Chanmari Veng thlalak (29th January 2023)

 Chanmarians Blog hi a reh em mai, a la active em tih enna atan he thlalak leh a hnuaia Section II nik video link hi kan han dah chhin e

A hnuaia mi hi click la -
https://youtu.be/lF-GHrCAh_o

Kan Then Tak

        Pu Richard Lalchhandama (29), Sec-II, Presbyterian Kohhran hi K. Lalremliana leh Hmingthansiami te fa 3 zinga a upa ber niin Nov 15, 1985-ah Aizawlah a piang. Kum 2008-ah Laldinmawii nen inneiin fanu 2 an nei a. Zirna lamah pawl 10 thleng a zir a. Infiamna ngaina tak a ni a, veng aiawhin cricket a khel thin a ni.
      Damsam lo tak chungin Nov 12-16 chhunga Chanmari kohhranin camping an buatsaihah a lut ve a. A nawm loh zual zel avangin Nov 17 zanah Newlife Hospital panpui a ni a. Hemi hnu hian Synod Hospital leh Civil Hospital panpui leh niin, internal bleeding a ni tih hriat chhuah a ni a. Nov 20, Nilaini zingah Aizawl Hospital ICU-ah dah niin hemi ni chawhnu dar 2 hian chatuan ram min lo pansan ta a ni. Hemi zan hian tlaivarpui a ni.

Kan Then Tak

Chawngthantluanga (thla 9), Sec-I, Presbyterian Kohhran hi C. Lalzarmawia leh Lalruatfeli te fa 3 zinga a naupang ber niin Feb 2, 2013 khan Synod Hospital, Durtlangah a piang a.
    October, 2013-ah luak avangin doctor pan pui a ni a. Hemi hnu hian a mit (eye) a dik loh leh avangin October, 28, 2013-ah Alpha Hospital, Kulikawnah admit a ni a. Damdawi ina enkawl a nih mek laiin November 8, 2013, Zirtawpni zing dar 5:25 khan khawsikpui vangin chatuan ram min lo pan san ta a ni. Hemi ni hian vui nghal a ni.

Ramhlun North ah Chanmari Branch te

October 31, 2013 Zirtawp zan

Kan Then Tak

C. Lalhminghlui (thla 4), Sec-IV, Presb. Kohhran hi C. Lalhmingsanga leh  Lalnunhlui te fa 3 (M-1;H-2) zinga a naupang ber niin June 13, 2013-ah Civil Hospital Aizawlah a piang a.
    Nau than tha leh enkawl nuam tak a ni a. October 29 zingah a khua sikin a kaih a. A tukah Civil Hospital OPD-ah inentira hruai a ni a. Hemi ni hian Kulikawn Hospital-ah admit a ni a. A that theih mai loh avangin oxygen pek a ni a. November 2, 2013, inrinni zing dar 4:45 khan thluaka khawsik lut vangin chatuan ram min lo pansan ta a ni. Hemi ni hian vui nghal a ni.

Kan Then Tak

Pu B.C. Raldokima (48), Sec-III, Presb. Kohhran hi Liansiama (L) leh  Sangzuali (L) te fa 9 zinga 3-na niin, March 9, 1965-ah Kelkangah a piang a. Kum 1991-ah Tlangthankhumi, N.E. Khawdungsei nen inneiin, fapa 2 leh fanu 2 an nei. Kum 1994-ah 1st Bn IR-ah a lut a, 2012-ah Havidar-ah a kaisang a. A thihni thlengin he hna hi a thawk a ni.
    June, 2012-ah a chhan hriat lovin a chau thut a. October thla-ah Grace Nursing Home leh, November thla-ah Medica Hospital, Kolkata-ah enkawl a ni a. January leh February, 2013-a Civil Hospital-a enkawl a nih hnuah chuap cancer a ni tih hriat chhuah a ni a. Zemabawk Cancer Hospital-ah chemo-a enkawl a ni a. October 28-ah Grace Nursing Home-ah dah niin October 31, 2013, ningani zan dar 6-ah chatuan ram min lo pansan ta a ni. Hemi zan hian tlaivarpui a ni.

Kan Then Tak

Pi K. Laltanpuii (37), Sec-I, Baptist Kohhran hi  Sawivela (L) leh  Lalhleii te fa 6 zinga a naupang ber atanga pathumna niin, June 20, 1976 khan Biate-ah a piang a.Kum 2010-ah Pu Aihmingliana nen an innei a. A pasal hnathawhna hmun, Falkawn leh Chanmari kar tawnin an khawsa a ni.
    October 19, 2014 khan khawsik leh luna avangin a insawisel tan a. October 21, 2013 ah Falkawn Referal Hospital-ah admit niin, Mitliam a ni tih hmuh chhuah a ni a. October 25, 2013-ah Aizawl Civil Hospital-ah dah niin, a tuk October 26, Inrinni chhun dar 12:20 khan chatuan ram min lo pansan ta a ni. Hemi zan hian tlaivarpui a ni a, a tukah vui a ni.

Kan Then Tak

Pu Vanlalthanga (70), Sec-I, Presbyterian Kohhran hi Pu Salthanga leh Pi Nemngaii te fa 4 zinga a naupang ber niin June 7, 1943 khan Khawkawnah a piang a. Kum 1983 ah Lalthanzuali nen inneiin fa 8 (M-7;H-1) an nei a, a fate 3 hian an boralsan tawh a ni.
    Kum 1959-ah Aizawlah khawsa tanin, kum 1971-ah Civil Secretariat-ah driver a ni a, a thawhna department-a driver tha bera thlan a ni. Kum 1995-ah voluntary pension in a chhuak a. Gospel Reaper’s Team-ah kum 2006 thleng leh kum 2007-10 chhung Treasurer rawngbawlna a chelh .
    Kumin July thla atangin zunkawng lamah a insawisel tan a, a phingah bawk hmuh a ni a. August thla-ah Medica Hospital, Kolkata-ah admit a ni a, a Kal pahnihin hna a thawk lo tih hriat chhuah a ni a. Zunthlum a neih avangin a Kal thlak theih a ni lova. ICU leh CCU ah te enkawl a nih hnuah October 20, 2013, Pathianni chawhma dar 10:45 khan chatuan ram min lo pansan ta a ni. A ruang hi a tukah an in rawn thlenpui niin, vui nghal a ni.

 Kan Then Tak

Pu Zakima Sailo (76), Sec-I, Presby. Kohhran hi Pu Sairuma Sailo leh Pi Chhunthuami te fa 7 zinga a upa ber dawttu niin September 1938-ah Tualchengah a piang a. Kum 1967-ah Vanlalsawmi d/o Chhundenga inneiin fapa 4 an nei.
    Intermediate of Arts thleng  lehkha a zir a. Kum 1961-ah Fishery Supervisor thawk tanin Mizo zinga Fishery Dept-a lut hmasa ber a ni. Kum 1973-ah Fishery Officer leh, 1979-ah  Suptd. of Fisheries-ah a kaisang a, 1998-ah Asst. Director in a pension a ni. Rawngbawlna lamah Sunday School zirtirtu, Chanmari Br. KTP Secretary, Music Com. Secretary, Ramthar Com. Fin. Secretary, Kohhran Zaipawl Conductor leh Chanmari Br. YMA Com. Member a ni tawh thin.
    Kumin June thlaa a Jaundice atangin pancreas cancer, hrawk cancer, hepatitis B, lung leh zun kawng tha lo tih hmuhchhuah niin,  Amri Hospital, Kolkata panpui a ni a. Aug thla-ah Bethesda Hospital leh September thla-ah Civil Hospital, Aizawlah enkawl a ni leh a. Oct. 20, 2013 Pathianni zingah  Civil Hospital panpui leh niin, hemi ni zing dar 5:30 hian chatuan ram min lo pansan ta a ni. Hemi ni hian vui nghal a ni.

Chanmarians 2-na

YMA General Conference, Khawbunga October 15-17, 2013 a neih ah Chanmarians chuan YMA chanchinbu tha lawmman 2 citation leh Rs.3000 a dawng.

Kan Then Tak

Pu Thankhuma (58), Sec-IV, Presbyterian Kohhran hi Pu Ngurvuana fate6 (M-4;H-2) zinga a upa ber niin February 15, 1956 khan Serkhanah a piang a. Lalthanpari d/o Chalthanga, Dinthar veng nen kum 1991-ah inneiin fa 3 (M-2;H-1) an nei a ni.
    Kum 1978 ah Govt. High School, Lunglei atangin matric a pass a. Hemi hnu hian hna a thawk zui nghal a ni.
    Kum 1985-ah Economic & Statistic Department-ah Field Assistant of Statistic (FAS) hna a chelh a. Kum 1992-ah Sub Inspector of Statistic (SIS) ah kaisangin, a thihni thlengin he hna hi a thawk a ni. Sorkar hna a thawh chhung hian DSO, Lunglei, DSO, Aizawl, Directorate of Veterinary, Aizawl, CMO, Aizawl West ah te awmin tunah hian Directorate of Economic & Statistic, Aizawlah a thawk mek a ni.
    Kum 2012 October thla khan a pum lam a insawisel tan a. Hemi kum November-ah Newlife Hospital-ah lutin a thin a ro tih an hmu chhuak a. In lama enkawl chhunzawm a nih hnuah kumin 2013 June thla khan Newlife Hospital-ah lut lehin, thla khat leh a chanve hnuah in lamah enkawl chhunzawm a ni a. September 6 khan Newlife Hospital-ah hian dah luh leh niin October ni 3 khan ICU-ah dah luh a ni a. Oxygen leh ventilator nena enkawl a nih mek laiin, October 4 zan dar 7:35 khan chatuan ram min lo pansan ta a ni. Hemi zan hian tlaivarpui a ni.

Kan Then Tak

Pi Piangthari (75), Sec-II, Salvation Army hi Pu Biaka (L) leh Pi Challeti (L) te fa 9 zinga a naupang ber niin kum 1938 khan Darlawnah a piang a. A pasal Lalhnuna (L) nen fanu 2 an nei a, a fanu naupang zawk Nl. Lalrinngheti te rawn finin kum 1992 khan Chanmaria a u fapa Pu Vanlalkunga te inah a awm tan.
    Amah hi nu taima tak, awm mai mai thiam lo a ni a. Chanmari West Corp-ah lawiin, a damlo a nih ngawt loh chuan inkhawm a thulh ngai lo. Pathian faka zaia leh lam hi a nuam tih ber a ni.
    Kum 2003 atang khan thluak lam thatlohna avangin a khur chiamt thin a. Kum 2007 atang khan a natna hian zual lam a pan a. Kumin June ni 17 thla khan Kolasib-a a fanute hnenah a awm thla a. Heta a awm hnu hian khawsikin tlakbuakin a natna chuan zual lam a pan a. Theihtawpa enkawl a nih hnuah October 2 , Nilaini chawhnu dar 1:30 khan Kolasib-ah chatuan ram min lo pansan ta a ni. A ruang hi Pu Vanlalkunga te inah lak a ni a, tlaivarpui a ni.

Chanmarians Chhiartute

In Ziah Ve Hun

Aizawl khawpui, Mizoram khaw hrang hrang, India ram chhung leh pawn leh tuipui ral atanga Chanmarians lo chhiar thintu zawng zawngte u in dam tlang elo maw?

Thiante u, boruak kal tlang a kan chanchinbu min lo ngaihhlut sak thin avangin kan lawm e. Hei erawh kan han phut ve ang che u.

Editorial Board mai ni lo, Chanmari mipuite hian in thu leh hla kan hre chak a. Kan chanchinbua tarlan turin in lunglen thu emaw, Chanmari veng in ngaih thu emaw, Chanmarians chanchinbu chungchanga in sawi duh emaw leh, nangmahni chanchin te emaw rawn ziak turin kan sawm che u a, kan phut bawk che u.

A tawi leh sei lam chu in thlarau chan dan ang nise, paragraph khat emaw, column khat emaw, article puitling emaw..in thu thu. In hming leh awmna khua leh ram hming tarlan theihnghilh lo ula. Kan lawm ngawt ang.

Thuziak thawnna tur : chanmarians@gmail.com

Inrinni tin hian kan tul ve thei khawp a nia. Chanmarians tan, Chanmari tan, kan ram tan.

Kan Then Tak

Tv. Zodinsanga (44), Sec-IV, Presbyterian Kohhran hi Pu Biakvela leh Pi Thankimi (L) te fa niin January 5,1969 ah Shillong-ah a lo piang a. Zodinsanga hi infiamna lam ngaina tak a ni a, Jamplaz Football Club, Chanmari dintute zinga mi a ni a. Chanmari Branch YMA Football Team-ah pawh veng tan a lo feh chhuak tawh thin a ni. 

Kumin January atang khan a damlo tan a, Nazareth Hospital-ah tum 4 admit a ni a. August 22 khan Civil Hospital-ah admit a ni leh a. Hemi hnu hian that lam pan lovin September 8, 2013, Pathianni chawhnu dar1 khan chatuan ram min lo pansan ta a ni. A ruang hi tlaivarpui a ni.

Kan Then Tak

    Pi Lalthankhumi (69), Sec-I, Kohhran Thianghlim hi Pu Lalngura leh Pi Germanthangi te fa 9 (M-3;H-6) zinga a upa ber niin April 29, 1944 khan Aizawlah a lo piang a. Kum 1965-ah Pu C. Liansanga nen inneiin fapa 3 an nei a, tunah hian a fapa Pu Liankunga hovin an khawsa a ni.
    Kum 2012 October atangin luna a nei tan a. Kumin January thla khan Kolkata-ah inentir niin, brain tumor a nei tih hriatchhuah a ni a. April thla khan Guwahati-ah zai a ni a. Hemi hnu hian that lam pan thei lovin September 3, 2013, Thawhlehni zing dar 6 khan chatuan ram min lo pansan ta a ni. Hemi ni hian vui nghal a ni.

Kan Then Tak

Pi Lalrinmawii (Mawiteii)(47), Sec-II, Presbyterian Kohhran hi Pu Chiangdailova leh Pi Changletthangi te fa 7 zingah a naupang ber niin October 4, 1966 ah Kawrthahah a lo piang a. An unau indawt dan chu hetiang hi a ni.
    Kum 1998 khan Pu Biakchungnunga nen inneiin  Chanmari Bial Pro Pastor L. Pradip Kumar Singh kutah an inkutsuih a, fa 3 - Lalchhanchhuaha, Bonny Zaithanpuii w/o  David Lalawmpuia, Durtlang leh Ricky Zosangliana te an nei.
    Pi Rinmawii hi mi taima leh viak tha tak a ni a, an unau zingah pawh naupang ber a ni nain a daihzai hle.  Engmah thawh hreh a nei ngai lova, a changin second-hand thawmhnaw te a zuar a, Chanmari Bazar-ah anhnah zuarin seat nghet neiin eizawn nan ber a hmang ta a; a natna avanga a bawhsawp hma zawngin Bazar-ah hian a thu thin.
    A phak ang tawkah Kohhran inkhawm ngaina tak a ni a, kum 2010 ah khan TV a rawngbawlna a thlir laiin mak takin Pathian thua harhtharna leh taksa chetna a chang a. Chuta tang phei chuan Pathian thuah hlimin Kohhran a ngaina chho zual a. Hetia harhtharna a chan atanga kum khat chhung phei chu Kohhran inkhawm te thulh miah lovin a kalkim thei a, amah pawh a lawm em em a ni. 

     Amah hi nu hrisel tak a ni a, insawiselna hranpa pawh a nei ngai lem lo. Kum 2012 khan hmeichhe lam that lohna avangin B.N Hospital, Kulikawnah a chhul paih a ni a. Hemi hnu hian zemabawk Hospital-ah hem a ni leh a.August thla chawhnu lamah Guwahati-ah hem chhunzawm leh a ni. Chemotherapy khai  chhunzawm a ni a. Cycle thum khai a ni. Thla nga zet chu khumah a bawksawp a, August ni 27, 2013 atang chuan a ni telin a chau zual a, August ni 30, 2013 chawhnu dar 1:15 ah chatuan ram min lo pansan ta a ni. Hemi zan hian tlaivarpui a ni.

Chanmari YMA Zaipawl

Rokunga kum 100 tlin hriatrengna atana Branch YMA Zaipawl intihsiakah Chanmari Branch YMA Zaipawlte an tel.
Zaipawlte hian tum 27 hla zirin zan 3 camping an nei a, Conductor Tv. Lalchhandama bakah, Pu C. Vanlalvuana, Pu R. Lallianzuala leh Pu Peter Zohmingthanga ten hla an zir pui thin.
Zaipawl hi Soprano 10, Contralto 10, Tenor 6, Bass 8 leh Conductor nen an vaiin mi 35 an ni. August 13, Thawhlehnia Central YMA Hall-a intihsiakah Lentupui leh Lei Mawina Thinlai Tihlimtu tih te an sa a. Top 10 ah erawh an tling zo ta lo.
He intihsiakah hian Dam veng 1-na, Aizawl Venglai 2-na leh Durtlang 3-na an ni.
Picture - Zaipawl te leh conductor leh Convener Pu R. Lalthanmawia

CFC an Champion

August 14, Ningania RG Stadium, Mualpuia Independence Day Football Tournament, 2013  khelh zawh takah Chanmari Football Club chuan Dinthar FC chu 2-1 a hnehin an champion a, tangkafai cheng nuai khat, trophy leh certificate an dawng.
Inkhel hi entu an thahnem hle a; champion lawm hian stadium atanga rawn haw mipuite leh Chanmari mipuite Chanmari kawnah an pungkhawm tam hle.

Kan Then Tak

Pu Zohmingthanga (60), Sec-IV, Presbyterian Kohhran hi Rev. Dr. Khuanga leh Pi Lalchhungi fa 5 zinga a milai niin 1935 January ni 1 ah Lunglei Rahsi veng ah a piang a. A unau hmeichhe 2 hi nausen lain an boral bakah a u Pu Zirthanga chu motor accident avangin 1980 a boral tawh bawk a. Tunah a nau Laldingliani w/o Vanhela Pachuau chauh a dam tawh a ni.

           

            Ni 15.3.1991 khan Lalrampari d/o Kapthanga (L), Chanmari W nen inneiin fapa 1 leh fanu 2 an nei.

           

            Pawl 1-III hi Rahsi veng Primary School Lungleiah zirin pawl IV-X chu St. Pauls High School ah a zir a. P.U Sc chu St. Anthony College atanga a zawh hnu ah kum 1975 khan D.M College, Imphal atangin B.Sc a zova. Kum 1979 ah NEHU, Shillong atangin M.Sc (Zoology) a zawh hnu ah kum 1984 ah B.Ed Aizawl atangin a zo leh a. Kum 2001 khan M.Div. AIT, Bangalore atangin a zo leh bawk a ni.

            Kum 1975, Sept-Dec chhung Synod High School ah zirtirtu hna thawkin, 1976-77 July thleng Republic High School ah a thawk leh a, hemi hnu kum hian Shillong ah M.A zir turin a kal a. Kum 1981 khan Chaltlang High School ah substitute teacher July thla thleng a thawk in August thla atangin Govt. Higher Secondary School, Aizawl ah zirtirtu hna a thawk leh a. TTI, tuna DIET nit a ah hian 29.7.1983 ah Instructor in a lut a, 1.12.1989 atanga 16.7.2000 thleng Lecturer niin, 17.7.2000 ah Senior Lecturer ah a kaisang a. 16.2.2010 ah Principal ah kaisangin DIET, Lunglei ah a thawk leh a, ni 1.4.2012 ah Principal, DIET, Aizawl ah a thihni thlengin a thawk ta a ni. Pathian tih mi a niin Office a a room a thlen veleh Bible chhiar a tawngtaina hun hmang thin a ni.

           

            Pu Zohmingthanga hi Presbyterian kohhran Puitling Sunday School zirtirtu tanglai a niin, mi zirtir thiam tak a ni.

            A nupui leh fate Shillong a an awm lai a nih avangin a mah chauhin a awm a. Chhun lam a innghak tur a an awmpui chuan ni 13.8.2013 zing dar 9.10 vela a thlen chuan che chang lova Sofa-a a mu a hmuh chuan ngaihthalovin midang punin an bawisawm nghal a, mahse biak tur a lo awm tawh lo a ni. Hemi zan hian tlaivarpui a ni.

            Amah hi zunthlum leh B.P sang nei a ni a, zuk leh hmuam, kuhva thlengin a insum a. Tun hnaiah insawiselna pawh a nei lem lova, a thih hma ni pawhin a hnathawhna-ah kalin zanah pawh a nupui leh office-a a thawhpuite pawh telephone in a be kual a ni. Pu Zohmingthanga hi Chanmari Branch YMA Member niin khawhar lenpui zan hnuhnungah ralna neih nghal a ni.

Kan Then Tak

Tv. Lalrinfela (14), Sec-II, Presbyterian Kohhran hi i Pu R. Lalbiaksanga leh Pi H. Tlangmawii te fa 4 zinga a naupang ber a ni a. A pian hlim atanga hrisel lovin, kum 5 mi a nih thlengin chuap lam thatlohna avangin nasa taka enkawl a ni. A natna hian a taksa leh a miziaah te nasa takin nghawng neiin a mit hi a tha lo hle a, hei hian a zirna lamah te a ti hnufum hle a. Aizawl lamah in enkawl reng a ngaih avangin kum 2011, April thla khan a pa hi Aizawlah transfer a ni.
 

Tunah hian Govt. Chanmari Middle School-ah Class-VII a zir mek a, Sunday School-ah Sakramen Department zirlai a ni. Amah hi mize zawi, zakzum, thian ngaina leh nu leh pa leh zirtirtute thu awih thei tak a ni. 

Tunhnai-ah natna sawi tur em em a nei hran lova. July 30 zana a mu chu a thawk dan diklo avangin Newlife Hospital pan pui a ni a. A tuk July 31, Nilaini zing dar12 pelh hret khan chatuan ram min lo pansan ta a ni. He mi ni hian vui nghal a ni.

Nikum 2012 atang khan Chanmarians a sem tan a. Kumin hian Section II, bial 3-na ah copy 39 a sem a. Khawtlang rawngbawlna ngai pawimawha Pathianni tuktin taima taka Chanmarians semtu a ni hi Chanmarians chuan a ngai hluin, hetia min lo boralsan ta hi pawi an ti hle.