53rd KTP General Conference

53rd Central KTP General Conference chu 4th - 7th March, 2010 khan Mamit-ah neih a ni a. Hetah hian Chanmari Branch KTP Member 100 chuang zet an kal. Chanmari Branch KTP hian 5th March 2010 chawhnu Inkhawma Variety Programme-ah CKTP ngenna angin Drama pakhat "Jeriko Kulh" tih chu an chang a. He drama hi conference palai kalten an hlutsak hle mai a. Inkhawmpui tiak zan, 7th March Zan Inkhawm ban Fellowship-ah khan an chang nawn leh a ni.

Chanmari Branch KTP Member te hi dam takin 8th March 2010 10:15 AM khan an lo thleng leh ta.

General Conference Vawi 54-na hi Thenzawl-ah 2012-ah neih a ni ang.

MUALPUIAH CHERAW BU 2 ENTIR

March 6, 2010 khan Mualpuiah Rajiv Gandhi Sports Complex Lungphumna neiah Cheraw bu hnih entir a ni.

BASKETBALL LEH FOOTBALL ATAN INBUATSAIH MEK A NI

February thla atang khan zing leh tlai tin Football leh Basketball practice thin a ni. Football Coach atan Tv. Lalchawngliana (Vala), Sec-I leh Pu Vanlalpeka, Sec-II te ruat an ni a, Basketball Coach atan Tv. Samuel Lalthlamuana Sec-III leh Tv. Reuben Lalchhandama Sec.IV te ruat an ni.
Central YMA in a buatsaih tur Basketball leh Football hi April thla chhung hian neih a ni ang.

INPUAHCHAHNAIN A TAWP A HNAIH TA

YMA Hall hnuai lam zirna thin chu rawng hnawih thar a nih vangin ningani zan khan Main Hall, stage-ah lam zir a ni a, lam zir ten nuam an tiin an phur tawh hle.

KHAWTLANG NUN SIAMTHAT NAN HMA LA TAN

Khawtlang nun siam that nan Branch YMA chuan hma a la mek a. February 23 kha veng dang atanga Chanmari a zu rawn zuar (standing) hnen atangin zu (funte) 30 vel hman a ni a. Hemi a inhnamhnawih mi 3 te chu excise kutah hlan an ni.

Branch YMA chuan vengchhung a lo thianghlim zawk nan zu zuar lo tur te, mi dangte tana harsatna siam lo tur leh khawtlang nun siam that nana hma lak mek na hi ngaipawimawh a zawm turin veng mipui a ngen a ni.

VAKIRIA HNATLANGIN SIAM

February 27 nilengin Cultural Sub-Committee ten YMA Hall-ah Vakiria siam hnatlang an nei a, 200 chuang zet an siam a ni.

C. CHUNGLIANTLUANGA'N NUPUI NEI

February 25, 2010 chawhnu dar 2 khan C. Chungliantluanga leh S. Rohlupuii d/o Rev. Lalmuana, Tuithiang te chu Chanmari Presbyterian Biak Inah Dan thianghlimin an innei.
C. Chungliantluanga hi Branch Executive Member niin Sports Sub-Committee ah Vice Chairman a ni.

Branch Executive Member ten YMA Flag nen thla an lakpui.

NULA TLANGVAL RUALIN CHERAW KAN AN ZIR TA MUP MUP MAI LE!

Cheraw kan zir te pawh an phur ta hle mai, a hnai tual tual a zir pawh an tam tulh tulh ta mai. Mi 50 velin tunlai hian lam an zir thin a ni.

HAPPY VALENTINE'S DAY

HALL FUND KHAWN DAWN LO

Kumin chhungin vengchhungah Hall Fund khawn a ni dawn lo.

Hall fund hi kum engemaw zat khawn a lo ni tawh a, nikum chhung khan Hall Fund atangin Rs. 2,77,637/- leh hall hmanna atangin Rs. 2,42,650/- hmuh a ni a. Hall hi la sak zawh chiah a la ni lova, amaherawhchu zawi zawia hall hmanna man atanga a intum chhoh theih tawh avangin kumin chhung chuan Hall Fund hi veng mipuiteah khawn a ni tawh dawn lo.

Thahnemngai taka Hall Fund khawntute leh veng mipuite chungah Branch YMA chuan lawmthu a sawi.