BALHLA nge i duh ANTHURIUM ?

Balhla hi a tuiin a hrisel a, natna hrang hrang enkawlna leh a laka inven nan leh handicraft thlengin a pawimawh em em a ni. India ram hi khawvela balhla tharchhuaktu leh eiraltu lian ber a ni a. Kum tin 16 million tons a thar ziah. India ram tharchhuah hian khawvel ram dang zawng zawng a khum vek a ni. Ram chhunga GDP 2.8% chuang mah a hauh nghe nghe a, mipui maktaduai tel meuh tan eizawnna puitling tak a ni bawk.
Anthurium hi kum khat chhungin kung khatah par panga atanga paruk vel zel a awm thei a, kum khatah chuan Mizoramah Anthurium par, 27,50,000 atanga 33,00,000 zel tharchhuah ni a sawi a ni. Hmun thuma thena hmun khat chauh State dangah thawnchhuah thin a ni. Zo-Anthurium Growers Society te hi India rama Anthurium quality tha ber neitute ni a sawi an ni thin.

MEDIA WORKSHOP NEIH A NI

May 25, thawhlehni chawhma dar 10:30 khan I & PR Auditorium-ah Central YMA leh I & PR Department buatsaih media workshop neih a ni a, khawpui leh thingtlang atangin branch 170 vel an rawl tel thei a ni. Pu Zodinsanga, Hon'ble Minister, I & PR etc. chu khuallian niin Pu JH. Zoremthanga, Vice President, CYMA chu chairman a ni.
Kan Branch aiawhin Tv. Andrew Lalremkima, Joint Editor chu he hun hmang hian a kal.

YMA Platinum Jubilee Football Tournament-ah Armed veng champion

YMA Platinum Jubilee Football Tournament chu tluang taka zawh a ni ta. Team 131 lutin Final-ah Armed veng in 2-0 a Chaltlang hnehin an Champion. Branch tel zawng zawngte hnenah Plastic Chair paruk 6 theuh pek an ni. Quarter Finalist te hnenah Rs. 2,000/- theuh pek an ni a. Semi-Finalist hnenah Rs. 5,000/- ve ve pek an ni. Champion hian Rs. 70,000/-, Trophy, Dekchi lian leh Medal an dawng a. Runner up-in Rs. 40,000-, Trophy, Dekchi lian leh Medal an dawng bawk.

BASKETBALL COURT LUNGREM CHIM HNATLANGIN THIANFAI

May 27th, 2010 (Ningani) chawhma dar 9:30 khan Branch YMA hmalaknain Basketball Court lungrem chim chu vengpum huapin thenfai hnatlang neih a ni. Mi 320 vel thawkchhuakin chawhnu dar 1-ah zawh a ni. Lungrem chimah hian intina emaw, intipalh emaw, intihliam emaw an awm lo. Tui connection pipe 10 vel erawh a chhia a , a siamthat nan hun a duh deuh hlek mai thei. Hnatlangah hian kum lamin bithliah a awm lo va, kum 70 vel mi pawh hmuh tur an awm.

He lai hmun a chim hma ni hnih kalta khan kawng chhak atanga lung a lo tlak zeuh zeuh thu leh hna an thawh that ngam loh thu hnathawkten an sawi. Mi thenkhat chuan court laih a nih hma pawn Y-Road kawng hi a khik tawh thu an sawi bawk.

MAY THLA CHHUNGIN GAS NUMBER SIAM ZAWH HMAN TUM A NI

Chanmari veng tan bika siam gas card number hmanga siam chu peih fel thawkhat a ni ta. Section hruaituten uluk taka an survey-ah consumer card number leh house number inang eng emaw zat hmuhchhuah a ni.
May thla chhung ngeia siam zawh tum a nih vangin hruaitute pawh an tang hle. Chhungkaw khatin card pakhat chauh an hman theih nan Executive Member te leh Section hruaituten intinah lutin card number hi an pe dawn a, hei hian consumber card inhman tawm te, blackers leh connection nei lova gas la thinte chu veng hle tura ngaih a ni.
May 27th 2010 (Ningani) tlai khan YMA Hall-ah VC, YMA OB leh Section OB te chuan gas chungchang an sawiho.

PAVALAI REVIVAL MEET VAWI 5-NA CHANMARI PRESBTERIAN KOHHRANIN THLENG DAWN

Ni 29 - 30 May 2010 hian Chanmari Presbyterian Kohhran chuan Mizoram pum huap Pavalai Revival Meet vawi 5-na a thleng dawn. Thupui "Pathian Thiltihtheihna" I Kor. 4:20. Speaker atan Rev. C. Chanchinmawia a ni ang.

Pavalai Revival Meet hi Kohhran member-te chuan i tawiawm thin ang u.

Y-Road lungrem min nasa

May26th, 2010 (Nilaini) tlai dar 2:15 vel khan nasa takin Y Road, Basketball Court chhak chu ruahsur avangin a min a, hliam an awm lo ni a hriat a ni. Tui connection pipe a chhe nual.

Basketball Cour hi chei that mek a ni a, mihring leng tam thei turin thutna tur te pawh siamin lei laih mek a ni a, hetianga hna kalpui mek a nih laia lungreng a rawn chim ta mai hi a vanduaithlak hle a ni.

Chanmari Branch YMA chuan Y-Road a motor khaltute leh kawnga kalte chu fimkhur turin a chah a ni.

AW, ZAWLKHAWPUI I MAWI CHUANG E

Durtlang leitan atangin Aizawl khawpui Pi Loyd & Pi Kennedy ? ten an thlir

Thlalak hlui hi hi ka enkual nual tawh a, hmani chu he thlalak hi kan enchiang a, kan missionary te kha an rawngbawlna piah lamah lunglenna an nei vein ka ring deuh tlat mai a. Hla phuah mi fate angin thiam lo mah ila, suangtuahna nen an rilrua ni awm hlain ka rawn thai lang ve a ni e. A thluk chu a chhiartute kutah a awm e.

AW, ZAWLKHAWPUI I MAWI CHUANG E

1. Ka thlir ning lo a lang romei zam kara’n,
Zaleng khuai ang lawina Vangkhawpui;
Thlir reng ka nuam, eng dang dawn lo hian,
A tlang leh mual zawngten lung min len e.

Aw Zawlkhawpui i mawi chuang e,
I siran tuangtuah leh vau an vual chi chiai e;
Buannel ram ianga sa tinreng tual lenna hmun,
Thinlaia’n nghilh ni reng i awm dawn si lo.

2. Ka han thlir a, a lang runin sumtual nuam,
Thing lenbuang, maurua an hring nghial e;
Zaleng zawngte hlimten tuan an rel,
Ka nuam e, an ianga ni chhun hman chu.

3. Kan lenna Kawlvalenchham atangin hian e,
Mahten ka dawn thin Vangkhawpawlpui;
Ngaihlai puan ang kan bang thei si lo,
Nghilhloh nan ka hlan nang che Nithangpuan.

BRANCH YMA IN BUNGRAW THAR NEI

Branch YMA in dekchi a neih te hi a rei tawhin a thente hi chu thingpui lum nan takngial pawh a tlak tawh lova, nimin khan Branch property atan Dekchi lian 5 leh a te 1 lei thar a ni. Tin, Pu SK Roy, Section-I te chuan filter tha zet mai Branch YMA min rawn leisak bawk a, hei hi Chanmarians Office-ah dah a ni.

THUTTHLENG DONATE THEIH

Chanmari Branch YMA tan thutthleng DONATE theih a ni a, thutthleng pakhat siamna man hi Rs. 500/- a ni e. Property Sub-Committee Chairman Pu Lalhmangaiha leh Executive Member Pu Lalramliana te hnenah pek theih reng a ni.

Pentikos a lo thleng leh ta

Vawiin May ni 23, 2010 hi Pentikos ni a ni a, kohhran tana special programme a nih angin kohhran hrang hrangte chuan Sunday Schhool naupang leh puitling lamah a hranga siam lovin Biak Inah huhovin hun an hmang.

Thlalak - Hmunawl a tan en nuamah

#Zan thim hi "Sual inlarna" tiin sawi thin mah se, Aizawl chu chhun aiin zanah a mawi tlat si!

#Chanmari Presbyterian Biak In bula Cotton Mills hi tunhma chuan a sang kan ti thei raps. A chhawng chung bera lawnte chu kan intithei hle a ni. A chhan chu a chhawng chung ber hi miin an luah a, dil a ngai thin a, chu chu naupang tan chuan thil nuam a ni hauh lo.
#Tunhma chuan khilai hmunah khian kan Missionary sap ten thingpui huan an siam thin. Tunah erawh Mizoram tan hmun pawimawh tak tak a ni ta.

CHANMARIANS in kum 28 a tling ta!

May ni 11, 2010 (Thawhlehni) khan Chanmarians chuan kum 28 hmel a hmu ve ta.

Kum 28 chhung hian chanchinbu enkawltute hi mi 100 chuang tawhin mi 2 in chatuan ram min pansan tawh. Kum 2007 khan silver jubilee ropui takin lawm a lo ni tawh bawk.

Thahnemngai taka chanchinbu chhiartute, blog tlawh thintu zawng zawngte leh Chanmarians lo enkawl tawhtu zawng zawngte chungah Branch YMA chuan lawmthu a sawi.

Chanmari Vengah CHHIARPUI neih mek a ni

India rampumin kum 10 dana chhiarpui a neih thin chu May ni 15, inrinni khan Mizoramah tan niin Chanmari vengah pawh neih tan nghal a ni. Chhiarpui (census) hi nakum 2011 ah report tihchhuah tur niin hemi atan a thawhkhatna hi May ni 15 atanga June ni 30, 2010 chhunga neih tur a ni a. Chanmari, Chanmari West, Zarkawt, Hunthar, Chawlhhmun leh Rangvamuala te chu bial khat chhungah awmin Chanmari veng bika chhiarpui hna thawktu tur supervisor pakhat leh
enumerator pariat te leh an bial inthen dan:

Supervisor : Pu Lalthantluanga Colney, Sec IV
Enumerators:
Section I - Nl. Lalrinawmi , Sec-I & Pi Vanlalhmuaki, Sec- IV
Section II - Pi Thansangzuali, Laipuitlang & Pu Lalremruata, Sec-II
Section III - Tv. Lalduhawma, Sec-III & Pu David Lalmuankima, Sec-III
Section IV - Pi Vanlalhruaii, Sec-IV & Pu Lalkhawngaiha, Sec-IV

Basketball Court siamthat mek a ni

Chanmari Basketball Court siamthat mek a ni a, a court chhak lama tui luankar chu hnawh a, court zauh nan hman tum niin mihring thut tam theih nan siam mek a ni.

Tuna kan hmuh lai hi Pu C. Thanseia (L) te inbul chu lei laih mek a ni a, helai hmun hi en aiin lung a lo tam a, hnathawkte pawn duh angin hna an thawk tam thei lo ni a hriat a ni.

Gas sem dan ruahmanna thar kalpui mek a ni

Gas card, number hmanga siam tur chu chaktakin hma lak mek zel a ni a, May 15 (Inrinni) khan YMA Hall-ah hming, consumer no., house no., etc. dik leh dik lo en theihin hming list tarchhuah a ni. Ziah luh hmaih emaw, tihsual palh emaw te chuan VC Secretary Pu Lalmalsawma Sailo hnenah zawhfiah theih a ni.

Chhungkaw khatah Consumer Card pakhat chauh hman theih a ni dawn a, consumer card 4/5 nei tan pawh pakhat bak a hman theih dawn loh a. Pakhat aia tam lo hmang an awm chuan house no. atangin awlsam takin a zawn chhuah leh mai thei a, chuvangin veng mipuiten rualkhai zawnga gas kan chan tlan theih nan i tangrual ang u.

Pavalai Sports a nuam bon tops

Kar kalta khan Chanmari Presbyterian Kohhran Pavalaite chuan High Field-ah intihsiakna 5 hmangin Sports ropui tak an nei. He hunah hian Pavalai member an kal thahnem hle a, mi 70 vel an ni a, an nupui fanuten an rawn tawiawm thei bawk.
A kal zawng zawngte hian lawmman an dawng vek emaw ni, naupang pakhat khi chuan Pavalai zingah pawh medal pahnih lai a awrh.

Arama weds Zopuii

Executive Member te pahnih Lalrammawia Rawite leh Nl. H.Zothanpuii te chu May ni 7, zirtawpni khan Chanmari Presbyterian Kohhran Biak Inah an innei.
Chanmari Branch YMA chuan an inneihna hi a lawmpui takzet a, fanau maltluan chawia an damchhung hun hmang turin duhsakna a hlan.

Pi Darrikhumi kan then ta

Pi Darrikhumi (Pi Dari) (96), Sec-II hi kum 1914 khan Pi Darneihthangi (L) leh Pu D. Ronghaka (L) te inkarah Tuidam (Tukkalh) khuaah a piang a, pianpui dang nei lovin fanu mal a ni. Pu Bawka nen inneiin fa 2 - Zoliana leh Pu J. Thangzauva leh tu 14 a nei. Vanduaithlak takin Zoliana hi a nausen laiin a thi. Pi Dari hi nu taima, mi inngaitlawm, midangte sawisel ngai lo, Bible chhiar leh tawngtai peih tak niin a mize thatna hi a tu leh fate tana a thil hnutchhiah ropui tak a ni. A thih thlengin tarmit bun lovin zanah lehkha a chhiar thin. Pi Dari hi buaipui ngaiadamloh a nei ngai lova, tunhnaiah thawhahavang leh a kumte a lo upat tak avangin a chak vak lova May ni 12, 2010 (Nilaini) zing dar 1:15 khan thawhhah avangin chatuan ram min lo pansan ta a ni.

Thlalak - hmunawl hnawhkhah nan

Leitan atanga Aizawl khawipui zana a lan dan.

Telhawng -Mizo pa chawhmeh duhzawng tak a ni, saum nena han bawl phawn buah buah hi chuan ui sa aiin an thlang ngei ang.

Pangpar - Lungrem karah emaw, in bul velah emaw a tam thei hle. In leh a vel a chei a, a par vul lai phei chuan mawi tak a ni.

Chanmari Presbyterian Biak In chung zawna trek eng zuai zuai mai chu ka la fuh hlauh mai!

Rose pawh a mawi hun lai tak a ni e.

ZCC MEMBER THAR LAWMLUHNA HUN HMAN A NI

May ni 4, 2010 (Thawhlehni) zan dar 7:30 khan YMA Hall-ah Zorun Cultural Club member thar mi 34 te chu Zorun Cultural Club President Pu Lalzuiliana'n ropui takin a lawmlut. Pu Zuia chuan, "Mizo hnam lam thangtharte hnena zirtir turin lei rem kan rap mek a, kan hmaah tihtur tam tak a la awm dawn a, tha thlah dul mai lo a, inlungrual taka thawkho turin ke kan pen mek a ni" a ti. He hun hi Branch YMA OB ten an rawn hmanpui bawk.

# Club Logo member ten thla an lakpui.

# Nl. Lalbiakdiki, ZCC member chuan Zonunmawi tih hla thiamtaka sain kalkhawmte hi a awi.
# Member-te an phurin nuam an ti hle.

BRANCH YMA IN BPL SURVEY NEI DAWN

Mizoram sorkarin BPL Survey chungchanga Central YMA thawhpuia a sawm angin Chanmari veng chhungah BPL survey neih a ni dawn a. Survey tur chungchang hi Branch O.B. leh Section O.B. te chuan May ni 8, inrinni khan an thlirho. BPL Survey hi tunkar chhung hian Section hruaituten vengchhung inah kalin an nei dawn a. BPL list-a tel thar tur an awm chuan telh nghal tur a ni ang. Survey list hi May ni 14, zirtawpni aia tlai lovah Branch President Pu Laldinpuia Sailo emaw, Vice President Pu Lalhmangaiha emaw, Asst. Secretary Pu Vanlalruata hnenah emaw thehluh tur a ni. Survey neitute hriat duh tha taka lo hrilh turin Branch YMA chuan mipuite a ngen a ni.

CHANMARI KAWNA WAITING SHED SIAM ZAWH A NI TA

Chanmari VC hmalaknain Chanmari kawn, YMA Information Centre bulah thut hahchawlhna waiting shed siam a ni. He waiting shed hi LAD atanga pawisa hmuh Rs. 66,000/- hmanga siam a ni. Waiting Shed hi a chung rangva leh a chhuat cement-a siam niin thutnaah floor tile hman a ni a. Tile hmanga ceiling siam a nih bakah tlak dal (steel fabrication) siam niin rawng hnawih chhuah vek a ni bawk. He waiting shed-a hman atan Pu Lalzuiliana, Sec-II chuan bawlhhlawh bawm, hmunphiah leh bawlhhlawh ruhna a pe a, hei hi hman nghal a ni. Waiting shed hi siam zawh a nih rualin mipuiten an hlut hle a. Chanmari kawn paltlangtu veng chhung leh veng pawn mi leh inkhawm bang ten an hmang tangkai hle.

CHHIATNI A CHANMARI BRANCH YMA KALPHUNG

YMA kaihhruaina a chhiatni a kan insawngbawl dan hi a inang deuh put a. Amaherawhchu, khua/veng hrang hrangin kalphung kan nei hrang theuh a. Chanmari Branch YMA-in tih dan leh kalphunga neih thenkhat vengchhung mipuite hriat atan han tarlang ta ila:

# Chhiat tawh a YMA information mic-a veng mipuite hriat tura tawngkam hman bik chu "Chanmari veng mipuite lo hriat atan" tiin chhiat tawh bikah bul kan tan thin
# Chhiatni fund hi chhungkawtin a meikhu chhuak atangin Rs. 100/- a khawn thin a ni.
# Chhiatni fund hi hman zawh hunah khawn leh thin a ni.
# Chhiatni fund kan hmanna tlangpui te - Kuang, Kuang tuamna puanvar, Polythene, Thingpui leh hmeh (chhun leh zan telin), Bus hire (vuina thlanmual kalna), Pickup (thlan lai hruaitu) etc. hei bakah chhiattawk chhungkua te chu an mamawh anga tanpui thin a ni bawk.
# Thlanmual kalna Bus hire man hi Rs. 750/- a ni.
# Thlanlai hruaitu Pickup hire-na man hi Rs. 300/- a ni.
# Thlanmual In leh Gate thar chahbi hi YMA Chowkidar in a kawl.
# Thlan laih zawhin thlanmual chahbi hi Mitthi board-a tar emaw mitthi chhung/ thenawm te hnenah emaw hlan thin tur a ni.
# Chanmari Br. YMA member an boralin Rs. 1000/- in ral thin a ni (kumin 2010 atangin Rs. 500 a tihsan a ni). Mitthi lumen senso zat tlangpui Rs. 2,700/- (Bus, pickup etc. telin) a ni.
# Mitthi lumen zana thingpui leh eitur buaipui hi mitthi awmna section hruaitute kutah dah a ni a, a nazawng inrawlhna chi a ni lo.
# Khawhar in lenpui (YMA Night) chhung hian thingpui sem hi khap a ni hranpa lo a. Khawhar chhungte inhuamnaah dah a ni.
# Thlan siam ten hmanrua - bawngtuthlawh, suahdur, tui, brick etc. mahni intum vek tur.
# Mitthi vui (chhun programme) hman zawha ruang thlanmual an panpui hlanin thingpui sem thin a ni.
# Kan thlan laih len zawng hi puitlingah a dung feet 6, a vang feet 2 a ni.
# Hlam zuih hi thla 3 (Ni 90-92 inkar) bituk a ni.
# Chanmari thlanmualah hian Kristian te chauh phum thin a ni.

YMA HALL SAK CHHUNZAWM DAWN

Mizoram Sorkara UD & PA atanga pawisa Rs. 3,88,000/- hmuh hmangin Chanmari YMA hall chu sak chhunzawm tum a ni a. YMA Hall hi mimal, pawl leh sorkarin an hmang tangkai tawh hle a. Chutih rualin Main Gate (chhim lam) la zawh fel loh niin luhka leh tual zawl mumal zawk a siam a la ni lova. Tunah hian sorkar atanga pawisa hmuh hmangin heng la zawh fel loh te hi sak chhunzawm tur a ni.

Tuna Sub Centre in an luah lai (Assam Type) hi thiah a ngaih dawn avangin sak zawh hma hun reilote chhung chu Sub Centre hi Chanmarians office hluiah sawn a ni ang a, Library pawh a remchan dan anga siamrem
a ni ang.

Hemi a nih avang hian Library hi hun reilote chhung chu a chep deuh dawn a, Library hmang tangkaitu mipuite hnenah Branch YMA chuan hriatthiamna a ngen a ni. Sub Centre building chhunga YMA bungruate chu YMA Hall hnuaia Committee Room hluiah sawn a ni ang. Mizoram State Sports Council atanga pawisa Rs. 3,20,000/- hmuh hmangin Chanmari Mini Sports Complex chu chei that tum a ni bawk.