KUM 2010 CHHUNGA KAN SUN TE

Kum 2010 chhungin veng chhungah mi 22 (Mipa-10; Hmeichhia-12) ten chatuan ram min lo pansan ta. Hriat theih chinah Ruangchhuak 3 leh Ruangkhual 4 an awm.
Pi Lalbiaktluangi (57), Sec-IV ni 10.7.2010 a boral leh Lalenkawli 34, Sec-III ni 11.4.2010 a boralte an thlalak kan nei remchang lo tlat mai.

Chanmari Branch YMA chuan lusun chhungte a tuarpui takzet a ni.

KUM 2010 BRANCH YMA SUM DINHMUN

Kum 2010 chhunga Branch YMA sum chu Auditors-a ruatten uluk leh dik takin an endik a, hetiang hi kan sum dinhmun chu a ni e:

CHANMARIANS AWARD 2010 SEM A NI

Chanmarians-in Award a siam hmasakber ‘Chanmarians Award 2010’ chu December ni 28, 2010, thawhlehni zan khan sem a ni a. Best Article Award leh Best Contributor Award chu Pu P. Lalnithanga, Section IV hnenah hlan a ni.

Thuziak tha ber ‘Best Article’ lawmman hi kum 2010 chhunga Chanmarians-a mimal leh pawl 20 te thuziak 51 atanga endik niin Pu P. Lalnithanga thuziak ‘A tawp a that dawn phawt chuan a hmanrua chu eng pawh ni rawh se’ tih chu thlan a ni a. ‘Best Contributor’ lawmman hi kum 2010 chhunga Chanmarians-a thuziak hnember, Article 8 ziaktu Pu P. Lalnithanga hnenah vek hlan a ni. Lawmman hian thuziak leh pawisa fai a keng tel a ni.

He lawmman semna hi Chanmarians Joint Editor Pu David Lalmuankima’n kaihruaiin lawmman te hi Chanmarians Editor Tv. H. Thantluanga’n a hlan a. Lawmman te hi Pu P. Lalnithanga nupui Pi Zopari’n a dawng.

2011 HRUAITU

December 28 Thawhleh zan khan kum 2011 chhunga Chanmari Branch YMA O.B thlanna neih a ni a, heng mite hi thlanchhuahte an ni:

KRISMAS LEH KUMTHAR CHIBAI !

V. Vanlalhruaia kan then ta

Pu V. Vanlalhruaia (41), Sec-III, Presbyterian Kohhran hi Pu V. Sawivela (L) leh Pi Rochhungi te fa pali zinga a upa ber niin November ni 9 1969, khan Aizawlah a lo piang a. Naupanlai atanga nu leh pa thuawi leh lehkha thiam thei tak a ni a.

Kum 1989 khan Chanmarians Circulation Manager a lo ni tawh. Kum 1985 ah St. Paul’s School atangin Matric Distinction-ah pass-in PU College-ah PU zir zovin kum 1989 ah RIMS, Manipur-ah MBBS zirin kum 1999 khan a zir zo va. Kum 2003 ah Nukimi, Sangau nen ineiin fapa pahnih an nei.

Sangau leh Borapansuri Medical Health Centre, Seventh Day Adventist, Greenwood leh Pushpak Hospital-ah te a thawh hnuah kum 2008 ah Medical Health Centre, Bualpui NG ah Medical Officer in a awm a. December ni 20, 2010, thawhtanni khan chatuan ram min lo pansan ta a ni.

V. Lalhmingthangi kan then ta

Pi V. Lalhmingthangi (60), Sec-II Presbyterian Kohhran hi kum 1951 khan Upa Khawlbuaia (L) leh Pi Saihnuni Pachuau te inkarah a lo piang a, unau 10 zinga 4-na a ni. Kum 1983 khan Thangnunmawia nen inneiin fa 3 an nei.

Amah hi mi nun zawi leh zaidam, mi huatthu sawi hlau tak, mi taima leh thawh hreh nei lo a ni. Kum 1987 khan eizawnna avangin Tlangnuam atangin Chanmariah an rawn pem.

Pi Hmingi hian hun eng emaw chen a tang khan insawiselna a lo nei tawh a. December ni 17 khan a ek a thi a, Civil Hospital panpui niin nikhaw hre lovin a awm zui a, ni 19 ah ICU ah dahluh leh a ni a. December ni 22, nilaini zing dar 5 ah chatuan ram min lo pansan ta a ni.

VENGCHHUNGA DUTY TUR RUAT FEL A NI

Chanmari Branch YMA chuan Krismas leh Kumthar laia vengchhung a muanawm theih nan duty tur a ruat a. Heng duty tura ruatte hian December ni 15, nilai zan khan YMA Hall-ah inhmuhkhawmna an nei.

He hun hi Branch YMA President Pu Laldinpuia Sailovin kaihruaiin Vice President Pu Lalhmangaiha’n duty a tulna chhan a sawi. Pu Laldinpuia Sailo chuan “Chanmari kan siamthat rualin Aizawl khawpui kan siamtha a, Mizo nun kan siamtha a ni” a ti.

Duty tur hian Branch YMA chuan Branch Executive Member mipa zawng zawng leh Section Committee Member mipa zawng zawng bakah vengchhung atangin mi engemaw zat a ruat a. Duty tura ruat te hi Group 5 ah then niin Group tin hian Leader leh Secretary neiin Group tin duty hun tur siam a ni a. Group 1 in December ni 16 zan atanga bul tanin Group tinin a inchhawkin ni 30 zan thleng an duty ang a, ni 31 zanah erawh chuan Group zawng zawngte a huhova duty tur a ni. Duty tura ruatte hi an vaiin mi 227 zet an ni.

Chanmari Branch YMA chuan duty tura ruatten taima taka an mawhphurhna hlen tur leh mipuite pawh duty te tawiawm turin a ngen a ni.

CHANMARI KAWN CHEI

Chanmari kawn chei hna thawh mek a ni a, chei zawh a nih hma hauh pawhin tlawhtu a nei ngah hle

Ramfangzauva kan then ta

Pu Ramfangzauva (60), Sec-III, Presb-yterian Kohhran hi Pu Lalhleia(L) leh Pi Sanglianthangi te inkarah ni 7.3.1947 khan a lo piang. Amah hi pa kawm nuam, nelawm, zaidam leh tu leh fate ngaihsak tak mi a ni. Kum 1978 ah VL Remliani d/o Lalrozama (L), Chanmari nen inneiin fa 4 leh tu 1 a nei.

Kum 1973 Sub-Inspector, MRP-ah tlingin MPS thleng a kaisang a. Tuna a awm mekna 3rd Battalion MAP-ah hian Assistant Commandant hna a chelh mek a ni.

Tunhnaia kawng na leh pum nuam lo a neih avangin December ni 8 khan Presbyterian Hospital, Durtlangah admit a ni a. Thawk buai avanga oxygen pek a nih hnuah hemi zan dar 9:50 hian chatuan ram min lo pansan ta a ni

ZORUN CULTURAL CLUB PAHNIHNA

December 3-4 khan Bethlehem Cultural Club-te buatsaih hnam lam chi thum - Chawnglaizawn, Cheraw [Buhzaaih] leh Sarlamkai hmanga intihsiak Bethlehem venga neih zawh takah Dingdi Cultural Club, Dinthar chu pakhatna niin Rs. 10,000 an dawng a, pahnihna chu Zorun Cultural Club, Chanmari an ni a Rs. 7,000 an dawng a, pathumna chu Bethlehem Cultural Club niin Rs. 5,000 an dawng bawk.

K. LALTHANZAUVA KAN THEN TA

Pu K. Lalthanzauva (71), Sec-III, UPC (Mizoram) hi Nonuaia leh Khuangzangi te fa 5 zinga a mi laihawl niin kum 1941 khan Champhaiah a piang a. Pathian rawngbawlna ngai pawimawh mi niin tlangval lai atangin rawngbawlin a chhuak thin a ni.
Kum 1971-ah Laii nen inneiin fa 8 an nei a. Kum 2003 atangin Chanmari vengah khawsa tanin sciatica leh ruh enkawl thiam a ni.
Kum 2007 atangin lungna leh zunthlumin a tlakbuak tan a. Damdawi inah tum hnih enkawl a nih bakah Tahan-ah enkawl a ni bawk. Theihtawp chhuaha enkawl a nih laiin November ni 27, 2010 inrinni chawhma dar 10:50 khan chatuan ram min lo pansan ta a ni. A ruang hi tlaivar pui a ni h hnuah YMA Hall- ah vui a ni.

LALROZAMA KAN THEN TA

Pu Lalrozama (85), Sec-IV, Presbyterian Kohhran hi Kamliana (L) leh Saikapchhungi (L) te fa 11 zinga a upa ber dawttu niin kum 1929 khan Keifangah a lo piang a. Kum 1950 ah Assam Regiment-ah tangin kum 1966 khan Havilder Major- in a pension a ni.
Kum 1954-ah Vanthuami nen inneiin fa 6 an nei a. Keifang VC Secretary, VCM, Keifang Presbyterian Kohhran ual Upa, Sunday School Zirtirtu leh Hnamdang Christian Fellowship Chairman hmasa ber leh Saitual Branch Bible Society Treasurer-te lo ni tawh thinin tunah hian Chanmari Presbyterian Kohhranah rawngbawltu a ni.
Tun hnai khan stroke a nei tih hriat a ni a, damdawi inah kalpui niin November ni 22, 2010 thawhtan zan dar 10:40 khan chatuan ram min lo pansan ta a ni. A ruang hi tlaivarpui a ni.

THLANMUAL HNATLANG

November ni 20 Inrinni zing khan vengpum huap thlanmual hnatlang neih a ni a, member 370 chuang zet an thawk chhuak. Hnatlang hi zing dar 6:30 ah tanin dar 9 ah zawh a ni.

He hnatlangah hian thlan laihna tur terrace laih belh a nih bakah terrace awm sa siam rem a ni. Hei bakah thlanmual pan thlakna kawnga hnim leh thlanmual chhung hnim sam leh bawlhhlawhte thenfai a ni bawk.

CHANMARIANS CRICKET CLUB CHAMPION

November ni 20 Inrinnia Ramhlun Sports Complex-a President Cup vawi 4-na Final khelh zawh takah Chanmarians Cricket Club chuan an tumpui Lords Cricket Club, Zarkawt chu run 65 a hnehin an Champion. He tournament-ah hian team 16 an tel.

Chanmarians Cricket Club te hian bet hmasain overs 30-ah run 135 an siam a, Lords te hian run 70 siamin Chanmarians Cricket Club te hian run 65-in hnehna an chang a ni. Champion hian lawmmanah Rs. 10,000/- , Trophy leh Certificate an dawng.

Powerlifting Championship-ah Chanmari tlangval chhuanawm

Tv. T. Malsawmtluanga s/o Lalthuama, Sec-I chu Ramnghinglova Memorial Powerlifting Championship - 2010, Aizawl Govt. Mizo High School Indoor Stadium a neih zawh takah below 82.5 kg-ah 2-na a ni.

J. Vanlalawmpuia kan then ta

Pu J. Vanlalawmpuia (38), Sec-II, Presbyterian Kohhran hi Pu Liankhuma leh Pi Laltluangi te fa 5 zinga a naupang ber dawttu niin July ni 3, 1972 khan Chanmari vengah a lo piang a. Kum 2002 khan Rongeni, Hortoki khua nen inneiin, fapa 1 leh fanu 3 an nei.

Amah hi mi ngawichawi leh inthlahrung thei tak, thiante tana in pe zo leh mi thilphal tak a ni.

Thatlohna hriat a nih loh laiin November 12, 2010 (Zirtawpni) zan dar 9 vel khan a buai thut a, nikhaw hre lova a awm chu Newlife Hospital panpuiin dar 10 vel khan chatuan ram min lo pansan ta a ni.

Dosangi kan then ta

Pi Dosangi (60), Sec-IV, Presbyterian Kohhran hi Pu Vanlalauva (L) leh Pi Neihthangi te fa 6 zinga palina niin June 27, 1950 khan Phuaibuangah a lo piang a. Pu Lalthuamluaia Sailo nen inneiin fanu pakhat an nei.

Amah hi naupan tet atanga Pathian tih mi niin Pathian rawngbawlna a ngaih pawimawh bakah YMA active member a ni thin.

Kum 2005 khan a Khingkhangruh a cancer tih hriatchhuah a ni a. Phai lamah inenkawl tura kal thinin kumin August thla khan Mumbai-ah in check-up in a kal leh a. Hetia enkawl chhoh a nih lai hian November ni 12, 2010 (Zirtawpni) zing dar 5 khan chatuan ram min lo pansan ta a ni.

Lalremliana kan then ta

Pu Lalremliana (47), Sec-IV, Presbyterian Kohhran hi Subedar Chhawna leh Pi Darpuithluaii te fa 5 zinga a naupang ber niin June 16, 1963 khan Shillong-ah a lo piang a. Kum 1995 khan Mercy Lalnuntluangi nen inneiin fapa pakhat an nei.

Amah hi thenrual kawm thiam, mi pawisawi ngai lo leh mi nun ngil tak a ni a. Mi tlawmngai, midangte puih hreh ngai lo leh thlanlaih taima tak a ni.

Kumin kum tir lam khan motor accident tawkin a khelruh tliak chu enkawl dam a ni a, eizawnna pawh a chhunzawm leh tawh a ni. November 8, thawhtanni zingah luakin a thaw te a hah a. New Life Hospital panpui niin November 9, 2010 (Thawhlehni) zing dar 12:20 khan chatuan ram min lo pansan ta a ni.

COUNCILLOR ATAN PU ROSIAMNGHETA THLAN TLIN A NI

November ni 3 (Nilaini) a Aizawl Municipal Council inthlanah Ward No.5-ah MNF leh MPC Candidate Pu Rosiamngheta, Sec-II chuan a khingpui Congress leh ZNP Candidate Pu JH. Ramnghinglova, Sec-III chu 2513-2457 a hnehin chakna a chang. Ward No.5 hian veng pathum Chanmari, Zarkawt leh Electric vengte an awm a, vote nei zawng zawng mi 8216 an awm a, vote thlak hi mi 4934 niin 60.05% a ni. Aizawl Municipal Council inthlanah hian vote nei mi 1,68,649 an awm a, vote thlak hi mi 107260 awmin 63.60 % a ni.

A chanchin tawi:
Pu Rosiamngheta hi kum 1964, September ni 7 khan Zarkawtah Pu Chuauhnuna Inah piangin Pu B. Lalnghaka leh Pi Thanthuami te fa 5 zinga a mi lai a ni. Tunah hian a nupui Pi Rohmingthangi nen fa 3 neiin Chanmari veng, Section-II ah an cheng mek. Aizawl Theological College (ATC)-ah kum 1990 khan B.Th tha takin a zo a, Hrangbana College-ah BA a zawh hnuin Mizoram Law College-ah LLB a zir leh mek a ni.

Amah hi khawtlang leh kohhrana mi inhmang, tanpui ngaite tanpuina kawnga tlanchhe ngai lo a ni. Presbyterian Kohhrana lawi a nih angin a lawina kohhranah Branch KTP Leader, Group hruaitute niin Chanmari Pastor Bial-ah Bial KTP Leader term 3 zet a lo chelh tawh bawk. Tunah hian Chanmari Kohhranah Building Committee member ni lai a ni.

Chanmari Village Council (VC) ah Term 4 tlan tlin a ni a, term 3 a VCP nghe nghe. VCP a nih chhung hian khawhar inahte riakin, tun thleng hian thlan laih a la bang lo. Chanmari Branch YMA-ah pawh OB lo ni tawhin tunah hian Archery Association of Mizoramah Sr. Vice President a ni. VCP a nih chhung hian khawtlang enkawlna kawnga thawk tha leh hmalakna nei ropui berte zinga mi niin June ni 14, 2010 khan khawtlang a enkawl that avangin ‘Great Idol of Humanity Award’ chu Governor M.M. Lakhera’n a lo hlan tawh a ni. MHIP in Tiranga do beipui an thlak hma hian Chanmari vengah kum 2008 khan khapna order a lo chhuah tawh a ni. Tin, pawl thenkhatin ‘tukluih donation’ an khawn thin pawh hneh takin a lo khap thei a ni.

HALL SAK HNA CHHUNZAWM

October ni 21 (Ningani) zan leh ni 28 (Ninngai) zan khan Hall Main Gate bul chu laih tan a ni a, lei hi kawngpui rual deuh thawin laih a ni. Hemi zan hian tripper pahnih hmangin lei hi paih a ni. Hnatlangah hian Branch hruaitute an thawkchhuak tha hle.

TANPUI NAN VEHBUR KHAWN A NI

October ni 30 (Inrinni) zing khan Chanmari Branch YMA chuan Mamit leh Ngopa leikhi leh lei
tlahniam tanpui nan Vehbur khawn hnatlang vengchhungah a nei a Rs. 99,887 lai hmuh niin Branch YMA in Rs. 5000 a thawh nen tanpuina thawhlawm hi Rs. 1,04,887 a ni.

Chanmari Branch YMA bakah hian MHIP, Chanmari Branch te chuan Mamit leikhi leh lei tlahniam tuarte tanpui nan Rs. 5000 an lo pe tawh bawk a ni.

VENGCHHUNGAH TIRANGA VAI

October ni 30, 2010 (Inrinni) khan Chanmari Branch MHIP te chuan vengchhunga Tiranga vai hnatlang an nei a, Tiranga pocket 300 zet main he mi ni hian an hal ral ngal.

CHAWNGTHANGPUII KAN THEN TA

Pi Chawngthangpuii, kum 88, Sec-III, Seventh Day Adventist Kohhran
hi Pu Bawrhsaia (L) leh Pi Darrokungi (L) te fa 10 zinga 5-na niin kum 1922 khan Lunglengah a lo piang a. Kum 1946 khan Pu Lalawma nen inneiin fa 11 an nei. Kum 1976 ah Khawrihnim atangin an lo pem a. Fate enkawl kawnga mi entawntlak tak niin tawngtai ngaina tak a ni. Naupan laia bawrhsawm tak ni mah se, puitlin hnuah erawh hrisel tha tak leh damlohna pawh nei ngailo a ni. Kum 80 a kai hnuah Pnuemonia natnain a tlakbuak a. Kumin September leh October thla khan Asthma leh natna dang vangin Nazareth Hospital panpui a ni a. Theihtawpa enkawl a nih mek laiin October ni 25, thawhtan zan dar 7:40 khan chatuan ram min lo pansan ta a ni. A ruang hi tlaivarpui a ni.

LEITLANGPUI RUNAH CHANMARI BRANCH YMA

YMA General Conference vawi 65-na Leitlangpui Run, Thuamluaia Mual, Lungleia ni 19-21 October chhunga neih chu tluang takin zawh a ni ta. Kum 2011 Conference chu Kolasibah nghah a ni ang a, kumpuan atan Khawtlang nun siamthat tih chu thlan nawn a ni.

Palaite: 1.Pu Laldinpuia, President 2.Tv. Lalengliana, Secretary 3.Pu Lalfakawma,Treasurer
Executive Member-te:
4.Tv. Zoramthara 5. Pu Richard Lallawmzuala 6.Tv. H. Thantluanga 7.Pu R. Lalhmachhuana 8.Pu David Lalmuankima

Leitlangpui Runah laichhuat an chhir e!!

Pandal hmalama tuichik leh Mini Garden ten pandal a cheimawi hle

Chanmari atanga Conference kalte leh Pu R. Lalzidinga, Ex-President, Chanmari Branch YMA

ZOTHANSANGI KAN THEN TA

Nl. Zothansangi Ralte (30), Sec-I, Baptist Kohhran hi Pu R. Kaikima leh Pi Thanthuami te fa 4 zinga a upa ber dawttu niin April ni 8, 1980 khan Buarpuiah a lo piang a. Amah hi mi ngawichawi, mi pawisawi lo leh thian pawh pawl tam lo a ni. Zirna lamah M.A.,B.Ed. niin a hun tawp thlengin Highlander School-ah zirtirtu hna a thawk a ni. TKP Chanmariah a kul a taiah a inhmang a, Executive Committee Member leh Programme Committee Member a lo ni tawh thin a ni.

Kumin July thla atanga insawisel tanin damdawiin hrang hrangah enkawl a ni a. October thla khan pumpui cancer a ni tih hmuhchhuah a ni a. Theihtawpa enkawl a nih hnu October ni 22 zing dar 11:45 khan chatuan ram min lo pansan ta a ni.

RISING DAY VAWI 52-NA HLIM TAKIN HMANG

October ni 16 (Inrinni) zan dar 8 khan YMA Hall-ah Chanmari Branch YMA din kum 52-na lawmna leh Chanmari Games 2010 kharna hun hlimawm tak hman a ni a, Pu Laldinpuia Sailo, CBYMA President in he hun hi a kaihruai. Pu Lalhmangaiha, Vice President chuan khawtlang nun siamthat leh thalaite mawhphurhna a sawi a. Tv. Lalengliana, Secretary hnen atangin report ngaihthlak a ni bawk.

Baby Malsawmtluangi leh Mimi Lalzamliani

Zorun Culture Club te'n Buhzaaih an entir

Section I leh III ten an thiam an lantir e. Tv. Thawmmawia a'n chet meuh chuan YMA Hall a nghin in a nghing a ni ber e!!!

Section IV leh II ten mi an chawkhlim e.. hranghlui Tv.Lawmsanga pawn a la duai lohzia a lantir leh ta...a hun tea rah thin mi hi Section tan malsawmna a ni.

YMA General Conference-a chan tur shortplay chu mipuiten an thlir ning mawlh lo...