KAN THEN TAK

Pu Er. H.Lalengliana (55), Sec-III, Baptist Kohhran hi Pu H.Biakluaia leh Pi A. Darpawngi te fa 10 (M-4;H-6) zinga a upa lam atanga 3-na niin, December 25,1958-ah Saikah-ah a piang a. Kum 1982-ah
C. Zorengpuii, Lunglei nen inneiin, fapa 2 leh fanu 1 an nei.
    1977-ah matric a pass a, kum 1987-ah Govt. Engineering College, Jaipalguri atangin BE (Electrical) zo lehin, kum 1988-ah JE, P&E Deptt. ah a zawm a. JE, AE, SDO leh Project Director hna a thawh chhungin Mizoram hmun hrang hrangah a awm a. Kum 2011-ah EE (Planning)-ah kaisangin hei hi a thihni thlengin a thawk a ni.
    Kum 2000 atangin zunthlum a nei tan a. March 2012-ah Vellore-ah enkawl niin chawkawng cancer tih hriat chhuah a ni a. August 2012-ah Vellore-ah kal lehin December 2012 a kal leh tur a nih laiin a chauh tak em avangin November 2012 khan Grace Hospital-ah dah luh a ni a. Theihtawpa enkawl a nih laiin January 11, 2013 zan dar 11:15 khan chatuan ram min lo pansan ta a ni. Hemi zan hian tlaivarpui a ni.

KAN THEN TAK

Pu Runkuala (97), Sec-I, UPC (NEI) Kohhran hi Pu Thuanchungnunga leh Pi Zathluaii te fa 8 (M-4;H-4) zinga a upa ber atanga chhiara 6-na niin, kum 1916 khan Thanchingah a lo piang a. Haihkaii nen inneiin fa 6, tu 20 leh tuchhuan 11 an nei a, kum 1996 khan a nupui hian a lo boralsan tawh a ni.
    Mizo Union hun laia Sailulak VC member hmasa berte zingah telin, Church Board Member a ni thin a, kohhranin Senior Upa nihna hlan a ni.
    Mi hrisel tak a nih avangin a upat hnu thleng pawhin buaipui ngaiin a awm lova, Krismas leh kumthar ruai pawh a la theh peih a ni. January 8, Thawhlehni atanga a nuam sam lo chu tha leh mai tura ngaih a nih laiin January 10, Ningani zing dar 5:30 khan chatuan ram min lo pansan ta a ni. Hemi ni hian vui nghal a ni.

KAN THEN TAK PU LALTHIANGHLIMA

 

Pu Lalthianghlima (49), Sec-I, Presbyterian Kohhran hi Pu Kharbawiha (L) leh Pi Biaknguri (L) te fa 6 (M-5;H-1) zinga a upa lam atanga 4-na niin, October 25, 1963-ah a lo piang a. Kum 1975-ah Chanmari-ah lo awmin, kum 1985-ah nupui a nei a, fapa 2, fanu 1 leh tu 2 a nei a ni.
    MBSE-a peon hna a thawh hnuah Agriculture Dept.-ah driver hna a thawk leh a. He mi hnu hian ama taxi khalhin ei a zawng a. Mi invawng fel, taima tak leh thenrual kawm thiam tak a ni. Chanmari Branch YMA, Section I Committee Member a lo ni tawh a, YMA rawngbawl nana theihtawp chhuah mi a ni.
    Ama ngenna angin December 31, 2012 khan TNT-ah dah luh a ni a. Enkawl a nih mek laiin January 1, 2013, Thawhlehni zan dar 7:50 -ah chatuan ram min lo pansan ta a ni. Hemi zan hian tlaivarpui a ni.

PU LALRAMTHANGA KAN THEN TA

 

Pu Lalramthanga (55), Sec-I, Presbyterian Kohhran hi Pu R. Sena (L) leh Pi Tlangchuani (L) te fa 7 (M-5;H-2) zinga a  milai niin December 28, 1957-ah a lo piang a. Kum 2005-ah nupui a nei a, fa an neih hmain an inthen leh a ni.
    Hockey leh Football-ah Chanmari veng leh Mizoram aiawh a khel thinin,  Subroto Cup, 1975, N. Delhi-ah a kal a. Intlansiak leh long jump a thei hle a, a vanglaiin Aizawlah ‘Tlan chak Lalramthanga’ ti a hriat a ni thin. Thlanlaih a taimain, mi fiamthu duh tak leh midangte tihlim thin mi a ni.
    December 12, 2012-ah mitliam vangin Newlife Hospital-ah dah a ni a. Kar hnih hnuah damdawi in atangin a chhuak a. December 29, 2012 zanah a nat zual leh avangin Newlife Hospital-ah dah luh leh a ni a. A tuk December 30, 2012, Pathianni zing dar 2:40-ah chatuan ram min lo pansan ta a ni. Hemi ni hian vui nghal a ni.