KANG DAMDAWI (JATROPHA)

Kang damdawi, Jatropha Curcas hi a tobul chu Central America niin Brazil, Hondura, India etc. ah te a tual to bawk. Cape Verde variety hi a lar ber a. Lei chhia leh ram ro ngam tak mai, a tang vih nun mai pawh awl tak leh ran pawhin a peh duh loh a nih avangin khawvel hmun hrang hrangah Mizoram ang bawkin Palchawi 'Living hedge' ah an lo hmang nasa ve hle a ni.
A thatnate:
* Kang damdawi chi atanga a hriak lakchhuah hi 31-37% a tling thei a, he a hriak hi diesel engine-ah a khawlte siam danglam ngai chuang lovin diesel nena pawlhin hman theih nghal a ni. Hetia bio-diesel a hman bakah hian lubricating oil-ah te, chhit enah te, sahbawnah te, rannung hlo leh vun natna damdawi chi hrang hrang siam nan te an hmang bawk.

* Tur pai lo chi Mexico variety hi tel ei chi atan leh a her fu pawh ran leh mihring chaw tha tak a ni a. Proteins a pai tam.
* A zung rawh vap hi a al a, chi-ah an hmang thin, kan chi pangngai ai hian taksa tana tha lo a pai tlem zawk.
* A tang leh kungte hi thing tuah leh meihawl atan a hman theih.
* A hnah leh a hnaite hi pem thar damdawiah a tha a, khuai seh damdawiah te a tha bawk. Jatropha hmuna khuai khawi hian khawizu a thar hlawk hle bawk.
* A hnah thingpui anga lumin Malaria damdawiah a tha.
* Mizoram mai ni lo hmun dangah pawh an hmang tangkai hle; naupai lohna atan te, pneumonia, thak, luthak, sciatica, mitliam, kawthuahna, ek nemna, pum na, ulcer leh bawkah te pawh an hmang.

Khawtlang nun siamthat

Khawtlang nun siamthat kawnga pawimawh hmasa ber chu ‘mimal’ te hi kan ni. Khawtlang hruaitute chauh khawtlang siam tha tura kan ngai a nih chuan kan tisual hle ang. Mitinte hian khawtlang nun siamthat kawngah hian mawhphurhna lian tak kan nei theuh a. Khawtlang himna tur tichhe zawng leh mimal zalenna tibawrhbang zawnga che an awm a nih phawt chuan khawtlang hruaitute pun kher lo hian engemaw chen chu tih theih kan nei a ni. ‘Kei chu ka inrawlh ve duh lo, ka buai ka buai peih lo’ tih rilru kan la pu fo a nih chuan veng tana mi tlaktlai lo ber te zingah kan inziak lut nghal thei ang.

Thlamual in wiring zo fel

Chanmari Thlanmual in electric wiring chu June ni 25, 2010 khan zawh fel niin connection pawh tihfel thuai beisei a ni. Electric pawhluhna tur atan hian electric ban pali phun tawh a ni a, pahnih dang phun leh turin hma lak mek a ni. Thlanmual in wiring-na senso zawng zawng hi Pu C. Laltanpuia (Mosia Store), Sec-IV te chhungin an tum a. Wiring-na tura thil tul leh mamawhte Pu Isaak Hmar (Lighthouse Electronics) in hlep awm lovin a lo pe bawk.

Mi inphalte chungah Chanmari Branch YMA chuan lawmthu a sawi.

Duhawma weds J-i

June ni 23, 2010 (Nilaini) khan Lalduhawma leh J. Zosangzuali te chu Chanmari Presbyterian Kohhran Biak Inah an innei.
Lalduhawma hi Chanmari Branch YMA-ah Fin. Secretary leh Documentation Sub-Committee-ah Chairman ni mek a ni. J. Lalsangzuali hi NPSS, Chanmari-ah Intermediate Department zirtirtu a a ni mek bawk.
Chanmari Branch YMA chuan an inneihna hi a lawmpui takzet a ni.

YMA CHHANG SPORTS A HLAWHTLING

June ni 15, 2010 thawhlehni chhuna High Field a YMA Day Platinum Jubilee a YMA chhang puala Sports neihah Section hrang hrang atangin YMA chhang member 250 chuang an thawk chhuak. Intihsiaknaah hian Secion-II chu Pakhatna niin Section-I chu pahnihna an ni.

JUBILEE ZANAH SECTION TEN HMUHNAWM AN ENTIR

Pu Jonte-a hova Sepoy Dinga ten World Cup hla an han sa zet chu kalkhawmten awmngaihna an hre lo a ni ber e. Hnaptui leh mittui nen, kutbeng leh ri thei chitin reng nen YMA Hall a nghin in a nghing a ni ber e!!

Cheraw intihsiaka lawmman PAKHATNA dawngtu Section -I nulate

Mock Band a hlawhtling hle, talent nei tha tak tak an rawn inpho chhuak e.

SAMUELA weds MAMI

Samuel Lalrinzuala Sailo s/o Laldinpuia Sailo leh Lalropari d/o Lalrozuala, Mission veng te chu June ni 18, zirtawpni khan Chanmari Presbyterian Kohhran Hall-ah an innei.

WORLD CUP 2010 INRINSIAK

SMS VAWI 1-IN RS. 100 HLAWH RAWH!

1. Portugal leh Brazil chak zawk

2. Chile leh Spain inkhela goal lut zat.

Chhanna hi ni June ni 24, 2010 (Ningani) hmain 9436350210 -ah thawn ta che.

Greece leh S. Koria chhang dik mi tam tak zingah a vannei ber chu Tv. Romalsawma, Section-IV a ni e. Lawmman hi inrinni-ah Chanmarians office-ah rawn lam ta che.

YMA DAY VAWI 75-NA PLATINUM JUBILEE ROPUI TAKIN LAWM

June ni 15 (Thawhlehni) zan dar 7:30 khan YMA Hall-ah YMA Day vawi 75-na Platinum Jubilee ropui takin lawmna neih a ni. Branch President Pu Laldinpuia Sailo Jubilee lawmna hun hi a kaihruai. Tanna hun Pu JH. Ramnghinglova, Adviser, CBYMA in a hmang a, Pu R. Sangliana, Executive Member-in 'Khawtlang nun siamthat' chungchang a sawi.

# Pu Lalhrangluaia, Ex. President, CBYMA chuan Jubilee Monument a hawng. # Jewel Lalthasangzeli Fanai, HSSLC kum 2010 result chhuaka Mizoram puma Commerce Stream a pakhatna chawimawina certificate Pu Thanchhuma Mualchin, Adviser, CBYMA in a hlan

# Cheraw, Quiz, Mock Band leh attendance hmangin Section intihsiakna neih a ni. Kalkhawmte mi leh beng a lai hle.

# YMA Day hi veng thalai ten an hlut a, Hall a leng lo khawp an kal.

RS. 300/- MAN NAN SMS VAWI 1 A TAWK

Zawhna 1 leh 2 atang hian Rs. 100/- ve ve a man theih a, zawhna pathumna Bonus atang hian hian Rs.300/- a man theih ang. Chhanna inang a awm chuan thum vawr a ni ang. Chhanna hi MOBILE NO. 9436350210-ah ni 17. 6.2010 (Ningani) chhungin chhan tur a ni.

Tun tuma kan inrinsiak turte chu :

1.Ghana leh Australia tu nge chak zawk ang?
2.Cameroon leh Denmark tu nge chak zawk ang?
3.Bonus - Khawi ram nge champion a i rin?

LAND RECORD SURVEY NEIH A NI DAWN

Central YMA leh Revenue Department tangkawpina Mizoram chhunga Family Land Record neih tura an ruahman chu Chanmari Branch YMA chuan June thla chhunga peih fel a nih theih nan ruahmanna a kalpui mek

Branch hruaitute leh Section OB ten veng chhungah survey hi an nei dawn a. He Land Record Survey-ah hian LSC ngaih pawimawh a nih vangin survey tute an lo kal huna en theih mai tura lo chhawpchhuak turin veng mipuite ngen an ni.

Central YMA leh Revenue Department buatsaih he Survey-a tel lo chhungkua Chanmari vengah an awm a nih chuan an in leh ram te chu hmun ruak anga ngaih tur a ni. Chanmari vengah chuan YMA Day zawh lamah Survey hi neih tur a ni a.

Pi Khuanghnuni kan then ta

Pi Khuanghnuni (85), Sec-II hi kum 1926 khan Khawhaiah Pu Sanga leh Pi Khuangthangi te inkarah a lo piang a. Kum 1946 khan Pu Sanghleia nen inneiin fa 9 an nei. Kum 2007 khan a pasal hian a boralsan. Pi Khuanghnuni hi nu zaidam leh fate enkawl thiam tak a ni. A pasal thih hnu hian a chak lo ve tial tial a. Hnungzang na a nei a. March ni 30,2010 khan Presbyterian Hospital, Durtlang-ah admit a ni. May ni 12 khan Presbyterian Hospital, Durtlangah admit leh a ni a. June ni 8 zan atangin khawsik a nei tan a. Theihtawpa enkawl niin a khawsik a sang zel a, June ni 9, nilaini zan dar 11:30 khan chatuan ram min lo pansan ta a ni.

Chanmari Branch YMA chuan khawhar chhungte a tuarpui takzet a ni.

YMA DAY HMAN DAN TUR PROGRAMME

June ni 15, 2010 (Thawhlehni) zan dar 7 hian YMA Day vawi 75-na (Platinum Jubilee) ropui takin Chanmari YMA Hall-ah lawm a ni dawn. June ni 14, 2010 (Thawhtanni) zan dar 9 hian Basketball Court-ah Jubilee Mei det a ni ang a. June ni 15 zingkarah Chanmari kawn leh a chhehvel tifaia vengpum huap hnatlang neih tur a ni bawk. Hnatlanga thawkchhuak ve thei lo te pawn theih ang angin mahni in leh a vel tifai turin ngen an ni. Chawhma dar 9 atangin YMA Chhang pualin intihhlimna High Field- ah neih a ni bawk ang.

A hun :
June ni 15, 2010 (Thawhlehni) zan dar 7
A hmun :
Chanmari YMA Hall
Chairman :
Pu Laldinpuia Sailo, President, CBYMA
Hunserh :
Pu JH. Ramnghinglova, Adviser, CBYMA
Chawimawina :
Nl. Jewel Lalthasangzeli Fanai, Topper HSSLC (Commerce)
Chawimawina hlantu:
Pu Thanchhuma Mualchin, Adviser, CBYMA
Monument hawngtu:
Pu Lalhrangluaia, Ex-President, CBYMA
Thusawi :
Pu R. Sangliana, Executive Member
Setion intihsiakna:
1. Cheraw (kantluang)2. Mock Band 3. Quiz 4. Attendance

Y-ROAD KAWNG LAIH TAN MEK A NI

(Rawng eng hi kawng siam zawh tawh a ni a, feiin a kawhna zawn chhaklam zawng hi la siam loh a ni.)

Y-Road kawng Pu Ngurawia te kawmthlang atangin laih chhunzawm mek a ni a, tunlaiin ruah a sur nasat avangin ruahman angin hna hi chak taka kalpui a harsa hle rih a ni. Laipuitlang thleng tur hian MP (Lok Shaba) fund atangin Rs. 5,00,000 hmuh niin 1st installment-ah Rs. 2,50,000 lak fel tawh a ni. Y-Road kawng lehlam hi nikum khan zawh a lo ni tawh a, hei hi Contractor hnuaia thawh a ni a, tun tumah erawh Y-Road Committee ten an thawk dawn a ni.

CHANMARIANS CRICKET CLUB AN CHAMPION

Ni 1.6.2010 (Thawhlehni) a Zarkawt Recreation Centre-a Loards Cricket Club, Zarkawt buatsaih Cricket Night Tournament neih zawh takah Chanmarians Cricket Club an CHAMPION. Champion hian Rs. 8,000/-, Pahnihnain Rs. 5,000/-leh Semif-finalist ten cheng Rs. 1,000 theuh an dawng bawk. Tournament-ah hian cluh 40 an tel. Chanmarians Cricket Club te hi team 2 Chanmarians - 7 (Junior tem) leh Chanmarians- 9 (senior team) ah in then a ni a, Chanmarians Cricket team hnihte hi final-ah intumin Chanmarians - 9 hian chakna an chang ta a ni. He tournament-ah hian Mizoram aiawhturte pawh an rawn tel thei a, mahse Chanmarians - 7 te hian awlsam tein an lo hneh a ni.

Chanmarians Cricket Club hi nikuma din kha a ni a, a neitu hi Pu R. Zatawna, Section-II a ni. Club-ah hian member mi 19 awmin veng dang atangin mi 2 an rawn tel bawk. Club hi a kaltluang hle a, a din tirh atangin tournament lianah vawi hnih a tel tawh a, nikum khan 2nd Division-ah Champion-in 1st Division-ah an kai nghal a ni. Chanmarians tihmingthatute chu a hnuaia mite hi an ni e:

Chanmarians - 9 : Tv. Victor Ramchhana, Tv. Reuben Lalchhandama, Tv. Lalfakzuala Tv. Zoduhsanga, Tv. Lalremtluanga, Tv. Raju, Tv. Zothansanga leh Tv. Lalthantluanga (Tatoa).

Chanmarians - 7 : Tv. Tetea, Tv. Zoremliana, Tv. Lalhmingliana, Tv. Tluangtea, Tv. Malsawma, Tv. Ruata, Tv. Malsawmdawngkima leh Tv. Zuia te an ni.

PUIA weds CHHUNGI

Ni 3.6.2010 (Ningani) chawhnu dar 1 khan Chanmari Presbyterian Kohhran Biak Inah Lalhmachhuana s/o Sapmawithanga, Section II leh Lianchhungi d/o Taimama, Electric Veng te chu an innei.
Lalhmachhuana hi Chanmari Branch YMA-a Cultural Sub-Committee member leh Zorun Cultural Club, Chanmari-a member ni lai a ni.
Branch YMA chuan an inneihna hi a lawmpui takzet a ni.