Sunday, October 10, 2010

KUANG SIAM HNATLANG

October ni 9 (Inrinni) nileng khan Chanmari Mistiri Associaton-ten kuang siam hnatlang an nei a, kuang 20 chuang siam a ni. Kuang siam hnatlang hi an ni bakah Branch Executive member ten an tawiawm a, hnatlanga chhuank zawng zawng hi mi 50 vel an ni. Zanriah tuihnai tak Branch hruaituten an buatsaih sak nghal a ni.

Saturday, October 02, 2010

UPATE NI ROPUI TAKA LAWM A NI

October ni 1 (Zirtawpni) kha khawvel puma Upate Ni a ni a, MUP, Chanmari Branch-te chuan YMA Hall-ah chawhma dar 11:30 khan a lawmna an nei a, President Pu C. Lianchungnunga'n a kaihruai.

He hunah hian kumin 2010 chhunga MUP member boral mi 4 sunna hun hman a ni a, inneih Diamond leh Golden Jubilee lawmpuina certificate mi 11 hnenah sem a ni bawk. Hei bakah an member kum 90 chin chunglam lawmpuina mi 4 leh kum 80-90 chin lawmpuina mi 49 te hnenah muffler sem a ni.

Kumin chhung hian Chanmari Branch MUP member hi mi 232 awmin, an member boralte hi Rs. 1,000/- in an ral thin. Upate Ni lawmna hi MUP Hqrs. atangin Pu Thanseian a rawn telpui.

LALRENGPUIA KAN THEN TA

Pu Lalrengpuia (39),Presbyterian Kohhran hi Pu Lalhluta (L) leh Pi Siamkungi (L) te fa pathumzinga a milai niin June ni 5 1971 khan Aizawl Civil Hospital-ah a lo piang a. A unau te chu : a u Pu Lalremsiama, Durtlang leh a nau Pu Lalremtluanga, Chanmari te an ni. Kum 1985 khan Dawrpui veng atangin Chanmariah an rawn pem a. Kum 1988 - 89 chhung khan Home Guard-ah driver hna thawkin chumi hnuah private-in motor a khalh zui a ni.

Kum 1989 khan nupui neiin fanu 2 leh tu 3 a nei. Renga hi thian kawm thiam tak leh fiamthu duh tak a ni a, tawng pawh a thiam hnem hle.

August ni 20 ah stroke avangin Durtlang damdawiinah dah a ni a. September ni 6 ah lo chhuakin September ni 29, (Nilaini) tlai dar 5:00 khan chatuan ram min lo pansan ta a ni.

Saturday, September 25, 2010

MINI SPORTS COMPLEX SIAMTHAT MEK A NI


Mini-Sports Complex siamthat mek chu ngawrh taka thawh a ni.

YMA INFORMATION CENTRE SAK THAT MEK A NI


YMA Information Center sak that mek a ni a, tuna silpouline in a khuh hi a ban khur tur a ni.

INDIA RAM PRESIDENT LO ZIN


September ni 23 khan India ram President Pratibha Devisingh Patil chu Mizoram University Campus, Tanhril a 6th Mizoram University Convocation hmanpui turin a lo kal a. President hi official mi pawimawh dangte bakah a pasal Dr. Devisigh Sekhawat an a rawn tawiawm a ni. Zankhat riaka lo kal President hian Mizoram University Convocation a hmanpui hnu zirtawpni tlai khan Tripura panin Aizawl a chhuahsan leh ta

Saturday, September 18, 2010

CHANMARI GAMES - 2010 TAN A NI TA


September ni 18, 2010 Inrinni chawhma dar 9 khan High Field-ah Section palite inelna tura buatsaih Chanmari Games, ni thum awh tur chu Sports Sub-Committee kaihhruaina hnuaiah Pu JH. Ramnghinglova, Chanmari Branch YMA Adviser chuan a hawng .

Chanmari Games hawnna hun hi Pu R. Lalhmachhuana, Chairman, Sports Sub- Committee in a kaihruai a. Games hawngtu Pu JH. Ramnghinglova chuan, " Chanmari vengin infiamna lama hmahruaitu kan nih nan leh vengchhungin inpumkhatna tha tak kan neih theih nan Chanmari Games hi hman thin a ni´ a ti a. Kum 1982 atanga Chanmari Games hi neih tan a nih thu a sawi bakah hlim taka Chanmari Games hman a nih theih nan Sports Sub-Committee hnenah Rs.2,000/- a pe nghal.

Saturday, September 11, 2010

CHANMARI GAMES 2010 TAN A NI DAWN

Chanmari Games 2010 chu Sep tember ni 18, 2010 (Inrinni) chawhma dar 9 hian GHSS Field-ah tan a ni dawn ta. Games-a lawmmante hi Medal System-a siam a ni dawn a. Mimal hnenah lawman pek a ni lovang. A pumpuia Section Gold hmuh tam dan indawta pawisa faia lawmman pek tur a ni. Games neih ni leh item tur
hetiangin:

September ni 18, Zing dar 9:00
A hmun: GHHS Field.
Items : 1. Football (Semi finals below & above 35 yrs) 2. Volley Ball (W) 3.Spoon Race (W) 4. Shot Put (M & W)

September ni 25, Zing dar 9:00
A hmun: GHHS Field.
Items : 1. 100 mtrs Race 2. Relay Race 3. Throwball 4. Football (Final) 5. Tug of war 6. YMA chhang Games

October ni 14, Zan dar 7:00
A hmun : GHHS Indoor Stadium (Hall)
Items: 1. Badminton (M & W) 2. Table Tennis 3. Chinese Checker(W) 4. LTP (Open) 5. Dart Throw (Open)

K. THANGPUII KAN THEN TA

Pi K. Thangpuii (76), Sec-II, Presbyterian Kohhran hi Chhingphunga (L) leh Chalruali (L) te fa niin kum 1934 khan a lo piang a, unau 8 an ni. Kum 1956 khan R. Lianthanga (L) nen Vanlaiphaiah innein fa 7 (mipa 4; hmeichhia 3) an nei.

Zirna lamah chuan Class VI thleng a zir. Mizoram hmun hrang hranga sorkar hna a thawh hnuah kum 1981 khan Health Worker hna a thawh laiin voluntary-in a pension. Amah hi nu rilru tha, tu leh fate hmangaih leh inngaitlawm tak a ni. A tu leh fate Pathian thu kawhhmuhin a kaihruai thinin Pathian hnena thilpek a ngai pawimawh hle.

Kum 2007 atang khan thawhah leh thisen sang a nei tih hriat a ni a. July ni 22 khan Civil Hospital-ah lutin September ni 5, 2010 zan dar 6:50 khan chatuan ram min lo pansan ta a ni.A ruang hi tlaivar pui niin thlanmual hluiah phum a ni.

Saturday, September 04, 2010

YMA PLATINUM MARATHON

Central YMA Platinum Jubilee leh Mizoram Range Assam Rifles Golden Jubillee lawmna leh vaihlo thatlohzia leh taksa taksa insawizawi inzirtirna ni pah fawmin State Level Half Marathon chu nimin september ni 4, 2010 zingkar khan neih a ni a. Chanmari Branch YMA atangin mi 4 lai branch hmingin an tlan a ni.

Chanmari Branch YMA aiawhin heng mite hi an tlan : 1.Lalfakzuala Hnamte s/o Sanghluna Hnamte, Sec-I; 2. John Laltantluanga s/o Peter Vanlalhriata, Sec- III; 3. H. Lalmawizuala s/o H. Lalsangliana, Sec-III; 4. Joel Hlychho s/o Sacho Hlychho.