Saturday, March 19, 2011

BIALTU MLA LEH MINISTER-IN Y ROAD A HMUNAH AN TLAWH


March ni 18, zirtawpni zingkar khan Bialtu MLA, Pu Lal Thanzara leh Pu Zodintluanga, UD & PA etc. Minister-te chuan Y-Road hnathawh an tlawh a, Bialtu MLA chuan a chhunzawmna tur pawisa a theih anga hmaa nghaihtuahsak a tum thu a sawi. Hei bakah Y-Road siamna atana hnawksak tui pipe leh electric ban sawn chungchang pawh a concern Department hotute lo sawipui a tum bawk.

Kum 1990 atang khan Y Road a tlang theih nan hmalak a lo ni tawh a, tun thlengin Y-Road laihna atan hnatlang tha 2100 sengin Rs. 70,015 zet helai bawra chengte hian an lo thawh tawh a ni.

Kum 2006 khan Chanmari khawtlang mi 500 zet ten hnatlangin kawng laih hna hi an tan a. Kum 2007 kum laihawl velah chhuahlam (Pu Dunglena in lam) ah motor kal theiha siam a ni a. Kum 2008 tir lam khan blacktop a ni.

Saturday, March 12, 2011

NUPA TUAK THAR


PC. Lalremtluanga, Section-II committee member leh PC. Lalremmawii d/o PC. Lalhmangaiha, Khawzawl Vengthar te chu March ni 11 khan Chanmari Presbyterian Kohhran Biak Inah an innei.

Saturday, March 05, 2011

CHAPCHAR KUT ROPUI HLIM TAKIN HMANG ZO TA



March ni 4, zirtawpni khan AR Lammualah Chapchar Kut ropui taka hman a ni a, Pu Lal Thanhawla, Chief Minister chu Kut Pa a ni. Khual zahawm hi Beth A Payne, US Consul General a ni. Branch YMA 84 velin Mizo hnam lam chi hrang hrang leh Mizo nunphung tarlang thei an entir. Chanmari Branch YMA atangin mi 40 zet he kut hmang hian kalin Cheraw, Chai leh Khullam an entir.

Monday, February 28, 2011

R. SANGMAWIA KAN THEN TA

Pu R. Sangmawia, kum 58, Sec-III, Presbyterian Kohhran hi Pu R. Lianthuama (L) leh Pi K. Kapliani te fa 10 zinga a upa ber atanga 5-na niin November ni 16, 1952 ah Chhingchhipah a lo piang a. Thenrual ngaina, midang huphurhna nei lo, chhungkhat laina huikhawm thiam leh tawngtai ngaina mi a ni.

Kum 1977-ah Tlangliani d/o Thangsuaka (L) nen inneiin fapa 1 leh fanu 6 an nei. Kum 1979-ah Electrician Grade II, PWD ah lutin 1993-ah Grade I-ah kaisangin Lunglei leh Kolasibah te a awm a. Kum 2001 atangin Electrical Division PWD, Aizawlah a thih ni thlengin a thawk a ni.

September 2010 khan a chaw kawng a cancer tih hriatchhuah a ni a. September 2010 leh January 2011-ah Tata Memorial Hospital, Mumbai pan pui a ni a. Grace Nursing Home Aizawlah Chemotherapy pe a enkawl chhunzawm a nih mek laiin February ni 22, thawhlehni chhun Dar 12:00 khan chatuan ram min lo pansan ta a ni. Amah hi YMA Life Member a ni.

VANLALLIANA COLNEY KAN THEN TA

Pu Vanlalliana Colney, kum 46, Sec- I, Chanmari Presbyterian Kohhran hi Pu Chuailova leh Pi Darchhungi(L) te fa pasarih zinga a naupang ber niin September ni 7, 1964 khan Champhaiah a lo piang a. Zirna lamah chuan pawl 10 (Matric) thleng a zir a. Kum 1986 ah Rohmingliani, Phuaibuang nen inneiin fapa 1 leh fanu 3 an nei a ni. Amah hi Chanmari Branch YMA member ni lai a ni.

Kumin January thla tawp lam atang khan chaklohnain a tlakbuak a. February ni 7 ah Presbyterian Hospital, Durtlangah dah luh niin mit liam leh thin tha lo a nei tih hmuhchhuah a ni a. Theihtawpa enkawl chhoh a nih mek laiin February ni 16, ningani zing dar 1 khan chatuan ram min lo pansan ta a ni.

REBECCA LALZARZOLIANI KAN THEN TA

Rebecca Lalzarzoliani, kum 18, Sec- IV, Chanmari Pres-byterian Kohhran hi Pu Lalnunkima leh
Pi Laltanpuii te fa hmasa ber niin October ni 17, 1992 khan a lo piang a. Unau pianpui mipa pakhat Vanengzuala neiin tunah hian Pu K. Thangzuala Building-ah an khawsa mek a ni.

Amah hi Chanmari Branch YMA member, Chanmari Branch KTP Member, Bible Society of India Life Member leh Zorun Cultural Club Member ni lai a ni.

February ni 14, 2011, thawhtanni tlai dar 4:30 vel khan chatuan ram min lo pan san ta a ni.

'Y-ROAD' KAWNG LAIH CHHUNZAWM


Chanmari atanga Laipuitlang pan chhohna kawng hi khawtlang hruaitute leh helai pangpera paho ten tunhma atangin motor kal theiha siam a nih theih nan hma an lo la tawh thin a. Helai venga in neitute inphalna leh khawtlang hruaitute hmalaknain sorkarin NBCC kal tlangin motor te kal theihin a siam ta a. Laipuitlang lam atanga kawng 2 chhuk thla infin tura ruahman a nih vangin a hmingah pawh ‘Y Road’ vuah a ni. Aizawl North III Bialtu MLA Pu Lal Thanzara chuan he kawng hi a hna hmasaah ngaiin alkatra-in a luan nghal a. Y-Road peng lehlam tur pawh siam dan ngaihtuah zel niin Chanmari Local Council Chairman Pu T. Lalhluna leh Bialtu MLA te thahnemngaihna zarah Pu CL. Ruala MP Fund Rs. 5,00,000/- hmangin tunah hian bul tan a ni leh ta a ni.

Sunday, January 09, 2011

2011 BRANCH YMA HRUAITUTE

Chanmari Branch YMA Office Bearers:

President Pu Laldinpuia Sailo
Vice President Pu Lalhmangaiha
Secretary Tv. Lalengliana
Asst. Secretary Pu Vanlalruata
Treasurer Pu Lalfakawma
Fin. Secretary Pu Lalduhawma

Executive Members:

Pu Lalramliana Pu C. Vanlalnunga Pu Lalsawmkima
Pu Lalpara Pu Vanneihtluanga Pu R. Sangliana
Pu PC. Lalramliana Pu A. Lallungmuana Pu Lalremruata Sailo
Pu RK. Zohmingthanga Pu Vanlalruata Kawlni Tv. Zoramthara
Pu F. Lalthlamuana Nl. Lalrinsiami Pu William MS. Dawngliana
Pu R. Lalrinkima Tv. H. Thantluanga Pu C. Chungliantluanga
Pu Lalrinthanga Pu R. Lalhmachhuana Pu C. Laldinliana Pu Lalbiakliana
Pu F. Lalhmangaiha Pu C. Lalrinawma
Tv. Romalsawma Pu Richard Lallawmzuala
Dr. Lalrinthanga Pu John Zoramengmawia
Tv. Jimmy Lalramthara Pu VL. Malsawma
Pu Lalzarliana Pu Rothangzuala

CONCERT ROPUI TAK NEIH A NI

December 31, 2010 zan khan Chanmari YMA Hall thlangah Central YMA leh Mizoram sorkar huaihawtin concert ropui tak neih a ni a, veng pawh atangin zaithiam sawm an nih bakah veng chhung atangin band engemaw zat an tel.