PI LALNIPUII KAN THEN TA

Pi Lalnipuii (73), Sec-I, Presbyterian Kohhran hi Pu Lianvela leh Pi Nuthuami (L) te fa 8 zinga 4-na niin kum 1938 khan a lo piang a. 1963-ah Kapchungnunga nen nen inneiin fa 6 an nei. Tu 6 neiin tuchhuan 1 a nei bawk.

Pawl 3 thleng lehkha a zir a, pianpui finna nei tha, rual kawm thiam leh thian ngaina tak a ni. Kohhran inkhawm a ngaipawimawh hle a; tantu leh beihrual thupui hawngtu a lo ni tawh thin. Nu taima tak a ni a, lo neih atangin contract hna thlengin a thawk thin. MHIP leh MUP ah Committee member niin a phak ang tawkin a in hmang thin.

Kum 2010 atangin cancer avangin damdawiin hrang hrangah enkawl a ni a, doctor ten cancer ti mah se eng cancer ber nge tih erawh an hre thei ta lo a ni. A natna chuan zuallam pan zelin November ni 29, ningani chawhnu dar 12:50 ah chatuan ram min lo pansan ta a ni.

TV. LALRUATKIMA KAN THEN TA

Tv. Lalruatkima (31), Sec-I, Presbyterian Kohhran hi Pu Lalchhawna leh Pi Lalnunziri te fapa 2 zinga a upa zawk niin April ni 9, 1983 khan Aizawl Civil Hospital-ah a lo piang a.

Naupan lai atanga nu leh pa thuawi thei tak, mi ngawichawi leh mi zakzum tak a ni.

November ni 28, nilaini khan chatuan ram min lo pansan ta a ni. A ruang hi tlaivarpui a ni. Amah hi YMA Member a ni.

PU C. VALBUANGA KAN THEN TA

Pu C. Valbuanga (67), Sec-I, Presbyterian Kohhran hi Upa Rana (L) leh Pi Manthangi (L) te fa 10 zinga 6-na niin kum 1944 khan Muthiah a lo piang a. 1968-ah Malsawmtluangi nen inneiin fa 4 an nei. BA B.Ed thleng zirin 2004-ah MBSE-ah Under Secretary in a pension.

Thian ngaina, titi thiam, mi kawm thiam, chhungte huikhawmtu a nih bakah thil chhinchhiah leh vawn that a taima hle.

CBYMA ah Vice President, Secretary, Asst. Secy., leh Central YMA ah Fin. Secreatary a lo ni tawh. 2010-a CYMA Platinum Jubilee-ah hruaitu hlui chawimawina hlan a ni. Mizoram Wrestling Association-ah Exe. Member, Commt. Member, Treasurer leh 2011-ah Adviser a ni. A article ziah ‘Mizopa In’ chu High School leh College-ah zir a lo ni tawh.

Hun rei tak atanga a natna pumpui hnun leh tonsil cancer vangin November ni 28, thawhtanni zan dar 1:07 khan chatuan ram min lo pansan ta a ni. Amah hi YMA Life Member a ni.

CHANMARI GAMES 2011 ZAWH A NI TA

November ni 18, zirtawpni zan khan GHSS Indoor Stadium-ah Chanmari Games 2011chu Sports Sub-Committee kaihhruaina hnuaiah Pu Laldinpuia Sailo, Branch President chuan a kharna hun leh lawmman semna a nei a. A pumpuiah Section-IV chu pakhatna niin Gold 10, Silver 8 leh Bronze 10 an la. Chanmari Games 2011 result:

1st Section IV Rs. 5,000

2nd Section I Rs. 4,000

3rd Section II & III Rs. 3,000

Section te medal lak dan:

PI K. VANTHUAMI KAN THEN TA

Pi K. Vanthuami, kum 75, Sec-I,Presbyterian Kohhran hi unau pasarih zinga a mi lai a ni a, nu taima leh hlim thei tak a ni. Pu P. Siamhnuna nen inneiin fapa pathum leh tuchhuan pahnih an nei a, an pa hian a lo boral san tawh a ni.

Kum 2007 atangin alzeimer nantain a tlakbuak a, kum 2010 ah t hin tha lo a nei tih hmuhchhuah leh a ni. A natna hian zual lam a pan zel avangin November ni 8, Ningani khan chatuan ram min lo pansan ta a ni.

CHANMARI GAMES 2011 TAN A NI TA

Chanmari Games 2011 ni thum awh tur chu November ni 7, thawhtanni khan High School field-ah Pu Rosiamngheta, Chanmari Branch YMA Adviser leh Councillor nibawk chuan a hawng. Hemi ni Section-te intihsiakna hetiang hian neih a a ni:

1. Football (Mipa) : 1) Section tin atangin team 1. 2) Above 35 yrs team 1 3) Section Committee team 1. 2. Volleyball (Hmeichhia) 3. Throwball (Mixed) 4. Ketaminu Race (Hmeichhia) 5. Tug of War (Mipa) 6. Relay Race (Mixed) 7. 100 Metre Race (Mipa) 8. 100 Metre Race (Hmeichhia) 9. Spoon Race (Hmeichhia) 10. Needle Race (Hmeichhia) 11. Shot Put (Mipa)

Games hi November ni 12ah AR Lammualah leh 18-ah Indoor-ahte neih chhunzawm leh a ni ang.

THLIAHBAWIHI KAN THEN TA

Pi Thliahbawihi, kum 44, Sec-III, Presbyterian Kohhran hi Pu Duhlinga (L) leh Pi Huattiali (L) te fa 7 zinga a naupang ber niin kum 1967 khan Dawn khuaah a lo piang a. Kum 1987-ah C. Vulenga nen inneiin fapa 1 leh fanu 2 an nei. Kum 1995 atangin Chanmari vengah khawsa tanin kumin October ni 5 khan a pasal hian a lo boral san tawh a ni.

Kumin August thla tir atanga damlo tanin September thla khan thluak TB a ni tih hmuhchhuah a ni a. Damdawiinah leh in lama an inenkawl hnuah October ni 13 khan Presbyterian Hospital, Durtlangah admit leh niin November ni 1 zan dar 6:10 khan chatuan ram min lo pansan ta a ni.

PRESIDENT'S CUP-AH CHANMARAINS AN CHAMPION

Cricket Association of Mizoram in season bul tanna tournament a buatsaih President's Cup 2011 chu khelh zawh a ni a, he tournament ah hian Champion lai Chanmarians CC chuan an khingpui Kulikawn CC chu wicket thuma hnehin an champion.

Toss ah Kulikawn CC an chak a, an bat hmasa a 40 over run 148 an siam a, Chanmarians tan Raju Chhetri, Lalhlimpuia, Lalchhandama leh Lalzuitluanga ten wicket 2 theuh an la. Chanmarians hian wicket 30 ah run 149 siamin wicket 7 an hloh a, 2011 President'sCup Champion lallukhum an khum ta a ni.

2011-2013 CENTRAL YMA HRUAITU THLAN THARTE

President - T. Sangkunga
Vice President - Lalbiakzuala
Gen. Secretary - Vanlalruata
Asst. Secretary - R.L. Rindika
Treasurer - R. Lalngheta
Fin. Secretary - J. Lalsailova

Rorel Inkhawm thu rel:

YMA khawih:
1. Mizoram khawpui hrang hrang thlanmual intawm (Common Cemetery) kan neih theih nan Central YMA-in hma la rawh se.
2. Mizorama Project/Industry-ah leh leilung hausakna haichhuah kawngah ram leilung faten a tam thei ang ber hamthatna an dawn theih nan Central YMA-in hma la rawh se.
3.Mizorama hnamdang dan lova sumdawngte hi YMA hian dapchhuah hna hi tun aia chak zawkin hma la rawh se.
4. Kan ram tuihna humhalh leh a awmsa tihpun zel a nih theih nan Central YMA-in hma la rawh se.

Sorkar khawih:
1. Mizoramah zirna a lo that zawk theih nan thingtlang leh khawpuiah rualkhai thei ang berin zirtirtu, Sorkar-in siksawi rawh se.
2. Mizo hmeichhia Non Tribal pasal neite, an pasalte hnam vuan tura Dan (Supreme Court Ruling) awmsa hi Mizoramah khauh zawka kalpui nise. Hnamdang Mizo hminga an hming thlak thinte hi ram leilungfate chanvo humhalh nan Sorkarin khapna khauh takin siam rawh se.
3. School Academic Session tuna kan hman mek hi India State dangte tih dan milin April-March-ah thlak ve ni rawh se.
4. Labour Law kan neih ang angte kenkawh kawngah Sorkarin chak zawka hma la turin Central YMA-in ngen rawh se.
5. Mizoramah hmun remchang chuha Bawk khawha khawper din thin hi a awm tawh lohna turin hmalak ni rawh se.

Kumpuan: 2012 kumpuan atana "Ram leh hnam humhalh" tih chu pawm a ni.

Kum 2011-12 atana Budget (Hmuh tur 8,036,588.00 - Hmanna tur 8,036,588.00) chu pawm a ni bawk.

THANZINGI KAN THEN TA

Pi Thanzingi hi Pu Chalbuanga (L) leh Pi Challiani (L) te fa 7 zinga 4-na niin 1931 khan Saitualah a piang a. Pu C. Pachhunga (L) nen inneiin fa 6 (M-4, H-2) an nei. Pu Pachhunga hi kum 1993 khan a boral tawh a ni. Tet laia khuhhip natna vei a ni a, chhungkaw retheihna avangin lo lam hna te thawkin inenkawl lem lovin a pai dam a, chuvang chuan thawhah benvawn a neih phah a. Nikum khan thawhah leh natna dang avangin damdawi inah tum 2 enkawl a ni a. Kum khat lai in lamah enkawl a ni a. Oct. ni 20 khan a natna rawn zual thutin Newlife Hospital-ah admit a ni a. Thawhah leh internal bleeding a nei a. Khawl hmanga a nunna chhan tuma doctor ten theihtawp an chhuah hnuah October ni 22 zing dar 9:30 khan chatuan ram min lo pansan ta a ni. A ruang hi tlaivar pui a ni.

CECILIA VANLALSIAMI KAN THEN TA

Pi Cecilia Vanlalsiami, kum 52, Sec-I, Roman Catholic Kohhran hi Pu Johan Kaphmingthanga (L) leh Pi Rotluangi te fa 7 zinga a upa ber niin kum1959 -ah Sesawngah a piang a. Kum 1972-ah Chanmari veng Aizawlah inbengbelin a thihni thlengin an awm a ni.

Kum 2010 atang khan damlovin a inentir a, ril TB natna a ni tih hmuh chhuah a ni. Hun rei tak a inenkawl hnuah that lam a pan theih lovin October ni 21 zan dar 10:50- khan chatuan ram min pansan ta a ni. A ruang hi tlaivarpui a ni.

F.PALAETA KAN THEN TA

Pu F. Paleta, kum 80, Sec-I, Presbyterian Kohhran hi Pu Hrangdawla fapa niin kum 1931 khan Champhaiah a piang a. Pi Zaneihzawngi nen innei in fanu 1 leh fapa 2 an nei a. Kum 1970-ah Champhai atangin Chanmariah an rawn pem.

Secretariat-ah Peon hna thawkin a pension a. Kum 2008 khan Chanmari kawnah bike in su in a khel ruh a tliak a, heta tang hian pawn chhuak thei lovin inah a tawm ta chawt a. Asthma natnain a tlak buak leh a. Damdawiin leh in lamah in enkawlin October ni18 zing dar 3:15 khan chatuan ram min lo pansan ta a ni. Hemi ni hian vui a ni.

LALZAMLIANI KAN THEN TA

Pi Lalzamliani, kum 53, Sec-I, Presbyterian Kohhran hi Pu Thawmtlirha (L) leh Pi Phirkungi te fa 8 zinga a 3-na niin Nov. ni 23, 1959 khan Thekpuiah a lo piang a. Kum 1988-ah H. Laltanliana nen inneiin fanu 1 leh tu 1 an nei a. Kum 2002-ah F. Tawndaia nen inneiin a pasal hian kum 2002 kum vek hian a lo boral san tawh a ni. Kum 2009 khan Chhul Cancer a nei tih hriatchhuah a ni.

Phai lamah leh Aizawla damdawiin hrang hranga enkawl a nih hnuah Oct. ni 16, Inrinni zing dar 1:40 khan chatuan ram min lo pansan ta a ni. Hemi ni hian vui nghal a ni. Amah hi Section-II a cheng niin a ruang hi a nutapa Pu T. Lalhmingthanga, Section-I hnenah lak a ni.

C.VULENGA KAN THEN TA

Pu C. Vulenga, kum 48, Sec-III, Presbyterian Kohhran hi Pu Thanhmingliana leh Pi Satinluti te fa 7 zinga 3-na niin 1963 khan Hnahlanah a piang a. Kum 1987-ah Thliahbawihi nen inneiin fapa 1 leh fanu 2 an nei.

Kumin February thla atang khan thana neiin a taksa dinglam a che thei ta lova. Damdawiinah inenkawlin a natna hian zual lam a pan zel a. October ni 5, Nilaini zing dar 5 khan chatuan ram min lo pansan ta a ni. Hemi ni hian vui nghal a ni. Amah hi YMA Member a ni.

CHANMARI BRANCH YMA KUM 53 A UPA A NI TA

October ni 16, Pathianni hi Chanmari Branch YMA din cham vawi 53-na a ni a, Chanmari Branch YMA chuan vawiin hian YMA member tinte chu Kristian nun dan tha ngaisang lehzual tur leh tanpui ngaite tanpuina kawnga theihtawp chhuah theuh turin a ngen..

Chanmari Branch YMA hi ‘Chandmary’ hming a put tirh te, a chhunga chengte pawh tlemte an la nih lai, kum 1958 October ni 16 khan Pu Thangliana in (tuna Chanmari West) ah mi thahnemngai kalkhawmte chuan Chanmari Branch YMA hi an din a. Hetihlai hian Presbyterian Kohhran a ding tawh naa, thalai pawl a awm lo va. Vengchhunga thalaite chhawrnahawm an nih zawk beiseiin Pu Tlangliana inah Pu Thangchhinga (L) f/o Chawngthuama leh Pu Lalengliana (L) f/o Lalmalsawma Hnamte ten thalai ko khawmin Branch KTP nge YMA din tul ang tih sawikhawm turin thalai an ko khawm a, an sawi khawm hnuah Branch YMA din an rel thlu ta a ni.

HNAM LAM INTIHSIAKAH CHANMARI 10-NA

October ni 13-14 chhunga 10th Chief Minister Running Trophy (Cultural Dance Competition) neih chu zawhfel a ni ta a, Chanmari Branch YMA chu a pum puiah 10-na a ni. He Competion hi Central YMA leh Art & Culture Deptt. tangkawpin a buatsaih a ni a, Branch tel zawng zawng hi 49 an ni a, Aizawl khawpui pawn atangin Branch 11 an tel. Result chu hetiang hi a ni:
CHERAW :
1st Ramhlun South - Rs. 2,000.00
2nd Chanmari West - Rs. 1,500.00
3rd Ramthar North - Rs. 1,000.00
CHAWNLAM :
1st Ramthar North - Rs. 2,000.00
2nd Chanmari West - Rs. 1,500.00
3rd Chaltlang North - Rs. 1,000.00
CHAI :
1st Ramthar North - Rs. 2,000.00
2nd Mission Vengthlang - Rs. 1,500.00
3rd Armed Veng - Rs 1,000.00
Member tel tam ber
Mission Vengthlang - 54 - Rs. 2,000.00
Top 10 Result :
1st Ramthar North - Rs. 30,000 + Trophy
2nd Ramhlun South - Rs. 15,000 + Trophy
3rd Chanmari West - Rs. 10,000 + Trophy
4th Mission Vengthlang - Rs. 10,000
5th Chaltlang North - Rs. 10,000
6th Armed Veng - Rs. 10,000
7th Dinthar - Rs. 10,000
8th Vaivakawn - Rs. 10,000
9th Maubawk - Rs. 10,000
10th Chanmari - Rs. 10,000
Heng bakah hian Branch tel zawng zawngin Rs. 7,500 an dawng theuh bawk a ni.

JH. REMLIANA KAN THEN TA

J.H. Lalremliana, kum 68, Sec-IV, Presbyterian Kohhran hi 10 June, 1943 khan Pu Nghaka (L) leh Pi Hualthangi (L) te fa palina ni turin Durtlang Hospital-ah a lo piang a. An unau hi 8 an ni. August ni 25, 1974 khan Romawii nen Rev. Robawiha kutah an innei a. Fapa 2 leh fanu 2 neiin, tu 7 a nei bawk.

Pu JH Lalremliana hi pa zaidam, mi huatthu sawi hlau tak, tawng tam lo, titi thiam a ni. Nupui fanau te leh tute hmangaih mi a ni a, a nupui fanaute ngaihsak leh uap lum duh mi a nih avangin Kohhran leh khawtlang lamah pawh duh angin a inhmang thei tam lo. Naupang a ngainain a tute leh dangte pawhin an ngaina hle a ni.

Kum 1965 ah Matric St. Paul’s High School atangin a zova, 1969 ah B.A. a passed bawk. School Education Department hnuaia Adult Education Wing hnuaiah Circle Adult Education Officer hna thawkin 2009 ah a pension.

Thisen sang leh zunthlum te a nei thin a, he a natna hian harsatna em em a thlen lova an hriat laiin 2010 atang khan damdawiina awm hial te a lo ngai ta a, damdawiina amah enkawltute chungah a lawm thei em em thin a ni. Aizawl Civil Hospitala hun engemaw chen enkawl a nih hnuah in lamah te inenkawl chhovin a tha viau a, thenawm khawvengah leh veng danga chhungte dam lo tlawh te pawhin a kal fo thin a ni. 2011 August thla khan Awmvel natnain a tlak buak a, in lamah enkawl a ni a. He a natna hi a dam fel hnuah 30 September zan khan a insawisel leh a, a tuk 1 October (inrinni) zing dar 9 vel khan Civil Hospital panpui a ni a, Hopsital an thlen hnu rei lo teah min lo boral san ta a ni.

ROCHHUNGA KAN THEN TA

Rochhunga (94), Sec-IV, Presbyterian Kohhran hi unau 6 zinga naupang ber leh mipa awmchhun niin 10th May, 1917 (German râl rûn kal kum) in Chhingchhip, Lal Hrangliana khuaah a piang a. A pa chu Kawlhnûna Ralte Kawlni, a nu Chinawii Paihte a ni. Ni 13th Jan, 1936 (Thawhtan) ah Sangkungi Renthlei nen Pastor Chhawna kutah an innei a, fa 11 (Mipa - 4 leh hmeichhia - 7) an nei. Ni 4th Feb, 1921 ah Pastor Hauchhunga kutah Baptisma a chang a. Zu far khat pawh a in lo a ni. Lehkha a zir sang lo hle a, Sunday School-a chhiar a zir bâk chu chawhma chiah school a kal. Zir Tan Bu leh Zir Tirh Bu hi a lehkha zir ve chhun a ni. Pathian malsâwmna a dawng a, ziak leh chhiar a thiam a, Bible hi vawi 13 (Lehlin hlui - 12; Lehlin thar - 1) a chhiarchhuak a, ama Typewriter a chhuin lehkhabu bu 6 lai a siam ve.

1939-ah Chhingchhip atangin Khawbêlah an pem a, an chhangchhiat lai takin khawtlangah dinhmun hrang hrang : Y.L.A. leh Signal Pawl-ah President kum 10 chhung niin Lal Upa kum 8 a ni a, Village Council Member a ni tawh bawk. 1940 khan a hovin Tlangval Inkhawm an nei a, nula hovin tel ve an châk avangin Thalai Inkhawm vuahin Kohhranah chak takin an ding a, kum 10 chhung zet Zaipawl Conductor a ni a, 1942 ah Kohhran Upa-ah thlan leh nemngheh a ni. Kum 1951-ah Chhingchhipah an pem let leh a, 1952-ah Kohhran Upaah an thlang leh a, kum 69 zet Kohhran Upa a ni hman a ni. Kohhran, Bial, Presbytery, Synod thlengin a phâk ang tâwkah committee hrang hrangah dinhmun pawimawh tak tak a chelh hlawm. Ama dil pawh ni lovin Chhingchhip-a Damdawi In hawn thar tur atân Civil Surgeon-in Chowkidar atan a rawn appoint a, chu chu kum 60 a nih, 1977 thleng khan a thawk.

Patê inbuan chak, pa taima leh hnathawh chak tak a ni a. Mawl taka Pathian ring bur mai, a rinna nghing ve ngai lo a ni. Pathian a rin tlatna hi a tu leh faten eizawnna kawngah malsawmna tam tak an dawn phah a ni. Kum 90 a nih kumin Computer a zir tan.Kum 1981 khan Chanmari-ah hian an pem thla ve ta a. Chanmari M.U.P. ah hian 1984 atangin Office Bearer ah kum 10 - President, Vice President, Financial Secretary leh Senior Adviser-ah te a tang a, Office Bearer-a kum 10 tang zawn certificate a dawng bawk. M.U.P. Headquarters Committee-ah kum 6 chhung a tel bawk. Chanmari Kohhranah pawh hian Puitling Sunday School zirtirtu, thuhriltu, committee hrang hrang member nihna chanvo a chelh bawk. Kum 60 chhung thuhriltu a ni a, kum 50 chhung Sunday School zirtirtu tangte chawimawina dawngin kum 59 a thawk hman a, bawrhsawmna avangin chawlh a dil zawk a ni. Bible Society-ah Chief Patron Member a ni bawk. Pathian Ramah sawma pathum a pe ta a ni.

Kum 1986 atang khan a biangah Nerve na in a tibuai tan a, Guwahati Neurology Centre panpui a ni a, tihdam mai theih a nih loh avangin a thih ni thleng hian ni tin damdawi a ei thin. Hemi kum vel atang vêk hian Asthma a nei tan a, vawi tam tak Hospital hrang hrangah luhpui a ni a, that tak tak nei lovin in lamah a theih ang anga enkawl zui a ni a. Hetianga natnain a tlâkbuak chung hian midang tâna malsawmna nih a tum tlat a, thil dang a tih theih loh hnuah pawh awmhmunah lensuah a sa a, mi 132 a pe hman. Kumin March thla vel atang khan Nerve na leh Asthma natna bakah hian a taksa pum a thak a, a taksa tih lumin a thak a chhuak a, tih vawhin a Asthma a chhuak bawk si a, enkawl thiam a har hle a ni. Zawi zawiin a hniam hret hret a, Presbytery Inkhawmpuiah te tel châk êm êm leh tel tuma a inbuatsaih laiin Inkhawmpui tâwp ngai tawh lohna leh kal a châk êm êmna a Lalpa hnenah ni 29th September, 2011 (Ningani) 12:00 Noon khan a chawl ta a ni.

FC.LALTHANTLUANGA KAN THEN TA

FC. Lalthantluanga (34) s/o Lalramliani, Sec-IV hi July ni 5,1977-ah a lo piang a. Nikum 2010 khan thluak TB avangin Newlife Hospital-ah thla hnih chhung enkawl a ni a. In lamah kum khat leh thla hnih chhung enkawl chhunzawm a ni. Kumin September ni 26 khan thawhah leh kal na avangin Newlife Hosital- ah admit leh a ni a, doctor leh nurse ten theihtawp chhuaha an enkawl chungin September ni 28, nilaini khan chatuan ram min lo pansan ta a ni.

LIBRARY THA THLANAH AIZAWL CITY-AH CHANMARI BRANCH YMA LIBRARY 2-NA

September ni 22, ningani khan Vanapa Hall-ah Art & Culture, RRRLF leh Mizoram Library Association te buatsaih thingtlanga Library siam chungchanga a enkawltute pualin seminar neih a ni a, Art & Culture Minister PC. Zoram Sangliana’n a hmanpui. He hunah hian Mizoram District tina tlawmngai pawl leh pawl dang enkawl Library 459 atangin Library tha thlan a ni a. Chanmari Branch YMA Library chu Aizawl City-ah Library tha lawmman 2-na dawng.

Library tha thlanna hi Art & Culture leh Mizoram Library Association in District tina tlawmngai pawl leh pawl dang enkawl Library-te a hmunah kal chilhin endik hna an thawk a. Library tha ni tur hian tehna hrang hrang 15 atangin endik a ni. Branch YMA in Library building a neih that leh that loh te, Library budget zat te, Library Sub-Committee din leh din loh te, Library hawn zat te, 2006-2009 chhunga lehkhabu lei thar zat te, lehkhabu chi hrang hrang lakkhawm zat te, member neih zat atang te, tlawhtu tam dan atang te leh lehkhabu rem dan atangtein endik a ni.

1-na hi Bethlehem Vengthlang niin Rs. 7,000 an dawng a; 2-na Chanmari, Rs. 5,000; 3-na Bethlehem, Rs. 3,000. Pawisa fai bakah Certificate pek vek an ni bawk.

THANTHUAMA KAN THEN TA

Thanthuama Pachuau, kum 87, Sec-I, Presbyterian Kohhran hi Pu Pachhunga (L) leh Pi Thangchhingpuii (L) te fa 4 zinga 2-na niin kum 1924 khan Saichalah a piang a. Kum 1955 ah Pi Thangveli nen ineiin fa 7 an nei a; kum 1956 ah Saitual atangin Aizawlah an rawn pem a.A nupui hian kum 1993 khan a lo boral san tawh a ni.

April, 2008 khan Dinthar venga a khawhar in leng chu step-ah a tlu sual a. Hemi atang hian natna chi hrang hrangin a tlakbuak zui a. Thana, ruhna leh bawrhsawmna dang avangin damdawi inah tum engngemaw zat enkawl a nih hnuin natna bik em em awm lovin a chau hret hret a, September ni 21, 2011 nilaini zing dar 1 khan chatuan ram min lo pan san ta a ni.

LALPARMAWII KAN THEN TA

Liliparmawii, kum 44, Sec-I, Presbyterian Kohhran hi 1967-ah Buarpuiah lo piangin unau 12 an ni a, a unau 4 ten khawvel an chhuahsan tawh a ni. 1991-ah H. Lianch-hunga nen Buarpuiah inneiin fa 5, an nei a. 2008-ah Aizawlah lo pemin Pi Hrangzami te in luahin an khawsa mek a ni.

July 2010 khan Civil Hospital, Aizawlah a rilphir zai a ni a, he mi atang hian a taksa chaklo chho zelin Presbyterian Hospital, Durtlang-ah vawi 4 lai admit a ni a. September ni 16 tlaiah nikhaw hre lovin a awm thut a, Presbyterian Hospital, Durtlang ICU-ah admit niin a thih thlengin ICU-ah enkawl a ni a, September ni 18, Pathianni zing dar1:30 khan chatuan ram min lo pansan ta a ni.

LIBRARY TIHCHANGTLUNNA TUR DAWNG

Chanmari YMA chuan RRRLF hmalaknain September 14 khan State Library atangin Library tihchangtlunna tur Computer set 2 (Dual Core 2.5 Ghz.), Laser printer, Dot Matrix leh LCD TV 32” Sony, 1KVA UPS, Computer table 2 nos., Internet Connection atan TATA Photon leh DVD Player (Sony) dawn a ni

PC LIANSIAMA'N ZIRTIRTU THA CHAWIMAWINA A DAWNG

Pu PC. Liansiama, Sec-IV chu September ni 5, 2011 khan 2010-National Award for Teacher chu New Delhi-ah India President in a hlan.
Pu PC Liansiama hi kum 1975 ah Ngopa Primary School I-ah zirtirtu hna a thawk tan a. Hmun hrang hranga hna a thawh kual hnuin tunah hian Govt. Electric P/S II ah Headmaster hna a thawk mek a ni. Headmaster a nih chhung hian PSLC exam-ah an school atangin Merit Scholarship hmu mi 85 an awm a, Topper-ah um 2 lang tawhin, Top ten-ah mi 16 an awm tawh bawk. LAD leh SSA a\angin an school hi fai lawmman pakhatna vawi engemaw zat a lo lakpui tawh bawk.
Kum 2005-a SCERT in an Silver Jubilee lawmna denchhenin Mizorama school tha tehna 30 hmanga an endik hnuah an school hi Mizorama school tha bera thlan a lo ni tawh.
Kum 2007-ah Mizoram sorkar atangin chawimawina State Award for Teacher a dawng a. 2010-ah Electric Veng MUP Unit in Primary atanga High School zirtirtu tha an vengchhung ami an hlanah Zirtirtu tha a thlan a ni. MBSE in Curriculum and Syllabus Primary atanga High School thleng zirlaibu a buatsaih chungchangah Mizoram Primary Teacher aiawhin ruat a ni.
Tunah hian Mizoram Primary Teacher Association-ah Councellor Member leh Executive Member a ni.
Rawngbawlna lamah chuan a awmna Corps-ah Corps Sergent Major a ni.
Pu PC. Liansiama hi naupan tet atanga vawiin thlenga zuk leh hmuama in sum, ruihtheih thil ti ngai lo leh mahni hna a inpe zo tak a ni. Thu leh hla lamah a tui a, article pawh engemaw zat a ziak a ni.
Hetianga ram leh hnam tana mi tangkai leh chhuanawm Chanmari vengin a nei hi Chanmari Branch YMA chuan a lawmpuiin a chhuang tak zet a ni.

RK. ZOLIANA KAN THEN TA

Pu R.K. Zoliana, kum 42, Sec-III, Presbyterian Kohhran hi Pu R.K. Sapa leh Pi Laichhingi te fa 6 zinga 4-na niin October ni 9, 1969 khan a lo piang a. Kum 1985-ah Modern School atangin matric pass-in Hrangbana College-ah PU thleng a zir a. Kum 1989-ah Lalrammawii d/o Lalmalsawma Hnamte, Chanmari nen inneiin mipa 3 leh hmeichhe 1 an nei.

Amah hi thenrual kawm thiam, thil phal leh infiamna lama tui tak a ni a. A tleirawl tet atangin football, badminton, chess leh draught board-ah te veng aiawhin a lo khel thin a, Chanmari veng tihmingthatu a ni thin. Retailer hna kum 15 chuang thawkin he hna hi a thihni thlengin a thawk a ni.

August ni 31 zanah insawiselna engmah nei lovin a mu a. A muhil chu zan dang ang lo takin a awm a, kaihthawh an tum laiin September ni 1, ningani zing dar 3:15 khan chatuan ram min lo pansan ta a ni. Amah hi YMA member a ni.

LALBUAII KAN THEN TA

Pi Lalbuaii, kum 97, Sec-II, Presbyterian Kohhran hi kum 1915 khan Selamah a piang a. A pa chu Chhingvunga (L), Selam lal a ni a, a nu chu Ngainemi (L) a ni. Kum 1934 khan K.C. Khamtuala nen inneiin mipa 3 leh hmeichhia 7 an nei a, tu leh tuchhuan 67 neiin khup thum a hmu a ni.Kum 1950 khan Selam atangin Chanmariah an rawn pem a. Eizawnna avanga hmun hrang hranga an pem kual hnuah 1994 khan Chanmariah an rawn let leh a. Kum 2004-ah a pasal Pu Khamtuala (97) chuan a boral san a ni.

Pathian tih mi niin a dam that chuan Pathian Biak inkhawm a pelh ngai lo.
August ni 24, nilaini khan hritlang awm nain tlakbuakin hniam lam a pan hret hret a. August ni 29, thawhtanni tlai dar 6:30 khan chatuan ram min lo pansan ta a ni.

YMA GENERAL CONFERENCE AGENDA THLI FIM

September ni 2-a CEC Meeting chuan YMA General Conference 2011 lo awm tura Aizawl khawpui chhung atanga Agenda lutte chu CCC Meeting-a chhawpchhuah turin hengte hi a passed:

YMA KHAWIH:

1. Mizoram khawpui hrang hrang thlanmual intawm (Common Cemetery) kan neih theih nan Central YMA-in hma la rawh se.
2. Mizorama Project/Industry-ah leh leilung hausakna haichhuah kawngah ram lei lung faten a tam thei ang ber hamthatna an dawn theih nan Central YMA-in hma la rawh se.
3. Mizorama hnamdang dan lova sumdawngte dapchhuah hna hi YMA hian tun aia chak zawkin hma la rawh se.
4. Mizoram (India) tizim zawnga Border Fencing kal lai mek hi Central YMA-in enpuiin uluk zawka hmalak dan ngaihtuah rawh se.
5. Electoral Roll Revision hrang hrangah khua leh tui dik takte chauh thun an nih theih nan Central YMA-in hma la chhunzawm zel rawh se.
6. Mizo thuam thilte uar zawka hmang turin Central YMA-in hma la rawh se.
7. Kan rama tuihna humhalh leh a awmsa tihpun zel a nih theih nan Central YMA-in hma la rawh se.

SORKAR KHAWIH:

1. School Academic Session tuna kan hman mek hi India State dangte tih dan milin April - March-ah thlak ve ni rawh se.
2. Labour Law kan neih ang angte kenkawh kawngah sorkarin chak zawka hma la turin Central YMA-in ngen rawh se.
3. Pawngsual chungchangah thil tisualtu hremna na zawk siam thar ni rawh se.
4. Mizoramah hmun remchang chuha hnamdangten Bawk an khawh a, khawper an din thin hi a awm tawh lohna turin hmalak ni rawh se.
5. Mizo hmeichhia Non Tribal pasal neite, an pasalte hnam vuan tura Dan (Supreme Court Rulling) awmsa khauh zawka kalpui nise, hnamdang Mizo hminga an hming thlak thinte hi ram leilungfate chanvo humhalh nan sorkarin khapna khauh takin siam rawh se.

KUMPUAN RAWTNA

1. Khawtlang Nun Siamthat
2. Ram leh Hnam Humhalh
3. Ruihhlo Do

Mizoram Governor thar Pu Vakkom B. Purushothaman

September ni 2, zirtawpni tlai dar 5:15 khan Mizoram Governor thar Pu Vakkom B. Purushothaman chu Raj Bhawan Durbar Hall-ah Gauhati High Court Chief Justice, Justice M B Lokur chuan rinawmna thu tiam tirin lakluh a ni ta.

Kum 83 a upa dan hre mi, politician hlun, Kerala Assembly a MLA, Minister leh Speaker lo ni tawh, MP Lok Sabha leh Andaman and Nicobar Islands a Lt. Governor hna lo chelh tawh Mizoram Governor atana lakluh inkhawm tawi fel leh urhsun takah hian India President in Mizoram Governor ni tura a ruatna chu Chief Secretary Pu Van Hela Pachuau chuan a chhiar chhuak hmasa a. Gauhati High Court Chief Justice, Justice MB Lokur in saptawnga thu tiam tirin lakluh a ni ta a ni.

Larsap thar hi April ni 12, 1928 khan Vakkom khua Kerala ah a piang a. Kum 1946 khan student Congress-ah lutin, 1953 khan Vakkom Panchayat hruaitu atana thlan a ni a. President DCC Thiruvananthapuram, General Secretary leh Vice President KPCC nihna te lo chelh tawhin, kum 25 chuang zet AICC member a ni tawh bawk.

Kum 1970, 1977, 1980,1982 leh 2011 ah te khan Attingal Constituency atangin MLA a thlan tlin niin Ministerial Porfolio hrang hrang a lo enkawl tawh thin a. Kum 1982 – 1984 leh kum 2001 – 2004 chhung khan Speaker Kerala Legislative Assembly a ni a. Kum 1984 – 89 leh 1989 – 91 chhungin Lok Sabha MP a ni leh a. MP ni chung hian Chairman, Committee on Public Undertakings leh Committee on Subordinate Legislation of Parliament bakah kum 5 chhung Chairman Consultative Committee of Experts to the CIDP of Inter Parliamentary Union, Geneva a ni tawh nghe nghe a ni.

Larsap thar hi kum 1993 khan Lt. Governor, Andamans & Nicobar Islands a ruat niin kum thum vel he hna hi a thawk a. Kum 1996 khan Global Conference on the Sustainable Development of Small Island Developing States, Barbados a neih ah Indian Delegation hruaitu a lo ni tawh bawk a ni.

Larsap nupui hi Dr. Lily Purushothaman a ni a, fapa pahnih leh fanu pakhat an nei.

VANLALMUANA (KAWNGTEA) KAN THEN TA

Pu Vanlalmuana (Kawngtea), kum 34, Sec-I, Presbyterian Kohhran hi Pu Chawngthuama leh Pi Ramthangi te fa 4 zinga a upa ber niin 1977-ah Presbyterian Hospital, Durtlangah a lo piang a. 2005-ah Lalnunhlimi, Champhai Bethel nen inneiin fapa 1 an nei. Kawngtea hi mi khawngaihna ngah, hlim thei leh zai leh rimawi ngaina mi a ni.

Positive Network of Mizoram dintu zingah telin President a ni. Indian Network of Positive People-ah Elected Board Member niin MSACS-ah Executive Member leh Catholic Relief Service-ah Project Manager a ni bawk. HIV+ ten thinhrikna leh endawngna an tawh thin hi a vei hle a, a um bona kawnga a sulsutu pawimawh ber te zinga mi a ni.

August ni 9 atangin thluaka khawsik leh pneumonia vangin Newlife Hospital-a enkawl niin, August ni 20, Inrinni chawhnu dar 4:55 khan chatuan ram min lo pansan ta a ni.

Benjamin Lalnunhlua kan then ta

Benjamin Lalnunhlua, thla 5, Sec-I, Presbyterian Kohhran hi Lalchhuanthanga leh Ramdinthari te fapa mal niin March ni 17, 2011 khan Civil Hospital-ah a lo piang a.

Thla khat leh a chanve a nih atangin lung vung a nei tan a. He natna avang hian August ni 20 khan Civil Hospital-ah admit a ni.

August ni 21, zing dar 7:30 khan chatuan ram min lo pansan ta a ni.

GUTKHA PRODUCT HAL RAL

August ni 18, zan khan Chanmari Branch MHIP te chuan Gutkha Product an man khawmte an hal ral.

THLANMUAL HNATLANG

August ni 15, thawhtanni khan thlanmual hnatlang neih a ni a, Branch YMA hnuaia committee peng hrang hrangte an thawkchhuak.

LALREMA COLNEY KAN THEN TA

Pu Lalrema Colney, kum 69, Sec-I, Presb. Kohhran hi Upa Hmangaiha (L) leh Pi Biali (L) te fa 9 zinga a 3-na niin December ni 6, 1942 khan Kawnpuiah alo piang a. Pathian ring tlat mi, inkhawm ngai pawimawh tak, fiamthu ngaina leh thenrual kawm thiam tak a ni. St. John School, Kolasibah leh ATS, Shillong-ah te lehkha a zir zawh hnuin 1964 khan Indian Airforce-ah a lut a. 1985 khan Junior Warrant Officer-in a pension a ni.

1969-ah Darkhumi d/o Chhundenga (L), Chanmari nen inneiin fa 3 leh tu 6 an nei. 1987-90 leh 1990-93 ah Chanmari VC Member atan thlan a ni a. MUP, Chanmari Unit-ah Asst. Secretary hna lo chelh tawhin Local MPF-ah Fin. Secretary a nih mek bakah Mizoram Ex-Servicemen Association, Chanmari Unit-ah kum 1990 vel atanga a boral ni thlengin President a ni. Kohhranah thuhriltu a ni.

1990 atangin zunthlum leh thisen sang a nei tan a. June ni 1 khan stroke vangin Presbyterian Hospital, Durtlang-ah admit a ni a. Natna dang dangin tlakbuakin a chak lo chho zel a. Tichuan August ni 16 zing dar 12:40 khan chatuan ram min lo pansan ta a ni.

LEM INZIAHSIAK RESULT

Chanmari veng naupang kum 12 chin hnuailam tana ‘Entirna nei tha, mahni duh zawng zawng’ lem inziahsiakah Lalrinawmi (9) d/o David Lalmuankima, Sec-III chu ziak thiam bera thlan a ni.

KHAWTLNG NUN SIAM THAT BEIHPUI TLAK A NI

August ni 7, Pathianni chawhma inkhawmah Chanmari Branch YMA chuan ‘Khawtlang nun siam that’ tih thupui hmangin Chanmari Presbyterian Kohhran Puitling Sunday School leh Naupang Sunday School-ah thusawina hun a nei.