YMA HALL SAK CHHUNZAWM MEK A NI

YMA Hall sak chhunzawm mekah hian Sub-Centre dinna hmun chu a hnuai kawngpui level-a laih tur a ni a. Kawng level-ah hian RCC building sak tum a ni. Hall nen a inzawma beam siam tur niin hei hi godown atana ruahman a ni. A lei awm dan a zirin kawngpui hnuaiah RCC tankey siam tum a ni bawk. Godown chung hi hall main entrance a ni ang a, VIP tan hall gate thlenga motor kal theih tur ruahman a ni. Chhuah lam sirah hian VIP motor (light vehicle) pali vel park theih tura duan a ni.
Main entrance/ parking chung hian tuna kan hall hman lai hi a an ang a, chu chu railing tha taka hungkualin hall kawt zawl tur a ni ang. Main entrance atang hian main hall chhunin step a kal chho ang a. Main hall bul leh a chung (chhawng 3na) chu committee room tur a duan a ni.

RUIHHLO THAHNEM TAK HAL RAL

July ni 21, 2010 zing dar 7:00 khan Pu Vanhela Pachuau Chief Secretary, Mizoram chuan Central Anti Drugs Squad ten Ruihhlo an man, Excise/Police hnena hlan bang te chu Central YMA Hall kawtah a hal ral. Ruihhlo hal ral te :-

1. Parvon/Proxyvon - 25,891 Capsules
2. No 4 (Heroin) - 5 Hawng, 150 Cans, 100 Caps
3. Nitrosun - 450 Tablets
4. Ganja - 5 Kgs

Heng bakah hian Police/Excise a pek tawh zat chu hetiang hi a ni :-

1. Parvon/Proxyvon - 15,817 Capsules
2. No. 4 (Heroin) - 14 Hawng, 108 Cans, 180 Caps
3. Nitrosun - 180 Tablets
4. Ganja - 47 Kgs.
5. Police/Excise a pek - Mi 45
6. Home a dah - Mi 8

CADS te Ruihhlo man tawh zawng zawng hi (Ni 29th May - 20th July, 2010) Rs. 36,60,286.00 man a ni.

ZCC IN HNAM LAM ENTIR DAWN

Zorun Cultural Club member mi 15 chuan August ni 1-2 chhung hian Secundarabad-a Missile Regiment-ten Rising Day vawi 48 an lawmna turah hnam lam an entir dawn. July ni 27 tlaiah Aizawl chhuahsanin August ni 7-ah Aizawl an rawn thlen beisei a ni.

Art & Culture Deptt. atangin Tv. Vanlalhuma Singson, ZCC committee member ni mekin a hruai dawn a. ZCC hruaitute atangin Nl. Lalrinsiami, Tv. Lalengliana leh Tv. Lalropuia ten an kalpui bawk ang.

LAND RECORD SURVEY NEIH A NI DAWN

Chanmari Branch YMA chuan veng chhung in tinah kalin Land Record Survey a nei dawn a. He Land Record Survey hi Mizoram sorkar leh Central YMA hmalak hona a ni. Land Record Survey atan hengte hi phut a nih dawn avangin mipuite lo inring lawk tura hriattir an ni :

1. Pass neih zawng zawng (veng dang leh khaw danga ram/hmun pass zawng zawng nen)
2. Pass chhunga building awm zat
3. Eng ang building nge
4. Man chawia luah hran tir zat
5. Thlatin in luah tir man
6. Chhungkaw hotu ber hming, permanent address, eizawnna, Phone No. leh House No.
7. He venga awm tan kum.
8. Khawi khua atanga lo pem nge.
9. Chhungkaw memberte hming, kum zat, hnathawh leh chhungkaw hotu ber nena inlaichinna 10. Electoral Photo ID. He Survey laia telh loh te chu ram leh hmun nei lova ngaih an ni ang.

Chanmari Br. YMA chuan survey dik leh tha tak neih a nih theih nan survey titute lo tawiawm turin mipuite a ngen a ni.

OFFICE ASSISTANT HNA DIL THEIH

Chanmari Branch YMA chuan Office Assistant tur a mamawh a, diltu chu mipa ruihtheih thil laka fihlim, computer leh sound lama thiamna nei an ni tur a ni. Dilna hi July ni 30 aia tlai lovah Pu Lalhmangaiha, Vice President, CBYMA (Di-Din Drug Store, Chanmari Presbyterian Kohhran Biak In bul) hnenah ziaka thehluh tur a ni a, mahni Bio Data chiang takin an ziak lan tur a ni a, Chanmari veng ni lo, veng dang atanga diltute chuan an awmna Branch YMA hriatpuina lehkha thil tel tur a ni.

Interview : July ni 31, 2010 (Inrinni) chawhma dar 10:00
A hmun :Chanmari YMA Hall
Hlawh :Rs. 4,500/-

CHANMARIANS SEMTUTE LEH AGENT TE PUALIN HUN HMAN A NI

July ni 17 (Inrinni) chawhma dar 11 khan Chanmari YMA Hall-ah kumin chhunga Section hrang hranga Chanmarians semtute leh Agent-te pualin hun hman a ni a. Chanmarians semtu naupang 80 an kal. He hun hi Pu Lalhruaitluanga Sailo, Jt. Editor in kaihruaiin vengchhung tana Chanmarians pawimawhna leh a semtute mawhphurhna pawimawh zia a sawi.

LENGKHAWM ZAI INTIHSIAK

Central YMA buatsaih Lengkhawm zai a Branch hrang hrangte intihsiakna tur kumin August ni 26 & 27 hian neih a ni dawn a. Intihsiakna tur hi hla pathum thlanchhuah tawh a ni a, chungte chu:

1. Hnam ka len nuam mang e
2. An va hlu em thil nung tinreng
3. Eden hlui hi kan hnuchhawm ram a ni.

Chanmari Branch YMA pawh he intihsiaknaah hian a tel dawn a. Hla zirna hmun tur chu YMA Hall-ah a ni ang. A hun leh ni chu Chanmarians-ah tarlan a ni ang. Chanmari Branch YMA chuan veng nula leh tlangvalte bakah lengkhawm zaia tui nu leh pate pawn tawiawm thin thin turin a sawm a ni.

CHANMARIANS SEMTUTE PUALIN HALF YEARLY MEET NEIH A NI DAWN

July ni 17, 2010 (Inrinni) chhun dar 11 hian Chanmarians semtute pualin Half Early Meet neih a ni dawn a, Section tin a CHANMARIANS SEMTUTE leh Agen-te YMA Hall-ah kim taka kalkhawm tur a ni. Section hruaitute leh nu leh paten Chanmarians semtute hi he hun ngai pawimawha lo ngaihvenpui tura ngen an ni.

V/C GAS CARS SIAM THAR HMANGIN GAS SEM TAN A NI DAWN

Chanmari vengchhunga gas card siamthar chu peih fel a ni tawh a, gas sem leh hun hmasaberah he card hi hman a ni tawh ang a, gas bur 250 sem thin chu bur 20 a tihpun a ni ta bawk.

Gas sem leh hmasaberah point 5-ah sem phawt a ni ang. Hetiangin: 1. Custom Office kawt - Card No. 1-55; 2. Pu Laibuaia kawt - Card No. 1-55; 3. YMA Hall kawt - Card No. 1-55; 4. Pu Vanlalchhawna kawt - 1-55; 5. Pu C. Roliana kawt - 1-50. A bak point thum- Brig. Vankunga Point, Pu H. Thansanga Point leh Pu Lalnghinglova Point te chu a hnu lamah sem leh tur an ni.
Card hi Chanmari venga cheng, Biakkungi Gas Agency Consumer card nei tawh phawt chuan neih theih vek a ni a, chutihrualin chhungkaw pakhat tan gas card pakhat bak neih awih a ni lo. Gas card-ah hian a lakna tur point hming leh number tarlan a ni. Mahni gas card a point hming tarlanna lovah lak theih a ni dawn lova. Distribution point tina gas la thei tur number hi Chanmariansah tarlan thin a nih dawn bakah mic-ah puan thin a ni bawk ang a. Number-in a huam chin a tel ve lote chuan mahni lak hun nghah tur a ni.

Chanmari VC leh YMA chuan rualkhai zawk leh awlsam zawka gas lak a nih theih nan ruahmannate zawm turin veng mipuite a ngen.

Pi F. Lalbiaktluangi kan then ta

Pi F. Lalbiaktluangi (57), Sec-IV hi Pu F. Chhanlinga leh Pi F. Zaikungi te inkarah kum 1953 khan Darzoah a piang a. Unau 14 zinga a upa ber atanga pangana a ni. Pu R. Lalrinawma nen inneiin fa 4 leh tu 6 a nei.

Kumin February thla tir atang khan insawisel tanin, March thla khan a cancer tih hmuhchhuah a ni a. In lamah enkawl niin chemo vawi 6 khai turah vawi 5 khai a nih hnu, July ni 10 chawhma dar 9:50 khan chatuan ram min lo pansan ta a ni.

MHIP DAY VAWI-36 NA ROPUI TAKIN LAWM A NI

July ni 6, 2010 (Thawhlehni) khan MHIP Day vawi 36-na chu Chanmari Branch MHIP te chuan chawhma dar 11 khan Chanmari YMA Hall-ah ropui takin an lawm. He hunah hian Pu PC. Lalthanliana, Hon’ble Minister of State, LAD & SWD chu Chief Guest niin Pi Zothankimi, Chairman, SSWB chu Guest of Honour a ni.
MHIP Day-ah hian Jewel Lalthasangzeli Fanai d/o A. Zohmangaiha, Sec-IV, Mizorama Commerce stream-a topper leh Nl. Rosy K. Remsangpuii, Sec-II, Lelte Weekly Magazine-in Female Gospel Singer of the Year-2010 a hlan hnenah lawmpuina certificate hlan a ni a. Essay lawmman sem niin, Charity Loan mi 45 hnenah Rs. 5,000 theuhvin sem chhuah a ni. Life member certificate mi 14 hnenah hlan a ni bawk.

THLANMUALAH ELECTRIC BAN PHUN FEL A NI TA

June ni 30 (Nilaini) khan Branch Executive Committee te chu thlanmualah electric ban phunin hnatlang an nei a, mi 20 chuang an thawkchhuak. Cement, balu leh rawra te hi thlan siamten an hman ban, a mamawhte tana hman tura thlan ina an dah atangin hman a ni.
May thla tawp lam khan electric ban 5 phunin thlanmual hnatlang hi neih a lo ni tawh a, electric hi thlanmual mawng atanga pawh chhoh tur a nih vangin electric ban pangate hi thlanmual mawng lamah phun a lo ni tawh a ni. Kar hmasa lam khan Thlanmual in electric wiring zawh fel niin connection pawh tihfel thuai beisei a ni.

ZORUN CULTURAL CLUB DEPARTMENT LAM ATANGIN ENDIK A NI

Zorun Cultural Club te chu Art &Culture Department chuan in register tura an tlin leh tlinloh endik turin mi pathum an rawn tir a. Department lam atanga rawn kal ten ngun tak, dik leh fel takin an rawn en a. A result hi karleh lamah Department lamah sawiho a nih tur thu leh chumi hnu lamah chuan a result chiang taka hriat a nih tur thu an sawi.

Zorun Cultural Club hruaitute chuan member-te, nu leh pa te leh phal taka Hall hmantirtu CBYMA chungah lawmthu an sawi.