KUM 2010 BRANCH YMA OFFICE BEARERS

KUM 2010 OFFICE BEARERS THLANG DAWN

Ni 29.12.2009 (Thawhlehni) zan dar 6:30 hian kum 2010 Branch Office Bearers thlanna YMA Hall-ah neih a ni ang. Inthlan hi Post by Post a thlan tur a ni dawn a. Floor nomination mi pahnih, kalkhawm ten an rawt thei bawk ang. YMA member tawh phawt chu inthlannaah hian kal vek turin ngen an ni.

BRANCH YMA NOMINATION LIST 2010:

1. Pu A. Lallungmuana 2. Pu C. Laldinliana 3. Pu C. Lalnunzira
4. Pu F. Lalthlamuana 5. Pu Lalfakawma 6. Pu R. Lalhmachhuana
7. Pu Lalhmangaiha 8. Pu Lalremruata Sailo 9. Pu Lalrinthanga
10. Pu Lalsawmkima 11. Pu R.Lalrinkima 12. Pu Vanlalruata
13. Tv. Lalengliana 14. Tv. C. Chungliantluanga 15. Tv. H. Thantluanga
16. Tv. Jimmy Lalramthara 17. Tv. Lalduhawma 18. Tv. Zoramthara
19. Pu William MS. Dawngliana

BRANCH YMA SUM AUDIT FEL

Branch leh Section sum audit fel a ni a, auditors a ruatten uluk leh tha takin an endik. Kumin chhung hian YMA Hall hman man atangin Rs. 2,42,650 hmuh a ni. Branch YMA chuan hetiang dinhmun a chang thei hi veng mipute chungah lawmthu a sawi.

Kum 2009 chhunga Branch sum dinhmun khaikhawmna:

KUMIN 2009 CHHUNGA KAN SUN TE

Kumin January thla atanga 26.12.2009 (Inrinni) thleng hian Chanmari vengah mitthi 20 (mipa-10 leh hmeichhia - 10) ten chatuan ram min lo pansan ta. Ruang chhuak mi 6 awmin Ruang khual mi 2 an awm.

PU C. LALTHANPUIA KAN THEN TA

Pu C. Lalthanpuia (36), Sec-III hi Pi Laithuami leh Pu Pakawlha (L) fa 7 zinga naupang ber niin ni 2.3.1973 khan Champhaiah a lo piang a. Pi Lalhmachhuani nen kum 1999 ah innei in fanu 2 an nei. Pu Lalthanpuia hi mi tlawmngai, mi dangte tana inpe, thenrual pawl thiam, thian te tana ui nei ngai lo, titi thiam leh fiamthu duh mi tak a ni.

Eizawnna kawngah chuan Central Excise Range (Customs) Aizawlah Sepoy hna a chelh mek. Dicipline nei tha tak, hotute thuawi leh mi rinawm tak a ni. Ni 24.12.2009 (Ningani) chhun dar 12:30 khan pumpui na avangin Vaivenga Memorial Hospital-ah chatuan ram min lo pansan ta a ni.

KRISMAS LEH KUMTHAR CHIBAI

Chanmarians Blog min hlutpui a, thahnemngai taka min tlawksaktu zawng zawng chungah..

THLANMUAL HNATLANG

Ni 19.12.2009 (Inrinni) zing kar khan Branch YMA hmalaknain Thlanmual hnatlang neih a ni a, mi 300 chuang an thawk chhuak.

ADVANCE CHRISTMAS

Ni 12.12.2009 (Inrinni) khan kumin 2009 chhunga Chanmarians Editorial Board chuan Chanmarians Office-ah Advance Christmas hmangin zanriah an kilho.

H. Lalhlimpuii (Mapuii) kan then ta

H. Lalhlimpuii (Mapuii) (45), Section-III hi Pu J. Rohmingliana leh K. Rochhumi te fa panga zinga a naupang ber dawttu niin ni 20.8.1964 ah Lungleiah a lo piang a. A pianpui unaute , an upat dan indawtin:

1. Hmardingliani Hmar w/o Lalrinzuala
2. J. Laltanpuia h/o Lalrammawii
3. Varparhi w/o Lalrinmawia
4. Lalbiakdiki

Zirna lamah chuan Lady Keane College, Shillong-ah PU zovin Kolkata-ah Steno a zir leh a. Kum 1988 khan Lalhminghlua nen an innei. Kum 1994 khan Chanmari vengah an khawsa tan a ni.

Amah hi Pathiana innghat tlat mi leh thilpek ngai pawimawh em em thin a ni. Kum 2009 January thla khan chhul cancer a nei a ni tih hriatchhuah a ni a. January 2009 khan Mumbai-ah inenkawl turin an kal a, May leh August 2009 ah in checkup turin an kal leh a. In lamah theihtawp chhuaha enkawl a nih hnuah ni 12.12.2009 (Inrinni) zing dar 5:45 khan chatuan ram min lo pansan ta a ni.

TLANGVAL CHHUANAWM

Ni 11.12. 09 (Zirtawpni) a Mizoram Wrestling Association buatsaih Mizo Inchaipui - Title Fight-ah Tv. Lalrohlua, Sec-II chuan pate (kg 60 hnuailam) ah F. Vanlalsiama, Tachhip hnehin a Champion a, lawmman atan Rs. 15,000/- a dawng.

Tv. Lalrolhlua hi a u Tv. Lalrintluanga Jahau (Vala) nen Pu Lalsangluia Sailo in luahin an khawsa mek a ni. Chanmari tihmingthatu Tv. Rohlua hi Pu Lalbiakliana leh Pi Mary Lalneihtluangi te fa neihchhun niin July ni 29, 1990 khan Mission vengthlangah a lo piang a, zirna lamah chuan Class IX thleng a kal.

Interview leh Training chi hrang hrang a paltlang hnuah kum 2006 atang khan a tuina tak Wrestling lamah ngawrh taka bei turin SAI-ah a lut ta a ni. State Level Wrestling Competition chi hrang hrangah Gold Medal 8 tiamin lawmman thahnem tak a la tawh. National Level-ah chuan kum 2007 atangin Mizoram aiawhin a tel a, Medal erawh a la la lo thung. Karleh mai khian National Inter School Games, Delhi a neih turah an kal ang.

KUANG SIAM HNATLANG

Ni 5.12.2009 (Inrinni) khan Branch YMA hruaitu leh tlawmngai thenkhat ten Kuang siam hnatlang an nei a. Hnatlang hi zingkar atanga tanin mi 20 lai an thawk chhuak.
Kuang siam nan hian Rs. 13,000 vel hman niin kuang 9 siam a ni.

Tv. DAVID LALMALSAWMA (SAWMTEA) KAN THEN TA

Tv. David Lalmalsawma (Sawmtea) hi Pu R. Lalhmingliana leh Pi Lalhmangaihi, Section-II te fa pathum zinga a milai niin 8th April, 1981 khan Aizawl Civil Hospital-ah a lo piang a. An unau chu heng hi an ni :-

1) Nl. Lalnuntluangi
2) Tv. David Lalmalsawma
3) Dr. Rosie Lalthanpuii

Sawmtea hi kawm nuam tak, thenrual ngaina leh hawihhawm, hriatna zau tak nei ni chhovin a tih tawhna lamah chuan rilru pe nasa tak mi a ni. Govt. Higher Secondary School atangin Class XII thleng a zir a ni.

Kum1992-1995 vel khan Thlarauva piantharna a lo chang tawh a ni. Chanmari Branch KTP Property Sub-Committee member-ah te lo tang tawhin Chanmari Presbyterian Kohhran Chanchinbu, Chhungtin Kantu Editorial Board member-ah te chanvo a lo nei ve tawh.

Eizawnna lam chuan a hriatna leh ngaihtuahna hi a hmang thiam em em a. Mizorama Telephone Provider lian ber BSNL hnuaiah hian Franchisee (Distributor) niin Chanmari-ah hian inbunin BSNL hnuaia sumdawnna chi hrang hrang Agent atan BSNL chuan a hmang mek.

Kum 2004 atang khan a thihni thlengin MZP Gen.Headquarters-ah Executive Committee member a ni a, I.T in-charge te pawh a lo ni tawh. MZP-ah hian hruaitute finchhuahtu berte zinga mi a ni. Ama rawtna avangin Lengpui Airport behchhana NCC (Air Wing) (Thawhna khalh zirna) hi kum 2/1 chhunga peih hman turin Central sawrkarin ruahmanna a siam a ni. Hemi thilah hian State sawrkar mai nilo, Central sawrkar hruaitute thleng amah ngeiin hmuin a tul ang ang bawhzuiin MZP kaltlanga a thawh rah liau liau a ni.

Mizo zinga Internet lama rawngbawlna tangkai tak, Youth Internet Ministry (Youthim)-ah hian a tira atanga telin Executive Member a lo ni tawh.

Sawmtea hian a naupan atangin awmhnawk (Bronchitis) a nei a. Kumin March thla khan a luak avangin Aizawl Civil Hospital panpui a ni a, chutah chuan Sawmtea hian Lung natna khirh tak, (Cardiomyopathy) a vei a ni tih hriatchhuah a ni a. Phai lamah leh Aizawl-ah a in check-up reng thin. 26th November 2009 khan luak leh thawhah avangin a buai hle a. A tuk, 27th November khan New Life Hospital-ah admit a ni a. 2nd December zingkarah Civil Hospital ICU-ah sawn phei a ni a. Theihtawpa enkawl a nih hnuin 2nd December, 2009 chawhnu dar 1:00 khan chatuan ram min pansan ta a ni.

THALAI PUAL MEET & KUMPUAN HAWNNA

Ni 1.12.2009 (Thawhlehni) zan khan YMA Hall-ah 'Thalai Pual Meet leh Kumpuan - Khawtlang nun siam that' hun hman a ni. He hun hi Tv. Lalengliana, Branch Secretary-in a kaihruai.

Nakum atana YMA Kumpuan- 'Khawtlang nun siam that' chu Pu Lalbiakzuala, General Secretary, Central YMA in a hawng. Thalai Pual Meet-ah hian Chhiatni Thatnia thalaite mawhphurhna, tlawmngaihna, faina leh zirna bakah Pu T. Lalhluna, VCP hnen atangin faina chungchang ngaihthlak a ni. Solo mi pali hnen atangin ngaihthlak a ni bawk.

Pu T. Lalhluna, VCP leh Pu Lalbiakzuala, General Secretary, CYMA

Tv. Lalduhawma, Br. Fin. Secy. leh
Pu Vanlalruata, Br. Asst. Secy. ten thu an sawi.

Chairman- Tv. Lalengliana, Br. Secretary leh
hunserh hmangtu Nl. Laldampuii, Exe. Member

Nl. Rebek Vanlalpeki Sailo leh Nl. Baby Malsawmtluangi

Tv. Ramhmachhuana leh Tv. Lalruatfela

GAS CHUNGCHANGA RUAHMANNA THAR

Ni 24.11.2009 (Thawhlehni) zan khan YMA Committee Room-ah Branch Executive Committee leh VC te chuan veng mipuiten rualkhai zawka Cooking gas an chan tlan theihna tur chungchang an sawi ho. Joint Meeting hi Pu T. Lalhluna, VCP in kaihruaiin cooking gas chungchangah ruahmanna thar an siam a.

Ruahmanna tharah chuan chhungkaw pakhatin consumer card pakhat chauh an hmang theih tawh ang a, consumer card neitu hming leh number chu Card tharah ziaklutin Sl.No pek a ni ang a, chumi hmang chauh chuan gas lak theih a ni tawh ang.

Consumer card survey hi Section hruaitute kutah dah niin an survey zawhah thlirho leh a ni ang a, chumi hnuah Card thar pek chhuah a ni ang. Gas sem chhuahna hmunah hian card rawng inang lo vek hman a nih dawn avangin gas a inlak pawlh theih dawn lohva, cooking gas-a harsatna a ziaawm hnuah chuan card hi hman zui a ni tawh lovang.

LALNEIHKIMI KAN THEN TA

Nl. Lalneihkimi (34), Sec III hi Pu Rohnuna Varte leh Pi R. Sangchhungi te fa pahnih zinga a naupang zawk niin ni 10.6.1975 khan Chhingchhipah a piang a. Amah hi thuawih thei tak, tawng tamlo, zaidam leh mi huatthu sawi hlau, tawngtai leh rawngbawlna ngai pawimawh mi a ni.

Kumin February thla khan khawsik leh chuapa tui awm avangin Aizawl Hospital-ah enkawl niin ni 10.10.2009 khan Bethesda Hospital-ah dah leh a ni a; thisen sang a nei tih hriatchhuah a ni. In lama enkawl a nih hnuah a that mai theih loh avangin ni 20.11.2009 khan Bethesda Hospital-ah dah luh a nih leh hnu, ni 24.11.2009 (Thawhlehni) zan dar 11:00 khan chatuan ram min lo pansan ta a ni.

Chanmari Branch YMA chuan lusun chhungte a tuarpui takzet a ni.

ART EXHIBITION

Ni 20 leh 21, November 2009 khan Chanmari Branch KTP chuann Art Exhibition a buatsaih. Painting, Carving, Bonsai, Computer Graphic design, Sketching, T-Shirt printing, etc. te pholan a ni.

KRISMAS LEH KUMTHAR LAIIN HALPUAH LEH HALMAWI KHAP DAWN

Aizawl District Magistrate chuan Aizawl District huamchhungah halmawi leh halpuah chungchangah hetiang hian thupek a chhuah:
1. Mi tumahin phailam emaw hmundang atangin emaw halpuah leh halmawi, silai lem, a mu kap chhuak thei chi reng reng Aizawl District huamchhungah an la lut tur a ni lo.
2. Krismas leh kumthar vuakvetah mi tumahin halpuah leh halmawi an zuar /hralh tur a ni lova, an hal tur a ni hek lo.
3. Silai lem, a mu kap chhuak thei chi reng reng zawrh leh hralh khap tlat a ni. He thupek hian chhuah atangin thla hnih chhung a huam ang a, a zawm lo leh bawhchhiate chu dan angin an chungah hremna lek kawh a ni ang.

CHANMARI BRANCH MHIP TE SIHHMUI LAMAH

Ni 11.11.2009 (Nilanini) khan Chanmari Branch MHIP Committee Member mi 27 te chu Sihhmui lamah an picnic a, nuam an ti hle a ni.

CHANMARI GAMES 2009 KHAR TA

Chanmari Games August ni 25 atanga neih chu ni 6.11.2009 (Zirtawpni) zan khan YMA Hall-ah lawmman semna leh a kharna hun ropui taka hman a ni. Hehun hi Sports Chairman Pu R. Lalrinkima'n kaihruaiin Secretary-in Games chungchang report a pek hnuah result puan niin lawmman semnain a zui nghal a ni.

Pakhatna Section-II; Pahnihna Section-III; Pathumna Section-I; Palina Section-IV

Section-II hruaitute leh member te stage-ah.

GAMES RESULT THAR BER

Ni 31.10.2009 (Inrinni) khan High Field-ah Cricket a Games chhunzawm a ni a, final-ah Section-II leh Section-I te intumin, Section-I in an hlahthlem ta a ni. Ti hian Chanmari Games-2009 chu zawh thawkhat a ni ta.

Hun remchang hmasa berah ropui taka a kharna hun leh lawmman semna neih a ni ang. Hemi zan hian GOLD lak theihna 3 ? vel a la awm.

Tuna medal tally atang hi chuan Section-II hi PAKHATNA an ni a, Section-I leh Section-III te hi PAHNIHNA ni thei dinhmunah an la ding ve ve a ni.

HALL GENERATOR ROPUI TAKIN HAWNG

Ni 31.10.2009 (Inrinni) chawhnu dar 2:00 khan Pu Lalhmangaiha, Branch President kaihhruainain YMA Generator ropui taka hawn a ni. Pu Liansailova, CBYMA Adviser-in hunserh a hman zawhah Tv. Lalengliana, Branch Secretary-in Generator chungchang report a pe.

Generator hi Pu Thangkhuma te chhungin an fapa Pu David Lalzuiliana (Zuitea) (L) hriatreng nana pawisa an rawn pek hmanga lei a ni a, Generator hi Zuitea nuin a hawng a ni.

Generator hi Cummins Company niin qtls. 9 a rit a ni a. Generator hman theiha peifel nan Rs. 4,63,296.00 zet sen ral a ni.

YMA HALL HMAN MAN SIAM THAR

Chanmari YMA Hall hman man siam thar a ni a, he rate tha hi November, 2009 atangin thuleh awm hma chu hmanzui a ni ang. Hall hman man hian Generator darkar 1 chhung a free ang a, darkar 1 aia rei hman a nih chuan darkar 1 zelah Rs. 200/- a ni ang. Hall hman man hi chhun leh zanah a pangngai a ni. Hall hmang duhte chuan President hnenah an dil tur a ni a, ani a remchang lo a nih chuan Vice President hnenah an dil tur a ni.

TOP TEN-AH CHANMARIANS

Kum 2008 chhunga Branch Chanchinbu tha YMA General Conference-a puanah Chanmari BranchYMA Chanchinbu CHANMARIANS chu Top Ten-ah telin 5-na a ni.

CONFERENCE HMANGIN DARLAWNAH

YMA General Conference-ah hian Chanmari Branch atanga palai riak lut hi mi 3 awmin lang a kal mi 24 leh Central YMA Cultural Troop aiawha kal mi 2 nen mi 29 in Conference hi an han hmang a ni.