Branch YMA Platinum Jubilee Basketball Tournament, 2010, Zarkawt Recreation Centre-a khelh mekah 23rd April, 2010 (11:00 am) khan Chanmari Branch YMA leh Model Veng Branch YMA te chuan an khel a. Vanneihthlak takin Chanmari Branch YMA hian 68-51 in hnehna kan chang.

Chanmari Branch YMA hian 28th April, 2010 (Nilaini) hian Republic Branch nen an khel leh ang.

YMA PLATINUM JUBILEE SPORTS TAN A NI TA

Chanmari, Pathianni ni 18th April 2010 : April ni 15, 2010 khan Central YMA Platinum Jubilee Basketball Tournamnet chu Zarkawt Recreation Centre-ah Central YMA President, Pu Lal Chungnunga'n a hawng. He basketball torurnament-ah hian team 49 an tel a, May ni 8 ah final khelh tura ruahman a ni. Chanmari Branch chu 1st round-ah bye-in 2nd round, April ni 23, Zirtawpni chawhma dar 11:00 ah Model veng leh Upper Republic veng inkhela a chak zawk zawk nen an intum ang. April ni 23, 2010 hian Central YMA Platinum Jubilee Football Tournamnet chu khelh tan a ni dawn bawk a. April ni 24, Inrinni chawhnu dar 1:00 hian Ramhlun
Sports Complex-ah Chanmari Branch leh Zemabawk Airfield Branch te an inkhel ang.
Chanmari veng mipui zawng zawngte chu Branch YMA Basketball Team te tawiawm turin April ni 23 hian Zarkawt Recreation Centre pan tur a ni a, hemi ni hian kawr var hak vek tur a ni a. April ni 24 ah Football Team te awiawm turin Ramhlun Sports Complex-ah kal bawk tur a ni

CENTRAL YMA VICE PRESIDENT THAR PU JH ZOREMTHANGA

April ni 15, Ningani a CEC thukhawm chuan Central YMA Vice President atan Pu J.H. Zoremthanga an thlang.
Central YMA Vice President tanglai Pu C. Zoramliana chu vanduaithlak taka a boral tak avangin a hmunawl luah turin Central YMA Executive Committee chuan April ni 15 khan Central YMA Hall, Tuikhuahtlangah inthlanna hi buatsaihin Pu J.H. Zoremthanga hi thlan tlin a ni a. Vice President thar Pu J.H. Zoremthanga hi Central YMA President kal chhuak ta kha a ni. He meeting-ah hian thu pawimawh engngemaw zat rel a ni bawk.

ZORUN CULTURAL CLUB A DING TA

March 21, 2010 (Pathianni) chhun dar 12:07 khan Chanmari veng chhunga Culture-a tui mi, thianzaho te chuan Zorun Cultural Club-an din a, Senior Adviser-ah Pu Laldinpuia Sailo ruatin hetiang hian hruaitu an inruat nghal.

President : Pu Lalzuiliana
Vice President : Pu William MS. Dawngliana
Secretary : Tv. Lalropuia
Asst. Secretary: Pu F. Lalngaihawma
Treasurer : Nl. Lalropuii
Fin. Secretary : Tv. H. Thantluanga

Member form hi Rs. 10/- man a ni a Pu William-a dawrah naktuk atangin lak chhuah theih a ni e.

SUNNA

Lalenkawli (34), Sec III hi Pu K. Khualkunga leh Pi Rualchhingi fa panga zinga a upa ber dawttu niin ni 24.12.1976 khan Lamzawlah a piang a. Kum 1997 khan Lalnunenga nen inneiin fa pali- mipa 2 leh hmeichhia 2 an nei a.

Kumin March ni 20 atang khan insawisel tanin April ni 5 khan kawthalo, luak leh khawsik vangin Civil Hospital-ah dah luh a ni a. A natnain zual lam panin April ni 11, Pathianni zing dar 5:00 khan thluaka khawsik lut vangin chatuan ram min lo pansan ta a ni.

CHANMARIANS IN ROOM THAR LUAH TA

April 10, 2010 (Inrinni) khan Chanmarians Office thar chu luah fel a ni ta. Chanmarians Office hi Hall chung ber, Branch Committee room chhunga awm a ni. A hmun a fianrial thain a nuam hle a, Chanmarians Joint Editor hun rei tak lo ni tawh Pu Jeffrey-a lung a leng ve a ni mahna, BELHCHIAN DAWN LO huang a rawn bitum leh ta chat mai le.

LEIMIN AVANGIN CHHUNGKAW 4 RIAK CHHUAK

March 29, 2010 (Thawhlehni) khan Pi Thaliankimi (L), Sec-I te in, chhungkaw pali luah (Pu Rochungnunga kawmthlang) chu leimin avangin riahchhuahsan a ni. Pi Thaliankimi te kawmthlang hi tunhnai ruahsur avang khan a min a, he in a cheng chhungkaw pali te chu YMA Hall-ah riak lutin zirtawpni khan YMA Hall atangin an insawn chhuak tawh. In luahtute hi Pu Keiaithanga, Pu NK. Kapliansanga, Pu Lallianmawia leh Pu Lalzuithanga ten an ni.

PU VANLALREMA A BORAL

Pu Vanlalrema s/o NK. Thanga (L), Sec-I chu March 1, 2010 khan Pune-ah a boral a, a nupui leh fate pali a kalsan a ni.
Pu Marema hi Vanlalliana te unau zinga a upa ber a ni a, ITI Vengah an indawng a ni. March 2 chhun dar 12 vel Pune atangin rawn thleng tura beisei a ni, a ruang hi an inpui Chanmariah ngah a ni ang a, chumi hnuah ITI Vengah lak thlak a ni ang a, hemi ni hian vui nghal a ni ang.

CHANMARI VENG NAUPANG TUIHAWKIN LEN

March 1, 2010 (Ningani) chawhma dar 10 vel khan Laldinpuia s/o Lalenga, Section-I Chaltlang Road-a Pu Biakthanga te in luah chu Chanmari leh Chaltlang in rina Kawilutah tuihawkin a len a, Chanmari West venga Pu Lalchhandama, Ex - MLA te in bulah chhar a ni. Tlangval tlawmngaiten Civil Hospital-ah an kalpui a, he chanchin buatsaih lai hian biak theih a la ni lo.
Laldinpuia hi Chaltlang Higher Secondary School-ah Class VIII zirlai ni a ni.

THLI, RUAH LEH RIALIN MIZORAM A NUAI

Thlipui, ruah leh rial avangin Mizoramah in 222 chu a chhe vek. Aizawl District-ah in 1171 a chhi a, Kolasib Disrict-ah in 534 chhiain Serchhip Disrict-ah in 508 a chhe bawk.

In chhia hi Mizoram chhungah 3105 a tling a ni. Thlipui thleh leh ruah sur avangin Serchhipah lehh W Phailengah mi pakhat ve ve in nunna an chan tawh a ni.

Chanmari veng chuan kan la tuar nasa lutuk lova, Section I huamchhunga in pakhat, chhungkaw pali (mi 13) luah chu a thlanga lei min vangin luah ngam loh a ni a, YMA Hall ah March 29, 2010 khan an riak lut a ni.

Luikawrah hnawmhnawk a tan nasat avangin kawngpuiah tuihawk a luang nasa a, chu chuan lei leh bawlhhlawh a len chhuak a, hei hi a bul vela mi ten hnatlangin an thianfai thin a ni.