LALBUAII KAN THEN TA

Pi Lalbuaii, kum 97, Sec-II, Presbyterian Kohhran hi kum 1915 khan Selamah a piang a. A pa chu Chhingvunga (L), Selam lal a ni a, a nu chu Ngainemi (L) a ni. Kum 1934 khan K.C. Khamtuala nen inneiin mipa 3 leh hmeichhia 7 an nei a, tu leh tuchhuan 67 neiin khup thum a hmu a ni.Kum 1950 khan Selam atangin Chanmariah an rawn pem a. Eizawnna avanga hmun hrang hranga an pem kual hnuah 1994 khan Chanmariah an rawn let leh a. Kum 2004-ah a pasal Pu Khamtuala (97) chuan a boral san a ni.

Pathian tih mi niin a dam that chuan Pathian Biak inkhawm a pelh ngai lo.
August ni 24, nilaini khan hritlang awm nain tlakbuakin hniam lam a pan hret hret a. August ni 29, thawhtanni tlai dar 6:30 khan chatuan ram min lo pansan ta a ni.

YMA GENERAL CONFERENCE AGENDA THLI FIM

September ni 2-a CEC Meeting chuan YMA General Conference 2011 lo awm tura Aizawl khawpui chhung atanga Agenda lutte chu CCC Meeting-a chhawpchhuah turin hengte hi a passed:

YMA KHAWIH:

1. Mizoram khawpui hrang hrang thlanmual intawm (Common Cemetery) kan neih theih nan Central YMA-in hma la rawh se.
2. Mizorama Project/Industry-ah leh leilung hausakna haichhuah kawngah ram lei lung faten a tam thei ang ber hamthatna an dawn theih nan Central YMA-in hma la rawh se.
3. Mizorama hnamdang dan lova sumdawngte dapchhuah hna hi YMA hian tun aia chak zawkin hma la rawh se.
4. Mizoram (India) tizim zawnga Border Fencing kal lai mek hi Central YMA-in enpuiin uluk zawka hmalak dan ngaihtuah rawh se.
5. Electoral Roll Revision hrang hrangah khua leh tui dik takte chauh thun an nih theih nan Central YMA-in hma la chhunzawm zel rawh se.
6. Mizo thuam thilte uar zawka hmang turin Central YMA-in hma la rawh se.
7. Kan rama tuihna humhalh leh a awmsa tihpun zel a nih theih nan Central YMA-in hma la rawh se.

SORKAR KHAWIH:

1. School Academic Session tuna kan hman mek hi India State dangte tih dan milin April - March-ah thlak ve ni rawh se.
2. Labour Law kan neih ang angte kenkawh kawngah sorkarin chak zawka hma la turin Central YMA-in ngen rawh se.
3. Pawngsual chungchangah thil tisualtu hremna na zawk siam thar ni rawh se.
4. Mizoramah hmun remchang chuha hnamdangten Bawk an khawh a, khawper an din thin hi a awm tawh lohna turin hmalak ni rawh se.
5. Mizo hmeichhia Non Tribal pasal neite, an pasalte hnam vuan tura Dan (Supreme Court Rulling) awmsa khauh zawka kalpui nise, hnamdang Mizo hminga an hming thlak thinte hi ram leilungfate chanvo humhalh nan sorkarin khapna khauh takin siam rawh se.

KUMPUAN RAWTNA

1. Khawtlang Nun Siamthat
2. Ram leh Hnam Humhalh
3. Ruihhlo Do

Mizoram Governor thar Pu Vakkom B. Purushothaman

September ni 2, zirtawpni tlai dar 5:15 khan Mizoram Governor thar Pu Vakkom B. Purushothaman chu Raj Bhawan Durbar Hall-ah Gauhati High Court Chief Justice, Justice M B Lokur chuan rinawmna thu tiam tirin lakluh a ni ta.

Kum 83 a upa dan hre mi, politician hlun, Kerala Assembly a MLA, Minister leh Speaker lo ni tawh, MP Lok Sabha leh Andaman and Nicobar Islands a Lt. Governor hna lo chelh tawh Mizoram Governor atana lakluh inkhawm tawi fel leh urhsun takah hian India President in Mizoram Governor ni tura a ruatna chu Chief Secretary Pu Van Hela Pachuau chuan a chhiar chhuak hmasa a. Gauhati High Court Chief Justice, Justice MB Lokur in saptawnga thu tiam tirin lakluh a ni ta a ni.

Larsap thar hi April ni 12, 1928 khan Vakkom khua Kerala ah a piang a. Kum 1946 khan student Congress-ah lutin, 1953 khan Vakkom Panchayat hruaitu atana thlan a ni a. President DCC Thiruvananthapuram, General Secretary leh Vice President KPCC nihna te lo chelh tawhin, kum 25 chuang zet AICC member a ni tawh bawk.

Kum 1970, 1977, 1980,1982 leh 2011 ah te khan Attingal Constituency atangin MLA a thlan tlin niin Ministerial Porfolio hrang hrang a lo enkawl tawh thin a. Kum 1982 – 1984 leh kum 2001 – 2004 chhung khan Speaker Kerala Legislative Assembly a ni a. Kum 1984 – 89 leh 1989 – 91 chhungin Lok Sabha MP a ni leh a. MP ni chung hian Chairman, Committee on Public Undertakings leh Committee on Subordinate Legislation of Parliament bakah kum 5 chhung Chairman Consultative Committee of Experts to the CIDP of Inter Parliamentary Union, Geneva a ni tawh nghe nghe a ni.

Larsap thar hi kum 1993 khan Lt. Governor, Andamans & Nicobar Islands a ruat niin kum thum vel he hna hi a thawk a. Kum 1996 khan Global Conference on the Sustainable Development of Small Island Developing States, Barbados a neih ah Indian Delegation hruaitu a lo ni tawh bawk a ni.

Larsap nupui hi Dr. Lily Purushothaman a ni a, fapa pahnih leh fanu pakhat an nei.

VANLALMUANA (KAWNGTEA) KAN THEN TA

Pu Vanlalmuana (Kawngtea), kum 34, Sec-I, Presbyterian Kohhran hi Pu Chawngthuama leh Pi Ramthangi te fa 4 zinga a upa ber niin 1977-ah Presbyterian Hospital, Durtlangah a lo piang a. 2005-ah Lalnunhlimi, Champhai Bethel nen inneiin fapa 1 an nei. Kawngtea hi mi khawngaihna ngah, hlim thei leh zai leh rimawi ngaina mi a ni.

Positive Network of Mizoram dintu zingah telin President a ni. Indian Network of Positive People-ah Elected Board Member niin MSACS-ah Executive Member leh Catholic Relief Service-ah Project Manager a ni bawk. HIV+ ten thinhrikna leh endawngna an tawh thin hi a vei hle a, a um bona kawnga a sulsutu pawimawh ber te zinga mi a ni.

August ni 9 atangin thluaka khawsik leh pneumonia vangin Newlife Hospital-a enkawl niin, August ni 20, Inrinni chawhnu dar 4:55 khan chatuan ram min lo pansan ta a ni.

Benjamin Lalnunhlua kan then ta

Benjamin Lalnunhlua, thla 5, Sec-I, Presbyterian Kohhran hi Lalchhuanthanga leh Ramdinthari te fapa mal niin March ni 17, 2011 khan Civil Hospital-ah a lo piang a.

Thla khat leh a chanve a nih atangin lung vung a nei tan a. He natna avang hian August ni 20 khan Civil Hospital-ah admit a ni.

August ni 21, zing dar 7:30 khan chatuan ram min lo pansan ta a ni.

GUTKHA PRODUCT HAL RAL

August ni 18, zan khan Chanmari Branch MHIP te chuan Gutkha Product an man khawmte an hal ral.

THLANMUAL HNATLANG

August ni 15, thawhtanni khan thlanmual hnatlang neih a ni a, Branch YMA hnuaia committee peng hrang hrangte an thawkchhuak.

LALREMA COLNEY KAN THEN TA

Pu Lalrema Colney, kum 69, Sec-I, Presb. Kohhran hi Upa Hmangaiha (L) leh Pi Biali (L) te fa 9 zinga a 3-na niin December ni 6, 1942 khan Kawnpuiah alo piang a. Pathian ring tlat mi, inkhawm ngai pawimawh tak, fiamthu ngaina leh thenrual kawm thiam tak a ni. St. John School, Kolasibah leh ATS, Shillong-ah te lehkha a zir zawh hnuin 1964 khan Indian Airforce-ah a lut a. 1985 khan Junior Warrant Officer-in a pension a ni.

1969-ah Darkhumi d/o Chhundenga (L), Chanmari nen inneiin fa 3 leh tu 6 an nei. 1987-90 leh 1990-93 ah Chanmari VC Member atan thlan a ni a. MUP, Chanmari Unit-ah Asst. Secretary hna lo chelh tawhin Local MPF-ah Fin. Secretary a nih mek bakah Mizoram Ex-Servicemen Association, Chanmari Unit-ah kum 1990 vel atanga a boral ni thlengin President a ni. Kohhranah thuhriltu a ni.

1990 atangin zunthlum leh thisen sang a nei tan a. June ni 1 khan stroke vangin Presbyterian Hospital, Durtlang-ah admit a ni a. Natna dang dangin tlakbuakin a chak lo chho zel a. Tichuan August ni 16 zing dar 12:40 khan chatuan ram min lo pansan ta a ni.

LEM INZIAHSIAK RESULT

Chanmari veng naupang kum 12 chin hnuailam tana ‘Entirna nei tha, mahni duh zawng zawng’ lem inziahsiakah Lalrinawmi (9) d/o David Lalmuankima, Sec-III chu ziak thiam bera thlan a ni.

KHAWTLNG NUN SIAM THAT BEIHPUI TLAK A NI

August ni 7, Pathianni chawhma inkhawmah Chanmari Branch YMA chuan ‘Khawtlang nun siam that’ tih thupui hmangin Chanmari Presbyterian Kohhran Puitling Sunday School leh Naupang Sunday School-ah thusawina hun a nei.