CONFERENCE HMANGIN DARLAWNAH

YMA General Conference-ah hian Chanmari Branch atanga palai riak lut hi mi 3 awmin lang a kal mi 24 leh Central YMA Cultural Troop aiawha kal mi 2 nen mi 29 in Conference hi an han hmang a ni.

NUPA TUAK THAR

Chanmari Branch Executive Member, C. Laldinliana leh C. Lalmuanpuii, Armed veng te chu ni 16.10.2009 (Zirtawpni) khan Chanmari Presbyterian Kohhran Biak Inah an innei.

AIZAWL BETHEL PRESBYTERY INKHAWMPUI VAWI 4-NA NEIH MEK A NI

Aizawl Bethel Presbytery Inkhawmpui vawi 4-na chu ni 8th October 2009 (Ningani) khan Chanmari Presbyterian Kohhranah tan a ni. Ni 11th October 2009 (Pathianni) zan hian a tiak ang. Ningani khan Finance Committee, Upa thlan thar exam, Sub-Pastoral Committee leh Nomination Committee te an thu a, zan lamah Inlawmna leh Bial Report ngaihthlak a ni. Inrinni chu Presbytery Palai Rorel a ni a, tluang takin Agenda 12 rel fel a ni. Ni 11.10.2009 (Pathianni) inkhawm chu Kohhran Upa nemngheh leh Sakramen a hun hman a ni a, Rev. K. Lalthangmawia, Moderator kal chhuak in Valedictory Sermon a nei.

Kum 2010 Presbytery Inkhawmpui chu ni 7th - 10th chhungin Ramhlun Vengtharah ngah a ni ang. Thupui : Lalpa chu a lo kal leh dawn; Sawitu : Upa Dengkunga, Chaltlang

PUIPATE: Moderator : Rev. R. Lalnuntluanga, Ramhlun Sout; Secretary (Sr.) : Upa H. Doremthanga, Ramhlun Vengthar; Secretary (Jr.) : Upa Sanghlira, Laipuitlang; Treasurer Upa V. Neihkunga Chanmari (2009-2012); Statistician : Upa Thanglianruma, Lily Veng

Pi T. Lalnuntluangi (Lantei) kan then ta

Pi T. Lalnuntluangi (Lantei) (36), Section-III hi Pu T. Vanluta (L) leh Pi Zakamlovi fa 7 zinga a 5 niin ni 24.10.1973 khan a lo piang a. Ni 7.5.1993 khan H. Lalthlamuana nen Madanriting Kohhran, Shillong-ah inneiin fa 3 an nei.

Pi Lanteii hi mi zaidam, tawng tlem, nunnem leh mi pawisawi ngai lo a ni. Kumin August atang khan khawsikin a tibuai a, Doctor te rawnin a zun kawnga hnai awm hmuh a ni. Ni 21.9.09 zan khan Grace Nursing Home-ah admit-in Trinity Diagnostic Centre-ah Brain tumor hmuchhuah a ni. Hei hian a lung a lo khawih tel tawh a. Doctor ten a nunna chhan tumin theihtawp chhuahin enkawl mah se ni 1.10.2009 tlai dar 6:15 khan chatuan ram min lo pan san ta a ni.

International Elder’s Day

Ni 1.10.2009 (Ningani) khan International Elder’s Day khawvel puma hman a nih rualin Chanmari Banch MUP te pawhin chhun dar 12:00 khan Chanmari YMA Hall-ah Pu C. Lianchungnunga Chanmari MUP President kaihhruainain ropui takin an hmang.
Chanmari Branch MUP member hi mi 233 an ni a, kum 2008-2009 chhungin mi 14 an boral a, boralte sunna hun urhsun taka neih a ni.
Upate Ni lawmnaa lo kal kum 80 chunglam te present tha tak pek an ni.

PI HUAPLIANI KAN THEN TA

Pi Huapliani (76), Section-II hi ni 10.1.1933 khan Se-hlawh khuaah a piang a, a nu leh pa chu Pu Chana leh Pi Zahnuni an ni. A unaute:

1. Biakveli (L), Bawngkawn
2. Huapliani w/o Mana (L), Chanmari
3. Upa Dawngliana (L) h/o Dengluaii, Bawngkawn
4. Lalzawmi (L) w/o Thanghlira, Bawngkawn
5. Rohuali (L) w/o Chala, Bawngkawn

April ni 7, 1950 khan Mana s/o Daia, Sentlang khua nen an innei (Pu Mana hi vanduaithlak takin kum 1968, April ni 2 khan a boral). Fa sawm an nei:

1. CT. Zuali w/o VL Muana (L), Mission veng. 2. Zasiami, Chanmari. 3. Zaneihi w/o Thangmawia, Chanmari. 4. Zabuangi (L), Chanmari. 5. Zasangliani w/o Lalchungnunga, Maubawk. 6. Zatluangi (Apuii), Chanmari. 7. Zathangpuii, Chanmari. 8. Zachungnunga h/o Irene Lalrinpuii, Chanmari. 9. Zahmingliani (Ahmingi), Chanmari. 10. Vanlalhruaii Hrahsel w/o Upa R. Lalhmangaiha, Khatla South

Pi Huapliani hi nu lian leh taima tak a ni a, a zaidamin huatthu a nei lo a, a miziaa langsar tak chu a pasala chhungte a vuan nghet em em reng hi a ni. Mi thu ngaichang thiam tak a ni a, eng hna pawh thawh a hreh lo a, Kohhran bel tlat mi niin Kohhran pawhin a ngaihsak hle a ni. Mi biang biak peih tak a ni a, alo upat deuh hnu pawh hian mi kawng kal te a be peih em em a, hei vang hian mite ngainat a hlawh phah hle a ni.

Mi hrisel tak leh hnathawk thei tak a ni thin a, tun tum hi damdawiin vawi khat a awmna a ni. A kum alo tam deuh hnuin awm na, thawhah leh tha na benvawn a nei a, a theih ang angin a inenkawl thin. Ni 17.9.2009 khan hritlang khawsik neiin in lamah enkawl a ni a, a ziaawm mai loh avangin ni 24.9.2009 khan uluk lehzuala enkaw turin New Life Hospital, Chanmari-ah dah luh a ni. Doctor te leh Nurse ten theihtawp chhuahin an enkawl a, investigation hrang hrang an tih hnuin a mita lungte awm leh pneumonia a nei tih hmuhchhuah a ni a, a thisen lam a fel tawk lo tih hriatchhuah a ni leh a. A natnain ziaawm lam a pan loh avangin, ni 26.9.2009 (Inrinni) zan atang khan oxygen pek tan a ni. A hriatna pawh a tlahniam zel a, ni 27.9.2009 (Pathianni) chawhnu dar 3:15 khan chatuan ram a lo pan ta a ni.

SABEREKA KHUANGKAIHIN A LAK MI 4 RUANG HMU KIM

Sabereka khuangkaihin a lak mi 4 ruang chu vawiin ni 27.9.2009 (Pathianni) khan hmuh kim an ni ta. (Pick Up driver, Malsawmdawngliana (25) Sesawng khua, tuna Electric Venga cheng, handyman, Lalthlamuana, Ratu, Lalrinchhunga (20) Bethlehem leh Lalfamkima (27) Chhinga Veng)

Ruang pahnih chu Tuirial leh Muthi lui infinna bul suarah hmuh an ni a, pahnih dang chu Tuirini chhuah kaiah leh Nausel bul, sih lui bulah hmuh an ni.

Ruang zawng te hi Branch 18 an ni a, Chanmari Branch YMA atangin mi 200 chuang zet an thawkchhuak a, City Bus 3 leh motor eng emaw zat thawhchhuahpui a ni.

PI ZD. LALCHAWII KAN THEN TA

Pi ZD. Lalchawii (76), Sec III hi Pu Lalpuia Zadeng leh Pi Thangpuii te fa 7 zinga a 4-na niin kum 1934 April khan Hnahchang khuaah a lo piang a. Kum 1970 khan Zathiauva nen inneiin fapa pakhat LR. Muana an nei.

Kum 2007 khan Pangzawl atangin a fapa LR. Muana hnenah a khawsa a. September 2007 atang khan thisen sang leh diabetis natna avangin a damlo a, a taksa khing a zen phah hial a ni. In lamah enkawl niin ni 22 September (Thawhlehni) zing dar 9:00 atangin biak hleih theih lovin a awm a, New Life Hospital-a dah a nih hnu tlai dar 6:10 ah chatuan ram min lo pansan ta a ni.

HNAM LAM INTIHSIAKAH CHANMARI BRANCH YMA 6-NA

Art & Culture Department leh Central YMA tangkawp buatsaih, Chief Minister Running Trophy Cultural Dance Competition vawi 9-na AR Lammual-a neih chu zawh a ni ta. Hnam lam intihsiaknaah hian Branch YMA 40 telin Chanmari Branch YMA chu a pumpuiah 6-na a ni.

Hetiang hi result a ni: Cheraw: 1. Vaivakawn 2. Dinthar 3. Armed veng. Khuallam: 1. Chanmari West 2. Dinthar 3. Chaltlang North. A tel Branch zawng zawngin Rs. 4,000/- theuh an dawng a, a pumpuia 1-na Dinthar Branch; 2-na Chanmari West; 3-na Vaivakawn Branch te an ni.

Top Ten: 1. Dinthar 2. Chanmari West 3. Chaltlang North 4. Armed Veng 5. Ramhlun South 6. Chanmari 7. Vaivakawn 8. E. Lungdar 9. Khatla 10. Tlangnuam te an ni. Art & Culture Director Award - Zemabawk North hnenah hlan a ni.

Pu R. Lalhuapzauva, Serchhip a boral

(Pu R. Lalhuapzauva hi Pu Lalhmangaiha, Chanmari Branch YMA President unau zinga upa ber a ni)
Pu R. Lalhuapzauva (Serchhip khua) hi Upa Hualrothanga (L) leh Pi Lalngurliani te fa 6 zinga upa ber niin ni 27th May 1952 khan Lungleng khuaah a lo piang a. A unaute:
1. R. Lalhuapzauva h/o R. Neihkimi, Serchhip
2. Lalramhluni w/o Vanlalsiama, Serchhip
3. Lalhmangaiha h/o Romawii Varte, Chanmari
4. Lalbiakthangi w/o Sangzuala, Thingsulthliah
5. R. Lalnunenga h/o Lalromawii, Serchhip
6. Lalfakawmi w/o Lalzuala, Serchhip
Kum 1975 khan R. Neihkimi nen inneiin fa pathum an nei a, chungte chu:
1. Marlin Chanchinmawia h/o Lalrinpuii
2. Andrew M.S. Dawngsangzela h/o Ruthi Lalnunfeli
3. Kennedy Malsawmtluanga te an ni.
A mah hi mi harhvang tak a ni. Serchhip khuaa raido, tape recorder leh type writer siamtu ber a ni. Thian ngaina leh rualpawl tak a ni. Ei leh in, zuk leh hmuam lama mi insum thei tak a ni.
Zirna & hnathawh: IGNOU atangin Class – XII zovin. B.A. thleng a zir chhunzawm. Kum 1976-ah Midland English School-ah zirtirtu hna a thawk. A thih ni thlengin Govt. PS, Chandmary, Serchhip-ah a thawk.
Rawngbawlna: Kum 1970-ah Piantharna a chang a. Pathian rawngbawlin hmun hrang hrangah a thiante nen an zin thin. SS kaikim leh exam-ah lawman eng emaw zat a la. NPSS zirtirtu leh Leader lo nitawhin K.T.P Branch-ah OB chanvo zawng zawng a lo chelh tawh. Serchhip Pastor Bial K.T.P. Secretary kum 10 chhung a zawnin a chelh. Bial K.T.P Chanchinbu ‘Thalai Arsi’ bul tantu Editor a ni. Kum 1996-ah S. Kawnpui Kohhran Committee Member-ah thlan a ni. Kum 1999-ah Chhimchhak Presbytery Inkhawmpuiah S. Kohhran Upa atan nemnghet a ni. Bial SS Asst. Secretary leh Secretary mawhphurhna a lo chelh tawh. Synod SS Committee-ah term 1 a tang. Bazar Kohhran Active Upa atan kum 2000 Presbytery Inkhawmpui chuan a dah nghet.

Ni April 28, 2009 khan a thiante rawn angin Aizawlah an inentir a. Cancer a nih thu doctor chuan an lo hrilh a. Hemi hnu hian doctor te chuan zai emaw phailama kalin awmzia a nei chuanga a rin loh thu an lo hrilh a. A pianna khua Lungleng tlawhin a patea leh a chhungte a tlawh nghe nghe a ni. Cancer natnain a tlakbuak hnu hian Kohhran te duhsaknain Biak In hrang hrangah thuchah sawi tura sawm leh hun pek a ni a. Pathianin a hmang hle.
Ni 23.9.2009 (Nilaini) zan dar 6:40 khan chatuan ram min lo pansan ta a ni.