Blog Hmelhmang thlak

Vawiin, 31st August, 2009, Rev DE Jones (Zosaphluia) Mizorama Chanchin Tha hril tura a lo thlenni champha vawi 112-na, Ramthar Ni tia Synod-in a puan tak, ni hian Chanmarians Blog hmel tlema tihdanglam hret a ni a, Comments kan dawng thei reng e.

CHANMARI GAMES-2009 ZAN HNIHNA

Chanmari Games-2009 ropuitakin hawng

Chanmari VCP Pu T. Lalhluna chuan Chanmari Games–2009 chu ni 25.8.2009 (Thawhlehni) zan dar 7:00 khan Govt. Mizo HSS Hall-ah takin a hawng.
VCP Pu T. Lalhluna chuan - Ruihhlo do chungchangah thalaite kan theihtawka hma kan lak chuan YMA nih hi a nuam a, kan thawhhohna a that vangin vawiin thlengin Chanmari veng hi a la nuam a ni a ti. Chutih rualin nasa zawka hma kan lak erawh a ngaih thu a sawi lang.
Faina lamah pawh Chanmari veng chu chhung lam leh pawn lamah a thianghlim tur a ni a, chu chu kalkhawmte hian kan tithianghlim thei a ni a ti. Infiamna hmun tha kan nei lo chung pawha kumina Cricket Champion kan ni chu lawmawm a tih thu leh players te inpekna ropui a tiin, a fak thu a sawi lang.
VCP chuan Chanmari Games chu hlawk tak leh hlim taka hmang turin kalkhawmte hi duhsakna a hlan a ni.
Hemi zan hian Section palite chu Badminton-a inelna neih a ni. Mipaah Section - I an champion a, Hmeichhiaah Section-III an champion. Attendance-ah Section-II chu atam ber an ni.

Tunlai Aizawl

Tunlai hian Aizawl khaw chin (Weather) hi a mumal lo. A changin khua a dur a, a changin ni a sa leh uar a, Nau puan pho dan hisap pawh a har thin khawp mai.

Eastern Star - Chanmarians Blog-ah

The Salvation Army Youth Chanmari Corps te buatsaih "Eastern Star" chanchinbu chu Chanmarians Blog-a dah ve tura min rawn ngenna chu remtihsak an ni a, Chanmarians issues hnuaiah hian dah a ni.
Eastern Star hi phek 4 niin Pathianni tuk tin sem chhuah thin a ni. News te, Corps hun ruatna te, General Knowledge te, S.A.Y activities bakah thu tha tak tak chhiar tur a awm a ni.
Eastern Star hi lo chhiar ve ngei turin leh tangkai taka hmang turin duhsakna kan hlan a che.

YMA HALL A HMAN TUR GENERATOR ALO THLENG

Chanmari YMA Hall-a hman tur Diesel Generator (Cummins company siam) 20 KVA chu ni 13.8.2009 (Ningani) zan khan YMA Hall kawngpui an-ah dah fel a ni ta. Eastern Diesel Sales and Service, Silchar hnen atanga lei niin a kalman leh tax tel vekin Rs. 3,50,000 vel man a ni a, quintal 9 zeta rit a ni bawk. Hemi zan hian Branch Executive member-te chuan a dahfel hnatlang hi an thawk. Generator hi Pu Thangkhuma te chhung, Sec-IV te chuan an fapa Pu Lalzuiliana (Zuitea) kum 2008 a boralta hriatreng nan Rs. 3,50,000 an rawn pek hmanga lei a ni a. Generator hi lei fel ni mah se, hman theih tur chuan bun fel a la ngai a. Chumi atana thil tul - Earthing, Ducting, etc., te thawh ala ngai dawn a, hemi ti tur hian Eastern Diesel Sales and Service, Silchar atangin an Service Engineer te rawih an ni ang. Khawl hi kum khat chhung a thlawnin an enkawl zui bawk ang. A bunna senso atan hian Rs. 65,000/- vel lai la ngai tura chhut a ni

CHANMARI GAMES -2009 NEIH A NI DAWN

Chanmari Games 2009 chu August - October thla chhung hian neih a ni dawn. Hei hi Section inelna tur a nih bakah YMA Chhang tana buatsaih a ni. He intihsiakna hi Phase-I leh Phase – II ah then a ni.
Phase-I hi ni 25,27 leh 28 August zanah Govt. HSS Hall leh YMA Hall-ah neih a ni ang.
Phase-II hi ni 21 leh 28, September chhun lamah neih a ni thung ang.
YMA Chhang tan ni 2 leh 3 October chhung hian neih a ni bawk ang.
#PHASE-I (indoor games):- · Badminton · TT · Faifuk · Hnahtum · Chess /Draught · Chinese Checker · Corrom Board · Computer Games · SMS Typing · LTP Dart Throw
#PHASE-II (outdoor games):- · Football·Cricket · Basketball · Volleyball
#YMA CHHANG:- · Football · Sack Race · Boat race · Throw Ball· 100m Race · 200m Race ·Needle Race · Arpa insual · Musical chair.

Chanmari Games hi kum 1982 atang khan buatsaih alo ni tawh a, hemi kum hian Republic High School Field-ah neih a ni.

HNAM LAM INTIHSIAKNA NEIH A NI DAWN

Chief Minister Running Trophy, hnam lam intihsiakna chu ni 24.9.2009 hian Art &Culture leh Central YMA tangkawp chuan a buatsaih leh dawn a. He competition-ah hian Chanmari Banch YMA pawhin tel ve ngei a tum a, hma a la mek a ni. Hnam lam intihsiaknaah hian Chanmari Branch hi kum 1996 khan telin a pumpuiah 2-na lo nitawhin kuminah pawh intihsiakna a lawmman la leh ngei tura tan lak a tum a ni.

Pu Lalchhandama (Chd-a) kan chan ta

Pu Lalchhandama (Chd-a) hi kum 1966 March ni 24 khan Pu R. Sena (L) leh Pi Lalduhawmi (L) te fa pasarih zinga a upa ber niin a lo piang a. Kum 1998 khan Remchhingpuii nen innei in fa pathum an nei a, chungte chu: Lalremsiama, Lalsangzuali leh Malsawmdawngkima te an ni. Nupui a neih hma hian Section-II, Chanmari-ah hun eng emaw chen a khawsa a, nupui a neih hnu hian Tuikualah an insawn ta a ni.

Lalchhandama hi mi kawm nuam, hmangaihna ngah, nelawm leh tawng tlem tak a ni. Chhungkaw huikhawmtu ber niin a naute chungah nu leh pa nih a tlin hle.

Ni 3.8.2009 (Thawhtanni)-a a zing tho chu a thaw a hah deuh avangin Kulikawn Damdawiinah a va inentir a, admit a lo remchan loh avangin Aizawl Civil Hospital panpui leh a ni a, chutah pawh chuan khum a awm loh avangin Newlife Hospital, Chanmari-ah kalpui niin admit a ni.

Hemi hnu pawh hian a thawhahin ziaawm lam a pan thei chuang lova, oxygen pek a ni. A tuk ni 4.8.2009 (Thawhlehni) zing dar 4:35 khan chatuan ram min lo pansan ta a ni. A ruang hi Tuikual vengah vui a ni.

Lalchhandama unaute hi Chanmari vengah an la khawsa vek a, chungte chu:

1. Lalchhuanawmi w/o Lalthafamkima
2. Ramfangzauvi (L)
3. Helen Zarzoliani w/o Vanlaltluanga
4. Vanlalsangi w/o Lalhmangaiha
5. Lalrindika h/o Lalruatkimi
6. Laltanpuii

NAUPANG ENKAWL THAT A PAWIMAWH

Tunlaiin naupang pawikhawihna avanga thihna hriattur a awm zeuh zeuh ta mai. Hei hi a pawi hle a ni. Naupan lai atanga thil tha inzirtir lo a, puitlin hnua thil tha inzirtir leh hi a sawt mawh khawp mai. Naupang chu a kalna awm kawngah zirtir ula, a upat hunah pawh a thlah lovang tih a nih angin fanau te hi khawvel ro sum leh pai aia hlu an ni tih hriat chian a pawimawh.

Naupang enkawl chungchangah nu leh pate mawhphurhna a sang hle a. An thian turte thlenga thlansak a tul hle. Nu leh pa thenkhat chu fate chhan ti na em em, an sual a ni tih hriat reng pawha midangte puh tlat emaw zeppui tlat an awm thin. Chung zingah chuan naupang an tha thei lo. Naupang thil ngen a piang pek tum ringawt mai te hi a thatlohna tam tak awm thei. Naupang duat kawngah pawh fimkhur a tul khawp mai, duat sual awl tak an ni.

Chutih rualin naupang zirtirna tha dawng ve pha lo tam tak an awm thei bawk.

Juvenile Justice Act hnuaiah Sorkar chuan naupangte nasa lehzuala humhim a duh a. Thuchhuah a siamah chuan naupang kumtlinglo thiltih sual vanga man te chu police thuhnuaiah emaw, jail-ah emaw kum 3 chhung aia rei an tang tur a ni lo a ti.

Child Welfare Committee pawhin naupang enkawl leh chhanchhuah ngaite chungchang hi chawlhkar tin; thawhlehni emaw, nilaini emaw hian ngaituahin an thukhawm thin.

Naupang enkawl leh venhim ngaite vengchhungah an awm chuan Child Welfare Committee-ah hriattir thin turin Chanmari Branch YMA chuan veng mipuite a ngen.

KAPNGHINGI KAN THEN TA

Kapnghingi (74) Sec III hi ni 15.1.1936 ah Pu Pu Liantawna (L) leh Pi Chalchhingi Rokhum (L) te inkarah Chawngtui ‘S’ ah a lo piang a, unau panga zinga a milai a ni. Amah hi puantah leh la phiar thiam tak a ni a, puantah zirnaah lawmman pakhatna alo la tawh nghe nghe a ni. Mi bengvar, rualpawl thiam tak, mi vawikhat a hriat tawh theihnghilh leh ngai tawh lo mi a ni.

May thla khan Greenwood Hospital-ah Chuap Cancer a ni tih hmuhchhuah a ni a. Nazareth Hospital-ah theihtawp chhuaha enkawl zui niin ni 31.7.2009 (Zirtawpni) zan dar 8:10 khan chatuan ram min lo pansan ta a ni.

Chanmari Branch YMA chuan khawhar chhungte a tuarpui tak zet a ni.