Saturday, July 09, 2011

HARHNA DILA TAWNGTAI BEIHPUI THLAK A NI

Chanmari Presbyterian Kohhran chuan tunkar July ni 3-9 chhung zawng khan Thlarau Thianghlima Harhna dilin chhum lo chat lova Tawngtai Beihpui a buatsaih chu nizan dar 7 inkhawmah tih tawp a ni.

July ni 3, Pathianni zan inkhawm ban dar 8 -9 khan Tawngtai Beihpui hi Upa Lalhrangluaia’n a hawng a, hemi zan hi Kohhran mipuite inkhawm kim zanah an puang a, inkhawm pawh an thahnem hle. Zan dar 9 atangin tawngtai hun tan nghal a ni a, chatlak awm hauh lovin nizan dar 7 inkhawmah tih tawp a ni ta a ni. He tawngtai beihpui kharna hunah hian Bialtu Pastor Rev. K. Lalhmingliana’n Pathian thuchah a sawi.

Chanmari Kohhran hi upa bial 17-ah then a ni a, Danzawhkim mi 2,850 bawr vel an awm a ni. Dan zawhkim zawng zawngte hi tawngtai tura ruat vek an ni a, Upa bial dungzuiin Group 56 ah inthenin, Group tinah member 50 bawr vel an awm zel a ni. Group tinte hian darkar khat zela inchhawkin tum thum theuh Biak Inah an tawngtai a, chhumlo chat lovin darkar 142 chhung lai an tawngtai a ni. He tawngtai thupui ber chu Harhna dil a ni a, thupui hi Pathian hnena lawmthu sawi, Sual thupha chawi, Harhna dil leh Kan ram tana dilna te a then hran leh a ni.

Saturday, July 02, 2011

REMNA NI CHAMPHA VAWI 25-NA ROPUI TAKIN LAWM A NI

June ni 30, Ningani khan India sorkar, Mizoram sorkar leh Mizo National Front (MNF) ten inremna thuthlung, Peace Accord, an ziah ni champha vawi 25-na lawmna inkhawm ropui takin Vanapa Hall-ah neih a ni. He inkhawm hi Mizoram sorkar leh Mizoram Kohhran Hruaitute Committee (MKHC) tangkawpin buatsaihin, Mizoram chhunga District khawpui zawng zawngah he hun hi hman a ni bawk.

CHIEF MINISTER IN MIZORAM CHU VAIHLO AWM LOHNA STATE NI TURIN A PUANG

June ni 29, Nilaini khan Chief Minister Pu Lal Thanhawla chuan Mizoram chu Vaihlo awm lohna State, Smoke Free Mizoram, ni turin a puang.
Hemi puala inkhawm, a chenna banquet hall-a buatsaihah Pu Lal Thanhawla chuan Mizoramah mei zuk tih reh a nih theih nan kum 22 teh meuh Indian Society on Tobacco & Health (ISTH) Mizoram Chapter in hma alo lak tawh chu rah a chhuah tan chho mek a, mei zu mite pawh an ralti deuh tawh a ni a ti a. Duh angin an thawhrah chaklo mah se, tha thlah lova tumruhna min petu ni zawk se a duh thu a sawi a ni.
Chief Minister chuan meizial heh tak bula awm chu inhremna a ni tiin, thil kan chin dawklakte hi bansan mai a har thin avangin, mei zu mi te pawhin hriselna tan a thalo tih hria a, tumruhna nen an sim theih ngei a beisei thu a sawi.

Ruihhlo ngaite pual Camping

June 27 - July 9, 2011 chhunga Ruihhlo ngaite leh Hmeichhe rahbi tleu tawhte tana Central YMA-in Chhandamna Camping, Krista Hnungzuitute Tawngtai Bethel Camping Centre, Chawnpuia a buatsaih chu tan a ni.
He Camping-ah hian Campers 498 (Mipa 392 leh Hmeichhia 106) an lut a, Speaker atan Lalsanglura Ralte, Sons of God Ministry chu hman a ni. He Camping hi a hlawhtlin ngei theih nan mimal, chhungtinte leh Kohhran hote tawngtaipuina Central YMA chuan a ngen a ni.

Saturday, June 25, 2011

LEM INZIAHSIAK RESULT


Chanmari veng naupang kum 12 chin hnuailam tana ‘Kang mei laka fimkhur tura inzirtirna lam
hawi’’ Chanmarians-in lem inziahsiak a buasaihah Dimel Lalngaihzuali (11) d/o Lalrizami, Sec-I, Mount Carmel a zirlai chu ziak thiam bera thlan a ni.

FILM SHOOTING TAN A NI


Central YMA leh Fire & Emergency Service ten an buatsaih kangmei laka fimkhur
chungchang inzirtirna film "Kangmei kara hmangaihna" chu June ni 22, nilaini zan khan shooting neih tan a ni.
Shooting hi September thlaa Central YMA a thehluh hman tura ruahman ruahman a ni.

Sunday, June 19, 2011

ZOHMINGLIANA (TETEA) KAN THEN TA

Tv. Zohmingliana (Tetea) (46), Sec-I, Presbyterian Kohhran hi Pu RD. Dennis-a (L) leh Pi Thankhumi te fa 8 zinga 6 na niin kum 1964 khan a lo piang a, 2002-ah Lalparmawii nen inneiin fapa pakhat an nei. Amah hi mi pawisawi lo, fiamthu thiam leh thian ngaina tak a ni.

Infiamna a ngainain football leh badminton a thiam hle. Kum 1982 School Games-ah Mizoram aiawhin UP-ah football a lo zu khel tawh a ni. Rawngbawlna lamah pawh a tuiin a inpe zo hle a, TNT-ah te rawngbawlin a lo khawsa tawh thin a ni.

Kum 2010 kumtawp lam khan thin thalo avangin Newlife Hospital-ah enkawl niin Civil Hospital-ah tum hnih ngawt enkawl a ni bawk a. A hnuah in lamah enkawl chhunzawm a ni. Tun hnai khan Care Hospital-ah enkawl a ni leh a. A thin \halo hi a lo nasat tawh avangin June ni 16, ningani khan chatuan ram min lo pansan ta a ni.

YMA DAY ROPUI TAKA LAWM A NI


Chanmari Branch YMA chuan YMA Day pualin June ni 14, thawhlehni khan Hermon Children Home, Durtlang chu ruai theh sakin zanah programme hlimawm tak a hmanpui a. Ruai hi Children Home-a naupang enkawl mek mi 120 leh thawktu mi 5 ten an theh a ni. He hunah hian Durtlang Leitan YMA Branch OB te sawm an nih bakah Chanmari Branch YMA OB ten ruai hi an kilpui bawk.

Zan lamah Hermon Children Home Hall-ah Programme hlimawm tak hmanpui niin Chanmari Branch hnuaia Sub-Committee hrang hrang eh Market Committee member thahnem tak ten an telpui a.





Branch YMA chuan YMA Day-ah hian \anpui nan CADS, Central YMA (Ruihhlo ngaite Camping pual) leh Krista Pasal\ha Bethel Camping Centre, Chawnpui hnenah thilpek pein Executive Member ten an awmna hmunah kalin an pe a ni.

YMA DAY LAWM NAN YMA CHHANG INTIHHLIMNA BUATSAIH A NI




YMA Day June ni 15, nilainiah YMA Chhang pualin Govt. Mizo High Field-ah intihhlimna neih a ni a. He hun hi Sports Sub-Committee ten buaipuiin intihhlimna chi hrang hrang - Football, LTP, Tug of War, Sack Race, Throw Ball, NeedleRace, Apra Insual, Musical Chair, Spoon Race, 100 & 200 Meter Race leh Ketaminu Intlansiakah te intihhlimna neih a ni. Hemi ni hian naupang 300 chuang kalin nu leh paten an tawiawm bawk a. Sports Sub-Committee ten kal zawng zawngte tan squash leh artui semin naupang te hnenah sketch pen an pe theuh bawk.

He hunah hian Branch Executive leh Sports Sub Committee ten Football-ah Exhibition Match an khela an inhnehtawk a ni.

Saturday, June 11, 2011

LOCAL FOOTBALL TOURNAMENT ZAWH A NI


Pu R. Lalhmachhuana te chhung, Sec- III in an fanu boralta hriatreng nana an buatsaih 1st Vanlalrohlui Memorial Football Running Trophy 2011, June ni 4 atanga tan chu June ni 6, thawhtanni khan AR Lammualah zawh a ni ta.

Final-ah hian Auss FC leh Khiiitah FC te intumin Auss FC hi 1-0 in an chak. Auss FC hian trophy leh Rs. 3,000 an dawng a, Khiiitah FC hian trophy leh Rs. 1,500 an dawng bawk.

Best player-ah Tv. Lalthantluanga (Tataw-a), Auss FC chu thlan a ni a, Trophy leh Rs. 500 a dawng a. Best Goal Keeper- ah Tv. Lalawmpuia (Op-a), Auss FC thlan niin Trophy leh Rs. 500 a dawng. He intihsiaka vawi 5 pet goal-tu Tv. Rochhingpuia (Buaisuh FC) chu Top Scorer an thlan niin Trophy leh Rs. 500 a dawng bawk