Saturday, June 25, 2011

LEM INZIAHSIAK RESULT


Chanmari veng naupang kum 12 chin hnuailam tana ‘Kang mei laka fimkhur tura inzirtirna lam
hawi’’ Chanmarians-in lem inziahsiak a buasaihah Dimel Lalngaihzuali (11) d/o Lalrizami, Sec-I, Mount Carmel a zirlai chu ziak thiam bera thlan a ni.

FILM SHOOTING TAN A NI


Central YMA leh Fire & Emergency Service ten an buatsaih kangmei laka fimkhur
chungchang inzirtirna film "Kangmei kara hmangaihna" chu June ni 22, nilaini zan khan shooting neih tan a ni.
Shooting hi September thlaa Central YMA a thehluh hman tura ruahman ruahman a ni.

Sunday, June 19, 2011

ZOHMINGLIANA (TETEA) KAN THEN TA

Tv. Zohmingliana (Tetea) (46), Sec-I, Presbyterian Kohhran hi Pu RD. Dennis-a (L) leh Pi Thankhumi te fa 8 zinga 6 na niin kum 1964 khan a lo piang a, 2002-ah Lalparmawii nen inneiin fapa pakhat an nei. Amah hi mi pawisawi lo, fiamthu thiam leh thian ngaina tak a ni.

Infiamna a ngainain football leh badminton a thiam hle. Kum 1982 School Games-ah Mizoram aiawhin UP-ah football a lo zu khel tawh a ni. Rawngbawlna lamah pawh a tuiin a inpe zo hle a, TNT-ah te rawngbawlin a lo khawsa tawh thin a ni.

Kum 2010 kumtawp lam khan thin thalo avangin Newlife Hospital-ah enkawl niin Civil Hospital-ah tum hnih ngawt enkawl a ni bawk a. A hnuah in lamah enkawl chhunzawm a ni. Tun hnai khan Care Hospital-ah enkawl a ni leh a. A thin \halo hi a lo nasat tawh avangin June ni 16, ningani khan chatuan ram min lo pansan ta a ni.

YMA DAY ROPUI TAKA LAWM A NI


Chanmari Branch YMA chuan YMA Day pualin June ni 14, thawhlehni khan Hermon Children Home, Durtlang chu ruai theh sakin zanah programme hlimawm tak a hmanpui a. Ruai hi Children Home-a naupang enkawl mek mi 120 leh thawktu mi 5 ten an theh a ni. He hunah hian Durtlang Leitan YMA Branch OB te sawm an nih bakah Chanmari Branch YMA OB ten ruai hi an kilpui bawk.

Zan lamah Hermon Children Home Hall-ah Programme hlimawm tak hmanpui niin Chanmari Branch hnuaia Sub-Committee hrang hrang eh Market Committee member thahnem tak ten an telpui a.





Branch YMA chuan YMA Day-ah hian \anpui nan CADS, Central YMA (Ruihhlo ngaite Camping pual) leh Krista Pasal\ha Bethel Camping Centre, Chawnpui hnenah thilpek pein Executive Member ten an awmna hmunah kalin an pe a ni.

YMA DAY LAWM NAN YMA CHHANG INTIHHLIMNA BUATSAIH A NI




YMA Day June ni 15, nilainiah YMA Chhang pualin Govt. Mizo High Field-ah intihhlimna neih a ni a. He hun hi Sports Sub-Committee ten buaipuiin intihhlimna chi hrang hrang - Football, LTP, Tug of War, Sack Race, Throw Ball, NeedleRace, Apra Insual, Musical Chair, Spoon Race, 100 & 200 Meter Race leh Ketaminu Intlansiakah te intihhlimna neih a ni. Hemi ni hian naupang 300 chuang kalin nu leh paten an tawiawm bawk a. Sports Sub-Committee ten kal zawng zawngte tan squash leh artui semin naupang te hnenah sketch pen an pe theuh bawk.

He hunah hian Branch Executive leh Sports Sub Committee ten Football-ah Exhibition Match an khela an inhnehtawk a ni.

Saturday, June 11, 2011

LOCAL FOOTBALL TOURNAMENT ZAWH A NI


Pu R. Lalhmachhuana te chhung, Sec- III in an fanu boralta hriatreng nana an buatsaih 1st Vanlalrohlui Memorial Football Running Trophy 2011, June ni 4 atanga tan chu June ni 6, thawhtanni khan AR Lammualah zawh a ni ta.

Final-ah hian Auss FC leh Khiiitah FC te intumin Auss FC hi 1-0 in an chak. Auss FC hian trophy leh Rs. 3,000 an dawng a, Khiiitah FC hian trophy leh Rs. 1,500 an dawng bawk.

Best player-ah Tv. Lalthantluanga (Tataw-a), Auss FC chu thlan a ni a, Trophy leh Rs. 500 a dawng a. Best Goal Keeper- ah Tv. Lalawmpuia (Op-a), Auss FC thlan niin Trophy leh Rs. 500 a dawng. He intihsiaka vawi 5 pet goal-tu Tv. Rochhingpuia (Buaisuh FC) chu Top Scorer an thlan niin Trophy leh Rs. 500 a dawng bawk

Tuesday, June 07, 2011

RUIHHLO HAL RAL

May ni 30, thawhtanni zing khan Pu Lal Thanhawla, Chief Minister chuan CADS te ruihhlo man a halral. Chief Minister chuan YMA ten ruihhlo do kawngah hma an lakna chu tha a tih thute, an hnathawh hi Pathianin hmanruaah a hmang a ni a ti. CADS te hnathawh chu ropui a tih
thu sawiin thahnemngai taka hna an thawh laia an mi mante an tang reilo lutuk thin chuan a tihnual ang tih a hlauh thu sawiin rei zawk an tan theih dan ngaihtuah a tul a ni a ti.

YMA te chu Ramngaw leh Nungchate humhalh kawnga hma la zel tura a duh thute, Mizoram leilungfa ni lo ten hnathawh tur an hmuh reng laia a ram neituten hna kan thawk tlem nia a hriatthu te, a ram leilungfaten hna thawh hreh lovin, hna engpawh kan thawh chuan ramdang mi leh hnamdang mite hi an awm reng peih a a rin loh thu leh Mizoram hian kan thlahnih ei tur pawh kan thar chhuak lova, phai lam atanga buhfai a lo thlen that loh chuan puhmawh tur kan zawng nghal zel a ni a ti bawk.

hief Minister tawiawmtu a nupui Pi Lal Riliani chuan CADS tanpui nan Rs. 55,000/- a hlan bawk. Chief Minister-in Ruihhlo a halralte hi Parvon/Proxyvon - 10894 Capsules, No 4 - 2 Hawng 108 Cans 4 caps, Ganja 2kgs 600 grms, Nitrosun - 44 Tab leh Alprozelum - 190 tabs te a ni a, a hlutna hi Rs. 7,86,450 a ni. CADS hi nikum May 29 a din tan kha a ni a, kumkhat a tling chiah a, kumkhat chhunga an ruihhlo man zawng zawng hi Rs. 184,85,892/- man a tling tawh a ni.

THLANMUAL CHOWKIDAR HNA DIL THEIH


Chanmari Thlanmual enkawltu tur Thlanmual Chowkidar hna dil theih a ni a, thla tin lawmman Rs.1000 pek a ni ang.

Mahni Bio-data telin dilna hi ziakin Chanmari Branch YMA Office Assistant hnenah June ni 10, ningani aia tlai lovah thehluh tur a ni.

June ni 11, Zirtawpni chhun dar 12-ah YMA Hall-ah interview neih tur a ni ang a. Veng pawn atanga diltu chuan an awmna Branch YMA lehkha thil tel a ngai.