CHHIATNI FUND KHAWN A NI DAWN

Chanmari Branch YMA chuan ni 18.9.2010 a tih fel hman turin hian Chanmari vengchhungah Chhiatni Fund Rs. 100/-aia tlem lovin a khawn leh dawn a. A khawn hna hi Section hruaituten an buaipui ang.

PU LALFAKZUALA KAN THEN TA

Pu Lalfakzuala (45) hi Pu C. Chalkunga (L) leh Pi F. Muankimi (L) te fa 4 zinga a naupang ber dawttu niin kum 1965 February ni 27 khan Lungleiah a piang a, a pianpui unaute chu:-

1.Pu C.Lalnunmawia H/o Lalrinthangi, Chanmari
2.Pi Sanghmingliani W/o K.Zohranga (L), Ramhlun South
3.Robert Lalhmingthanga W/o Rebecca Zosangzeli, Chanmari

Kum 1987 April ni 14 khan Zathiangi, Thakthing veng nen innei in fa 3 hmeichhia pakhat leh mipa pahnih an nei. Amah hi mi dangte tana ui nei lo leh thilphal tak a ni. Rual kawm thiam tak niin thenrual pawh a ngah hle. A phak ang tawk tawkin a lawina kohhran (UPC) ah a inhmang thin mi a ni. Naupang tê in sorkar hnaah a lut a. Sorkar hna kum 25 a thawh hnuah Grade – I Driver a nih mek laiin Voluntary pension in R.D Deptt atangin a chhuak.

August ni 20 khan internal bleeding avangin pawn a chhuak peih lo a, August ni 20 zanah Aizawl Civil Hospital-ah admit a ni a, zual lam pan zelin August ni 21 (Inrinni) chawhma dar 11:50 khan chatuan ram min lo pansan ta a ni.

PLATINUM JUBILEE VANAPA HALL-AH ROPUI TAKIN LAWM A NI

YMA Platinum Jubilee lawmna chu August ni 14 chawhma dar 11 khan Vanapa Hall-ah ropui taka neih a ni a. Chanmari Branch YMA atangin mi 21 (Executive Member leh Usher) an tel. He hunah hian Central YMA Office Bearer lo ni tawh mi 96 chawimawina neih a ni a, Chanmari veng atangin Pu Thandanga Sec-IV, Pu K. Thangzuala Sec-III leh Pu C. Valbuanga, Sec-I ten chawimawina certificate an dawng a ni.

PU DAVID LALRINSANGA KAN THEN TA

David Lalrinsanga, Sec-II hi Pu T. Thankhuma leh Pi Lalengvari te fa pali zinga a upa ber leh mipa awmchhun niin kum 1977 October ni 19 khan a pain Missionary hna a thawhna hmun Moirang, Manipur-ah a lo piang a, an unau chu hengte hi an ni:

1. David Lalrinsanga h/o Lallianpuii Chanmari
2. Lalthanpari w/o Lalrinmawia Luangmual
3. Ruth Lalramengi w/o Lallawmzuala Mission Vengthlang
4. Melory Lalawmpuii Chanmari

Zirna lam: Nursery hi Sunflower School, Chanmari-ah kalin Class I - X hi a pa thawhna Loktak Christian Model (LCM) School, Moirang-ah a kal a, he School atang hian Matric Ist Division-ah pass-in Loktak Christian Model School atanga Matric Ist Division-a pass hmasa ber a ni. Matric a pass hnu hian Hrangbana College atangin kum 2006 khan B.Com 2nd Divison-ah a pass a. Pune, Symbiosis College-ah M.Com zir lehin IInd Division-ah a pass. M.Com a zawh hnu hian hmun hrang hrangah hna thawkin November 2003 khan DOEACC-ah Accountant hna a zawm a, a thih ni thlengin he hna hi a chelh a ni.

Kumin March ni 13 khan Lallianpuii (Maliani) d/o Zohminga, Aizawl Venglai nen inneiin May ni 16 khan Durtlang Presbyterian Hospital-ah fapa (Lalrinpuia) an nei.

Kohhran leh Khawtlangah: David Lalrinsanga hi pa fel leh kawm nuam, rilru tha tak a ni a, kohhran leh khawtlangah pawh a theih ang tawka inhmang thin a ni. Chanmari Presbyterian Kohhranah Naupang Sunday School zirtirtu nitawhin, YMA Chanchinbu Chanmarians Editorial Board-ah kum 1999, 2005-2007 thleng a awm a, kum 2006-2007 chhung khan Joint Editor a ni nghe nghe. YMA-ah pawh nihna hrang hrang chelhin kum 1997 khan Section-II YMA Committee Member niin hemi hnu hian Section OB post hrang hrang Secretary, Asst. Secretary, Treasurer leh Finance Secretary te kum 2008 thleng khan a chelh a ni.

A nat dan: Kumin July ni 10 khan insawiselna a neih avangin Doctor hnenah inentirin thin lian leh mîtliam a nei tih hriat a ni a, damdawite chawhin in lamah enkawl a ni. |hat lam a pan theih tak loh avangin July ni 24 khan New Life Hospital-ah admit a ni a, Doctor leh Nurse ten theihtawp chhuahin an enkawl a, amaherawhchu a taksa a lo that tawh loh avangin awmzia a nei meuh tawh lova. August ni 11 chawhnu lam khan a that loh zual deuh avangin oxygen pek a ni a, heta tang hian that lam pan aiin hniam lam pan hret hretin August ni 12 (Ningani) zan dar 7:15 khan chatuan ram min lo pansan ta a ni.

HAV. LUNGMUANA KAN THEN TA

Ex. Hav. Lungmuana (69), Sec-I hi kum 1941 khan a lo piang a. Kum 1976 khan Pi Lalthlangliani, Sihphir nen inneiin fa 5 an nei. Kum 1961 khan Assam Regt. 3rd Battalion-ah tangin hockey leh football players tha tak a ni. India leh Pakistan indo tum khan a tel a ni. Kum 1980 khan Company Holder Major in a pension. Amah hi thenrual ngaina, thilphal, mi pawisawi hreh leh tlawmngai tak a ni. Kum 2009 December thla khan khuh reh thei lo avangin entir a ni a, chaw kawng cancer hmuhchhuah a ni. Greenwood Hospital-ah admit a ni a. Chemo vawi 4 khai niin July ni 15 khan a pum na lehin August ni 4 zing dar 5:15 khan chatuan ram min lo pansan ta a ni.

SHOOTING CHAMPIONSHIP ZAWH FEL A NI TA

Central YMA leh Mizoram Rifle Association te buatsaih, 10 metre Air Rifle Shooting Championship August ni 3-6 a Kulikawn Indoor Stadium-a neihah Chanmari Branch YMA atangin heng mite hi an tel.

Senior men : Pu K. Lalmawizuala, Sec-I leh Pu Rochamliana Sec-II
Boys under 21 : John RamhnehzovaSec-II leh Saingura Sailo Sec-II
Women : Nl. C. Vanlalnghaki, Sec-II leh Nl. H. Nuchhungi Sec-I

He Championship-ah hian Branch YMA 71 atangin mi 330 an tel. Junior ah mi 330 awmin Senior-ah mi 130 an tel. Hmeichhia 94 an tel bawk a ni. Ni 5 chhungin he intihsiakna hi zawh a ni. He intihsiakna hi Catch Them Young, talent search leh a game vawrh lar nana buatsaih a ni.

Junior top shooter - James VL. Hmangaihzuala, Khatla points 114.
Hmeichhia top shooter - Feline Lalrinfeli Hrahsel, Electric veng points 145. (over all top shooter)
Senior category - VL. Chhanhima Hrahsel, Damveng points 120
Most Promosing Shooter - Agnes VL. Neihthangi, Khatla points 143

Branch YMA lawmman dawngtute:
1. Khatla Branch - 615 points
2. Electric Branch - 546 points
3. Zarkawt Branch - 420 points

BAKETBALL COURT SIAMTHAT MEK A NI

Baketball Court leiminin a tihchhiat chu siamthat mek a ni a, tun laiin ruah a tlak tam deuh avangin duh angin hna a thawh chak theih loh.

MOTOR PARK KHAP

YMA Hall kawt, bazar bul kawng sir hi YMA ram a nih angin YMA Hall Hall hmangtu leh Bazar a kalte tan chauh motor hun theih a ni a. Hall hmangtu nilo leh bazar dawrtu nilo sorkar motor emaw, public carrier emaw, veng pawn leh vengchhung mimal tan he hmunah hian
motor dah khap tlat a ni. YMA Hall Parking Area hi man chawia motor park-na hmun a ni lova, dan anga motor dahtuten parking fee an chawi a ngai lovang.

QUEEN'S BATON-IN AIZAWL LO THLENG TA

Chanmari Branch YMA President Pu Laldinpuia Sailo chu Commonwealth Games-2010 meichher kengtu (Queen's Baton Relay) thlanchhuah zingah a tel.

Commonwealth Games vawi 19 na tur Queen's Baton (Meichher), khawvel hmun hranga kalpui mek chuan Mizoram, Lengpui Airport July ni 30 chawhnu dar 2 khan a rawn thleng. Commonwealth Games vawi 19-na atana Queen’s Baton Relay zirtawpni chawhnu dar 3:45 khan Relay tanna hmun tur Bawngkawn Junction a lo thleng a. Dar 5:10PM ah Vanapa Hall-ah Mizoram Chief Minister Pu Lal Thanhawla chuan lo dawngin a puala inkhawm neihpui nghal a ni. He Meichher hian India ram a awm chhung chuan India hnam puanzar rawng angin eng a chhuah a, a bulhnaia kalte leh mipui lo hmuaktute thla a la vek thei a, hei hi Commonwealth record ah an hmang tel thei dawn a ni.