KAN THEN TAK

Lalrinkimi (Kimkimi) hi Pu Lalthlamuana leh Pi Zadingpuii te fa panga zinga a naupang ber niin September ni 21, 2004 khan Aizawl Civil Hospital-ah a piang a. An unau upat dan indawt chu hetiang hi a ni :
    1.     Lalhmuchhuaki
    2.     Lalremruata (L) [Sen laia thi]
    3.     Lalpekmawia
    4.     Lalhmangaihzuali
    5.     Lalrinkimi
    Lalrinkimi leh Lalhmangaihzuali te hi phir an ni.
    Lalrinkimi nu Pi Zadingpuii hi Pi Selzami Vahpa fanu a ni a. Pi Selzami hian kum 2 a nih atangin a enkawl a, pasal pawh a hnen atanga nei a ni. Kum 1999 khan Kimkimi nu leh pa te hi an innei a, vanduaithlak takin kum 2004 khan an inthen leh a. Hetia an inthen leh takah chuan Pi Zadingpuii te nufa za hi Pi Selzami hnenah Chanmari Vengah an rawn let leh a ni.
    Kum 2010-ah Highland Public School, Chaltlangah Kg I a zir Tan a. Kum 2011-ah Kg II zir lehin, natnain a tlakbuak tak avangin a zir tluan thei ta lo a ni. Chanmari Presbyterian Kohhran Sunday School-a Primary Department zirlai a ni.
    Kum 2011 July thlaah a ke dinglam ngalruh chhunglam a rawn puar a. Na a ti hran lo nain Doctor panpui a ni a. Hemi thla vek hian Newlife Hospital-ah zai a ni . Zai a nih rual hian biopsy lak nghal niin Tissue Cancer a ni tih hriatchhuah a ni a. Doctor-ten Mumbai-ah refer-in July 2011 khan Tata Memorial Hospital, Mumbai panpui nghal a ni. A natna chu a taksa hmun hrang hrangah a tai darh tawh tih hriat belh a ni a. Thla khat zet enkawl a nih hnuah lo haw pui leh a ni.
    Aizawla an lo haw hnu hian Nazareth Hospital, Chaltlangah Chemotherapy vawi 12 a la a. Hemi hnu hian a ke dinglam ngalruh pawn lam chu a rawn puar chhuak leh a. Hei hi July, 2012 khan Aizawl Civil Hospital-ah zai leh a ni a. That lam a pan theih mai loh avangin August 30, 2012 khan Nazareth Hospital-ah dahluh leh a ni. A lu scanning an tih hnuah a natna hian a lu (thluak) a lo kai tawh tih hmuhchhuah a ni a. A lu chu vawi 4 hem (Radiation) a ni a. Hetia a lu hem a nih hnu hi chuan rawn harh ve thin bawk mah se mumalin nikhua a hre meuh tawh lo a ni. A taksa a chau zui  zel a, a khat tawkin a kaih deuh reng bawk a, Oxygen te pek ngaiin a awm zui ta zel a. Nimin September ni 21 kha a kum 8 tlin champha (Birthday) a ni a, chau tawh tak ni mah se, an thenawmnu Pi Nu-i’n a puala Birthday Cake a lo order sak diam tawh te chu damdawiinah keng chho in chawhma lamah cake te pawh chu an zai a. A kum 8 tlin ni tak chawhnu dar 2:10 khan chatuan ram a lo pan ta a ni.
    Kimkimi hian a phak tawkin Pathian a hre em em a, tawngtai a ngaina a, a pi tan te, an chhungkaw tan te, thenawm khawveng tan te a tawngtai fo thin a ni a. A damloh hnu hian Pathian hnenah tawngtaiin damna a dil thin fo thin a ni.

KAN THEN TAK

Pi Lalramdinthari (42), Sec-IV, Presbyterian Kohhran hi Pu Malsawmthanga leh Pi Rinthangi te fa 6 (M-3; H-3) zinga a upa lam atanga chhiara 3-na niin, March 12, 1970 khan W. Phailengah a lo piang a. Kum 1989 khan Lallianmawia Sailo, Chanmari nen inneiin, fa 3 (M-1;H-2) an nei a ni.
    Nu leh pa thu awih tak leh thenrual pawl thiam tak a ni a, W. Phaileng Pastor Bial Zaipawl Member leh W. Phaileng Chhim Veng Branch KTP Committee Member a ni thin. Eizawnna lamah chuan thawmhnaw zuara sumdawng a ni.
    Kum 2011 July thlaah a pum lam in sawisel tanin December thlaah a chi bawm a cancer a ni tih hriatchhuah a ni a, hemi thla vek hian Civil Hospital-ah zai a ni. Hemi hnu hian a rilpui a cancer a ni tih hriatchhuah ni lehin February, 2012 khan Civil Hospital-ah zai a ni leh a. Chemotherapy leh radiation la tura tih ni mah se, vawi hnih lai zai a lo nih tawh avangin treatment la lovin in lamah enkawl zui a ni a. September 11, Thawhlehni zan dar 8:30 khan chatuan ram min lo pansan ta a ni. Pi Lalramdinthari hian a mit hi Civil Hospital-ah a donate a ni. A ruang hi tlaivar pui a ni.

KAN THEN TAK

Pi Zochhuanthangi (65), Sec-III, Presbyterian Kohhran hi Pu V.L. Buka (L) leh Pi Laichhingpuii (L) te fa 9 (M-5; H-4) zinga a 4-na niin August 11, 1947 khan Sihphirah a lo piang a. Zirna lamah chuan B.A. a zo. 1970-ah Pu P. Lianchhunga nen inneiin fa 5 (M-3; H-2) an nei a ni. Amah hi Pu Lalbiaktluanga (BT-a) leh Pu Lianzidinga (Angid-a) te nu a ni.
    1968-ah Store Keeper hna thawkin PWD-ah ADA hna a zawm leh a, September 2010 khan DA in a pension a ni. Sunday School Zirtirtu leh rawngbawlna dangah inhmang thinin kumin hian Chanmari Presbyterian Kohhranah Ramthar Committee Member, Nilai Zan thupui hawngtu leh Zing tawngtai inkhawm hruaitu a ni.
    Kumin March thla khan Chaw Kawng Cancer a nei tih hriatchhuah a ni a. April thlaah zai niin Chemotherapy a la bawk a. September 4 khan Regional Cancer Centre, Zemabawkah dahluh leh niin September 6, Ningani chawhma dar 11:30 khan chatuan ram min lo pansan ta a ni. A ruang hi tlaivar pui a ni.

KAN THEN TAK

Pu K. Khualkunga (72), Sec-III, Presbyterian Kohhran hi Pu Chalruma (L) leh Pi Chalneki (L) te fa 17 (M-10; H-7) zinga a upa ber niin September 12, 1940 khan Vanzau-ah a lo piang a. 1972-ah Pi Rualchhingi nen inneiin fa 6 (M-3; H-3) an nei a ni. Amah hi Pu K. Vanlalrinchhana (Rinchhana) leh Tv. K. Lalngaihawma (Ngaihtea) te pa a ni,
    Khawtlang leh kohhrana mi tangkai tak niin Lamzawl Branch YMA leh  KTP ah te OB a ni thin a. Lamzawl Games & Sports Association-ah leh Hliappui MUP Unit-ah kum 10 ve ve President ni tawhin  Political Party-ah Unit, Block leh Group President a ni tawh bawk. Kum 2002-ah Hliappui atangin Chanmari-ah an lo pem.
    1996 atangin Chuap thalo nei tanin kumin June thla khan zunthlum a nei tih hriatchhuah a ni a. Hemi hnu hian Malaria leh Mitliam nei lehin inlamah enkawl a ni a. September 6, Ningani zing dar 4 khan chatuan ram min lo pansan ta a ni. A ruang hi hemi ni hian vui nghal a ni.