Saturday, May 28, 2011

ZOHMACHHUANA (ZOHMAA) KAN THEN TA

Pu Zohmachhuana, kum 46, Sec-II, Presbyterian kohhran hi Pu R. Lianthanga (L) leh Pi K. Lalthangpuii (L) te fa 7 zinga 4-na niin December 11, 1964 khan Serchhip-ah a lo piang a. 1991-ah Vanlalsiami, Venghlui nen inneiin fa 3 an nei.

Lunglei Polytechnic atangin Diploma in Civil Engineering a zir zo a. 1989 atangin PHE Department-ah thawk tanin 2010 atanga a hun tawp thlengin Aizawlah a thawk a ni.

Infiamna lamah hnuhma a ngah hle. Chanmari Veng tan bik chuan Talent Hunt, J.Lalsangzuala Trophy, Lalthangvunga Memorial leh Lalhema Trophy-a an champion theihna kawnga tha thawh nasa ber pawl leh Badminton, Athletics leh Indoor games-ah te Chanmari Veng hming tithatu a ni thin.

Mîtliam avangin May 3 khan Aizawl Civil Hospital-ah dah a ni a. May 22 chawhnu dar 2 khan chatuan ram min lo pansan ta a ni.

FIRE PREVENTION AWARENESS FILM CHANG DAWN

Central YMA leh Fire & Emergency Services Department bul tumin Chanmari Branch YMA chuan film, ‘Kangmei kara hmangaihna’ chang turin hma a la tan.

Fire & Emergency Services Department-in Central YMA hnena kangmei laka inven dan entirna film siam tura a ngenna chu Central YMA, Media & Documentation Sub-Committee chuan Chanmari Branch YMA chu he film chang tur hian a ruat a. He film thawnthu hi Executive Member Pu Vanneihtluanga ziah a ni. He film hi October thlaa release tur a nih avangin September 2011 aia tlai lova peih fel hman tum a ni.

I HMU TAWH NGAI EM?





Saturday, May 21, 2011

LEM INZIAHSIAK RESULT


Chanmari veng naupang kum 12 chin hnuailam tana ‘Zuk leh hmuam that loh zia’ lantirna lem inziahsiak Chanmarians in a buatsaih result puan a ni a, he inziahsiakah hian Manga, kum 10, Section III, House No. F-22/C, Govt. Chanmari Middle School zirlai chu ziak thiam ber a thlan a ni.

BIAKNGURI KAN THEN TA

Pi Biaknguri (79), Sec-I, Presbyterian Kohhran hi kum 1932 khan Biateah a lo piang a, an unau hi 9 an ni. Kum 1950 ah Kharbawiha (L) nen inneiin fa 6 leh tu 16 leh tuchhuan 11 a nei.

An nupain 1951 khan Salvation Army-ah Commission Officer an ni a, 1961 ah Officer hna an chawlhsan. Kawnpui Salvation Army dintu leh sulsutu pawimawh tak an ni bawk. Chanmari Presbyterian Kohhran, Non-Mizo Christian Fellowship-ah inhmang thinin kohhran leh khawtlangah mi tangkai nih a tum thin.

2010 kum tawp lam khan pneumonia leh zun kawng tha lo vangin damdawi in hrang hrangah enkawl a ni a, heta tang hian that chhuah tak tak nei lovin May ni 19, ningani zing dar 11 khan pneumonia avangin chatuan ram min lo pansan ta a ni.

KAPLIANA KAN THEN TA

Pu Kapliana (63), Sec-I, Presbyterian Kohhran hi Pu Chhanhima Ralte leh Pi Ngurkhumi te fa upa ber niin Mualvum Kawnpuiah a piang a. Unau pianpui 9 a nei a, 4 an la dam. Pi Lalparmawii, Sihphir nen April ni 31, 1976 khan Kawnpui Presb. Kohhranah an innei a, fanu 5 neiin tu 10 an nei bawk.

Kum 1978 khan Mizofed Driver atan lak a ni a, kum 2007 khan a pension. A service chhung hian Driver huaisen lawmman a dawng nghe nghe a ni.

August 2009 khan Cancer a vei tih hriatchhuah a ni a. Kum 2009 - 2010 chhung khan tum 4 zet AMRI Hospital, Kolkata panpui a ni. Grace Nursing Home, Aizawlah enkawl a nih hnuin May ni 1, 2011 Pathianni chawhma dar 10:30 khan chatuan ram min lo pansan ta a ni.

Sunday, May 15, 2011

Chanmari veng chawlhbuk (Shed)

Veng lun ve fu e tilo chuan Chanmari vengah hian len khawthawnna tur hmun kan nei lo hle mai. Tun hma chuan Kawngpuiah te kan infiamin dawr bathlar vela thutkhawm an ching hle a. Mahse chutiang reng chuan a tih theih tawh si loh.. Pawn lama inkawm khawmna tur kan tlachham hle a ni.

Chutih laiin Nikum April thla khan Chanmari kawna YMA Information Centre (Nl Ramdini dawr thin) bul, kawng zingzum laiah hian kan khawtlang hruaitute chuan Chawlhbuk (Waiting Shed) nuam tak an sa a. Hei hi sak zawh a nih veleh atangin Veng mipuite bakah Chanmari Veng tlawhtute chuan kan hmang nasa hle. Zirlaite, zin veivakte bakah vengchhung thalaite hian kan chhawr hle mai. A hmun hi a rem a, a lun hle bawk. Chutih rualin he hmun vawnfai leh thianghlim kawngah hian mitinin mawh kan phur lawi si...

MI CHHUANAWM Tv. LALHRUAISANGA, BRITISH ARMY

Pu Lalkailiana leh Pi Zoliansiangi, Section-III te fapa upa ber Lalhruaisanga Vanchhawng hi August 1985 khan a lo piang a. St. Paul’s High School, Aizawl atangin Matric 1st Division-ah pass-in, St.Paul’s School, Darjeeling atangin Class XII (Humanities) a pass.
2009 kumtirah a patea, Pu Lalremsiama London-a chengte hnenah chhukin British Army an lakna (Recruitment interview) ah a intlar ve a (Commonwealth ram te tan British Army ah luh theih a ni). Enchhinna hautak tak engngemaw zat paltlangin British Army, Irish Guard-ah a lut a. (Irish Guard hi lalnu vengtu bik an ni).
2010 khan International Security Assistant Force (ISAF) hnuaiah Afghanistan a kal tura thlan a ni a. An kal hma hian England-ah Afghanistan ram ang chiaha cheibawl hmunah te, degree 50 zeta lum Kenya ramah te leh minus degree a vawt Scotland-ah te training an nei leh a. 2010 October-ah Afghanistan-ah a awm tan a. An awmna hi Kandahar khaw bul lawk Rahim-ah a ni. Thla 6 a awm hnuah chawlh a rawn hmang mek a ni.

Hruaisanga hi May ni 19 hian Londonah a chhuk leh dawn a. A thlenthlak hnuah chawimawina tangkapui Tour Of Duty Medal chu Prince William-an a hlan dawn a ni. Kan lawmpui hle.

Saturday, April 30, 2011

PROMINENT JOURNALIST CHAWIMAWINA PU LALBIAKTHANGA PACHUAU IN A DAWNG

Chanmari veng pa Pu Lalbiakthanga Pachuau, Zoram Tlangau Editor ni bawk chu April ni 28, ningania Mizoram Journalist Association General Conference I & PR Auditorium-a neihah Prominent Journalist chawimawina hlan a ni.

Pu Lalbiakthanga Pachuau hi kum 1927 ah Saichalah a piang a, kum 17 chhung sipaia a tan hnuah, kum 1980 atangin Zoram Tlangau chanchinbu a enkawl tan a. MJA Secretary term khat, Vice president term hnih leh President term thum a chelh tawh a. Mizo zinga prominent journalist palina niin tunah hian Association for Blood Donation, Second World War Veteran Association leh Mizoram Social Defence Union-ah te President a ni mek bawk.

Pu Lalbiakthanga Pachuau hi Chanmari Branch YMA Adviser lo ni tawh in an chhungkuain Section-III ah an khawsa mek a. Hetianga ram leh hnam tana mi chhuanawm, chawimawina dawng thei Chanmari vengin a nei hi Chanmari Branch YMA chuan a chhuangin a lawmpui takzet a ni.

Saturday, April 23, 2011

CRICKET CHAMPION CHANMARI


April ni 21, ningani khan Central YMA buatsaih Tantia Inter Branch YMA Cricket Tournament vawi-7 na chu zawhfel a ni ta a, Chanmari in Ramhlun Venglai hnehin an Champion a, pawisa fai Rs. 10,000 leh Certificate a dawng.

Final-ah Chanmari toss-ah chakin bat hmasak thlangin run 150 siamin wicket 4 an hloh a, chu chu umin Ramhlun Venglai chuan over 20 ah wicket 9 hlohin run 141 chauh an siam theih avangin Chanmari hi run 9-a chakin a vawi 3 nan an Champion ta a ni.

Final-ah hian Tv. Lalfakzuala, Sec-I chuan run 48 siamin Man of the Series a thlan a ni a, hei hian Trophy leh Rs. 1000 a keng tel a, kum 2005-ah a lo la tawh bawk a ni. He inkhelah hian Tv. Zothantluanga, Sec-II run-44 (not out) siamin, Tv. R. Lalhlimpuia (Tetea), Sec-I chuan wicket 3 a la a. Tv. Lalawmpuia (Op-a) leh Tv. Victor Ramchhana, Sec-IV ten wicket 2 ve ve an la bawk. He inkhel hi veng mipuiten an hlut a, Neuhof leh Staines Memorial School naupang thahnem takin an rawn tawiawm bawk.
Central YMA Cricket Tournament hi vawi 7 awm tawhin kumin hi Chanmari leh Ramhlun Venglai te chu final-ah vawi 3 an intumna a ni a. Ramhlun Venglai leh Chanmari tum hnih ve ve lo champion tawh an ni, ti hian Chanmari chu 2005,2009 leh 2011 ah a Champion ta a ni.

Tun tum inkhelah hian Chanmari BranchYMA hian run 750 ngawt a siam a. Chanmari hi vawi hnih bye-in Pre Quarter Final-ah Chaltlang North nen intumin run 230 an siam a, Quarter Final-ah Armed Veng nen intumin run 205 an siam leh a, Semi Final-ah Ramhlun North nen intumin run 150 siam lehin Final-ah Ramhlun venglai nen intumin run 150 an siam a ni.