PROMINENT JOURNALIST CHAWIMAWINA PU LALBIAKTHANGA PACHUAU IN A DAWNG

Chanmari veng pa Pu Lalbiakthanga Pachuau, Zoram Tlangau Editor ni bawk chu April ni 28, ningania Mizoram Journalist Association General Conference I & PR Auditorium-a neihah Prominent Journalist chawimawina hlan a ni.

Pu Lalbiakthanga Pachuau hi kum 1927 ah Saichalah a piang a, kum 17 chhung sipaia a tan hnuah, kum 1980 atangin Zoram Tlangau chanchinbu a enkawl tan a. MJA Secretary term khat, Vice president term hnih leh President term thum a chelh tawh a. Mizo zinga prominent journalist palina niin tunah hian Association for Blood Donation, Second World War Veteran Association leh Mizoram Social Defence Union-ah te President a ni mek bawk.

Pu Lalbiakthanga Pachuau hi Chanmari Branch YMA Adviser lo ni tawh in an chhungkuain Section-III ah an khawsa mek a. Hetianga ram leh hnam tana mi chhuanawm, chawimawina dawng thei Chanmari vengin a nei hi Chanmari Branch YMA chuan a chhuangin a lawmpui takzet a ni.

CRICKET CHAMPION CHANMARI

April ni 21, ningani khan Central YMA buatsaih Tantia Inter Branch YMA Cricket Tournament vawi-7 na chu zawhfel a ni ta a, Chanmari in Ramhlun Venglai hnehin an Champion a, pawisa fai Rs. 10,000 leh Certificate a dawng.

Final-ah Chanmari toss-ah chakin bat hmasak thlangin run 150 siamin wicket 4 an hloh a, chu chu umin Ramhlun Venglai chuan over 20 ah wicket 9 hlohin run 141 chauh an siam theih avangin Chanmari hi run 9-a chakin a vawi 3 nan an Champion ta a ni.

Final-ah hian Tv. Lalfakzuala, Sec-I chuan run 48 siamin Man of the Series a thlan a ni a, hei hian Trophy leh Rs. 1000 a keng tel a, kum 2005-ah a lo la tawh bawk a ni. He inkhelah hian Tv. Zothantluanga, Sec-II run-44 (not out) siamin, Tv. R. Lalhlimpuia (Tetea), Sec-I chuan wicket 3 a la a. Tv. Lalawmpuia (Op-a) leh Tv. Victor Ramchhana, Sec-IV ten wicket 2 ve ve an la bawk. He inkhel hi veng mipuiten an hlut a, Neuhof leh Staines Memorial School naupang thahnem takin an rawn tawiawm bawk.
Central YMA Cricket Tournament hi vawi 7 awm tawhin kumin hi Chanmari leh Ramhlun Venglai te chu final-ah vawi 3 an intumna a ni a. Ramhlun Venglai leh Chanmari tum hnih ve ve lo champion tawh an ni, ti hian Chanmari chu 2005,2009 leh 2011 ah a Champion ta a ni.

Tun tum inkhelah hian Chanmari BranchYMA hian run 750 ngawt a siam a. Chanmari hi vawi hnih bye-in Pre Quarter Final-ah Chaltlang North nen intumin run 230 an siam a, Quarter Final-ah Armed Veng nen intumin run 205 an siam leh a, Semi Final-ah Ramhlun North nen intumin run 150 siam lehin Final-ah Ramhlun venglai nen intumin run 150 an siam a ni.

HSSLC (ARTS) A PARUKNA MALSAWMDAWNGZELA

Pu Siamhnuna (L) tupa Malsawmdawngzela (Mapuia) hi Pu K. Lalthantluanga (Mathana) leh Pi Ramthanpari te fa pahnih zinga a naupang zawk a ni a, February ni 29, 1992 khan a lo piang. Tun tum Class XII Result chhuakah khan Distinction-ah pass-in mark 337 a hmu a, Arts-ah Parukna a ni. An chhungkuain Sec-I, Chaltlang Road-ah an khawsa.

Kg-I atanga Class IX thleng Rosebud-ah a kal. Keifang Presbyterian School atangin Class X a pass-a, Class XII leh XII chu Home Mission-ah a kal thung a ni.

Class XII an luh tantirh atangin inthlahdah lovin mar patin lehkha a zir thin a. Exam leh Test dawnin a zir chiam tawh ngai lem lo. A inkhawm tih lovah chuan pawn lamah a chhuak tam lo. Thian a kawm tam lem lova, lehkha zir bakah Table Tennis khelh nuam a ti hle.

NO GUNS! CAMERA ONLY

Chanmarians in YMA Chhang tana a buatsaih 'Nungcha Humhalh lam hawi' milem inziahsiakah Lalrinawmi, kum 8, Sec-III chu pakhatna a ni.

MINI SPORTS COMPLEX CHEI THAT MEK A NI

Chanmari Mini Sports Complex chei that mek a ni a, thutna eng emaw zat siam belh a ni

CHANMARI VENG NULA CHHUANAWM

Chanmari veng nula, St. Paul’s Higher Secondary School a kal Esther Ngurdingpuii chu kumin HSLC result chhuakah Top 10-ah langin a pum puiah mark 457 hmuin parukna a ni. English, Mathematics, Social Science, Science, Mizo leh IIT-ah te letter a hmu vek a. English subject bikah hian mark 91 hmuin Mizoram pumah a hmu sang ber a ni.

Esther Ngurdingpuii hi Pu KC. Lalremruata leh Pi Saitluangi Sailo te fa pahnih zinga a naupang zawk a ni a, October ni 4, 1994 khan Civil Hospital, Aizawl-ah a piang. A u David Ngursangpuia hi kum 2009 Matric Exam-a Pahnihna kha a ni. Chanmari vengah chuan unauva Matric Top-10 a lang thei hi an vang viau awm e. An chhungkuain Sec-III, Ramhlun Road-ah an khawsa.

Zirna lamah chuan Little Angels leh St. Mary’s ah Primary leh Middle a zova. High School chu St. Paul’s-ah lutin Class XI-ah pawh luh chhunzawm zel a tum. Infiamna lamah chuan Middle School a kal laiin racing events lamah a tithei phian. Chanmari Presbyterian Kohhranah Senior Dept. zirlai a ni a. Zai lam a timi fu, DDK, Aizawlah a zai tawh a, Naupang Sunday School lamah Intermediate Deptt. thlengin a solo thin.

Tum tum Matric Exam-ah hian Top 10 a lan a inring chiah lova. A chhan chu Nursery - Class VII velah chuan Top 5 lang ve ziah mah se, High School chinah chuan a ti tha a in ti lutuk lem lo a ni. Class X a nih kum hian an School bika Exam vawi 5 an neihah a tawp berah 10-na a ni.

Zan lamah lehkha a zir rei ngai lova, dar 7/8 velah a mu tlangpui. Zingah lehkha zir turin a tho hma thung. A tawngtai nasa a, lehkha a zir dawn apiangin a nuin lu chunga kut nghatin a tawngtaisak thin.

A exam dawn hian a chhung ten an pui nasa a, lehkha zir kawngah understanding hi a ngai pawimawh ber a. Class-a zirtirtute thusawi ngaihthlak ngun hi tha berin a hria.

Lehkha zir bakah Sketching leh Drawing hi nuam a ti hle. Math/Bio lak a tum a, Doctor (Super Specialist) nih ngei a tum bawk.

HSLC RESULT CHHUAKAH CHANMARI VENGA SCHOOL TEN TITHA

Chanmari venga school hrang hrangte dinhmun:

Govt. Mizo High School-ah exam 151 an awm a, Distinction-ah 11; Ist Division ah 48; IInd Division-ah 60 leh IIIrd Division-ah 24 in an pass a, Compartmental exam hmachhawn leh thei tur 1 awmin fail zat chu 7 a ni a, 94.70% an pass.

Staines Memorial School atangin exam 59 an awm a, Distinction-ah 4; Ist Division-ah 22; IInd Division-ah 23 leh IIIrd Division-ah 10 in an pass a, Compartmental exam hmachhawn tur leh fail an awm lo a, 100% an pass a ni.

Royal School atangin exam 5 an awm a, Distinction an awm lova; Ist Division-ah 2; IInd Division-ah 3 leh IIIrd Division, Compartmental exam hmachhawn leh thei tur leh fail an awm lo va, 100% an pass.

Vincent School atangin exam 44 an awm a, Distinction-ah 1; Ist Division ah 15; IInd Division-ah 20 leh IIIrd Division-ah 6 in an pass a, Compartmental exam hmachhawn tur an awm lova, fail zat chu 2 a ni a, 95.45 % an pass.

Neuhof School atangin exam 19 an awm a, Distinction-ah 2; Ist Division-ah 11; IInd Division-ah 2 leh IIIrd Division-ah 5 in an pass a, Compartmental exam hmachhawn tur an awm lo va; fail zat 1 a ni a, 94.73 % an pass.

ZORUN CULTURAL CLUB HRUAITU THARTE

Zorun Culture Club, Chanmari chuan April ni 1, zirtawpni zan khan YMA Hall-ah kum 2011-2012 Office Bearers thlanna an nei a. Thlanchhuahte chu heng mite hi an ni:

President Pu Lalzuiliana
Vice President Pu C. Chungliantluanga
Secretary Tv. Lalropuia
Asst. Secretary Pu F. Lalhmangaiha
Treasurer Nl. Lalropuii
Fin. Secretary Tv. H. Thantluanga

CHANMARI MARKET CHEI THA MEK

Chanmari Market tihchangtlun nan bawngsa leh vawksa zawrhna hmun chu glaze tile a phah turin a tul ang ang thawh mek a ni.