CENTRAL YMA-IN DAN LOVA SUMDAWNG THENKHAT ENDIK

August ni 6, Inrinni khan Central YMA chuan Mizo hming hawha hnamdang sumdawng thenkhat endik hna Aizawl khawpui chhung hmun sarihah a nei a. Hemi ni vek hian Chanmari vengah pawh Central YMA hmalaknain Mizo hming hawha dan lova sumdawngte dapchhuah hna thawh a ni bawk.Central YMA hruaitu mi pali lo kalte hi Branch hruaituten a tul angin an lo tawiawm a ni.

Chanmari venga Mizo hming hawha sumdawngte endik hna hi chawhma dar 11 atangin neih tan a ni a, Mizo hming hawha sumdawng hnamdang dawr pali-ah kal a ni a.

August ni 10, Nilaini khan Central YMA Hall-ah Hnamdang Mizo hming hawha dan lova sumdawngte leh anmahni Sponsor-tute kohkhawm an ni a, mi 125 an kal khawm.

He hmalakna hi thalai, sorkar hna thawk loten sumdawnna kawng an zawh theih nan leh Mizote Economics-a chimrala an awm loh nana hmalakna a ni a. Mizo mipui zawng zawngte chu hnamdang sumdawngte mahni hming hawhtir lo tur leh, a lo ti mekte pawh August, 2011 thla chhung ngeia titawp turin an ngen a; a bawhzuitu tur pawh insiamin a tul angin Central YMA chuan a hlawhtlin leh tlin loh a vil zui zel dawn a.

KHAWTLANG NUN SIAM THAT BEIHPUI THLAK

Chanmari Branch YMA chuan khawtlang nun siamthat nan beihpui thlak mekin Chanmari vengchhunga Kohhran hrang hrangah ruihhlo thatlohzia inzirtir lam hawi thusawina hun nei turin a ruahman a. A bul tan nan August, ni 7 Pathianni chawhma inkhawmah Executive Member-ten Chanmari Presbyterian Kohhranah thusawina hun an nei.
Branch YMA chuan naupangten damdawi ruih theih an intihhmuh zel loh nan te, nu leh pa leh aia upa zah leh nun dan mawi an hriat theih nan vengchhunga kohhran hrang hrangah inzirtir hun a nei dawn a. A bul tan nan Chanmari Presbyterian Kohhrana Puitling Suday School-ah leh Naupang Sunday School-ahte thusawina hun a nei.

ILP, FOREIGNER LEH HNAMDANG SUMDAWNG CHUNGCHANGAH HMALAK A N

Kum 2010 YMA General Conference thurel ‘Mizo hming hawha hnamdang sumdawng titawp turin Central YMA-in hma la rawn se’ tih leh ‘ILP leh Foreigner chungchangah tun aia chak zawkin hma lak zui zel ni rawh se’ tih chu nimin zing atang khan vengchhungah hma lak \an a ni. A thawhkhatna endik hna hi Central YMA leh Branch YMA ten an nei.

LALNGHETA KAN THEN TA

Tv. Lalngheta, kum 52, Sec-III, Presbyterian Kohhran hi Pu Lalkhawthanga (L) leh Pi Rokamlovi (L) te fa pakua zinga naupang ber dawttu niin 1959 khan Chanmari, Aizawlah a lo piang a. Amah hi mi ngawichawi, midang itsikna leh huphurhna nei lo, rilru tluang leh mi pawisawilo a ni. P.U thleng lehkha a zir a. Gospel Reapers Team leh Nazareth Gospel Team-ahte a phak ang tawkin Pathian rawng a lo bawl thin.

July 17, 2011ah hritlang, awm na leh khawsik avangin Civil Hospital-ah entir a ni a, July ni 28 khan Presbyterian Hospital, Durtlang panpui leh a ni a. Theihtawp chhuaha enkawl chungin hemi zan dar 8:00 khan chatuan ram min lo pansan ta a ni.

LALRUALI KAN THEN TA

Pi Lalruali, kum 56, Sec-II, Salvation Army hi, 1955 khan Buhchangah a lo piang a, an unau hi paruk an ni. K. Vanlalsiama nen Bilkhawthlirah inneiin fa 5 leh tu 11 an nei. 2009 Dec. khan Aizawl Venglai atangin Chanmariah an rawn pem. Amah hi Pathian tih, mi taima, invawng fel, chhungkhat lainate huikhawm thiam leh ngainat hlawh tak a ni.

July, 2007 khan a hnute ding lamah cancer hmuh a ni a, chumi hnuah a chuapah cancer leh a thluakah tumor hmuh leh a ni a, theihtawp chhuaha enkawl a nih hnuin July ni 27, 2011 zing dar 6:40 khan Nazareth Hospital-ah chatuan ram min lo pansan ta a ni.

LALDINPUIA SAILO KAN THEN TA

Tv. Laldinpuia Sailo, kum 33, Sec-III, Presbyterian Kohhran hi Dr. Saikunga Sailo leh Lalthanmawii Sailo (L) te fa pathum zinga naupang ber niin September ni 10, 1978 khan a lo piang a. Amah hi miharhvang tha tak, fiamthu ngaina leh a bula awm nuam tak a ni. Class XI thleng lehkha zirin Mumbai-ah hna thawkin kum 6 a awm hnuah kum 2009 khan Aizawlah alo let leh a ni.

July ni 15, zirtawp tlai khan kaih leh khawsik vangin Civil Hospital-ah dahluh a ni a. Theihtawpa enkawl a nih mek laiin July ni 23, inrinni zing dar 3 khan chatuan ram min lo pansan ta a ni.

LALBIAKZAMA KAN THEN TA

Pu Lalbiakzama, kum 43, Sec-II, Presbyterian Kohhran hi Pu Dengchhuma leh Pi Lalhnuaii te fa 6 zinga naupang ber niin June 1968-ah Kawlhawkah a piang a.
Amah hi mi nun tluang, zaidam leh nelawm, mahni hnaa rinawm, kut themthiam tak leh nu leh pa duat thiam tak a ni.
1992-ah Mizoram Police (MRP)-ah Constable-in a lut a, Kolasib, Bawngkawn leh Kulikawn Police Station-ah te awm tawhin, Kulikawn Police Station-ah a thihni thlengin a thawk a ni.
1999 ah Lalchhuanawmi nen inneiin fa 3 an nei a. 2009 atang khan Chanmariah an khawsa a ni.
Kumin June thla khan Chuap TB a ni tih hriat chhuah a ni a. Enkawl zui mek a nih laiin July ni 12 chawhnu dar 4 khan chatuan ram min lo boralsan ta a ni.

HARHNA DILA TAWNGTAI BEIHPUI THLAK A NI

Chanmari Presbyterian Kohhran chuan tunkar July ni 3-9 chhung zawng khan Thlarau Thianghlima Harhna dilin chhum lo chat lova Tawngtai Beihpui a buatsaih chu nizan dar 7 inkhawmah tih tawp a ni.

July ni 3, Pathianni zan inkhawm ban dar 8 -9 khan Tawngtai Beihpui hi Upa Lalhrangluaia’n a hawng a, hemi zan hi Kohhran mipuite inkhawm kim zanah an puang a, inkhawm pawh an thahnem hle. Zan dar 9 atangin tawngtai hun tan nghal a ni a, chatlak awm hauh lovin nizan dar 7 inkhawmah tih tawp a ni ta a ni. He tawngtai beihpui kharna hunah hian Bialtu Pastor Rev. K. Lalhmingliana’n Pathian thuchah a sawi.

Chanmari Kohhran hi upa bial 17-ah then a ni a, Danzawhkim mi 2,850 bawr vel an awm a ni. Dan zawhkim zawng zawngte hi tawngtai tura ruat vek an ni a, Upa bial dungzuiin Group 56 ah inthenin, Group tinah member 50 bawr vel an awm zel a ni. Group tinte hian darkar khat zela inchhawkin tum thum theuh Biak Inah an tawngtai a, chhumlo chat lovin darkar 142 chhung lai an tawngtai a ni. He tawngtai thupui ber chu Harhna dil a ni a, thupui hi Pathian hnena lawmthu sawi, Sual thupha chawi, Harhna dil leh Kan ram tana dilna te a then hran leh a ni.

REMNA NI CHAMPHA VAWI 25-NA ROPUI TAKIN LAWM A NI

June ni 30, Ningani khan India sorkar, Mizoram sorkar leh Mizo National Front (MNF) ten inremna thuthlung, Peace Accord, an ziah ni champha vawi 25-na lawmna inkhawm ropui takin Vanapa Hall-ah neih a ni. He inkhawm hi Mizoram sorkar leh Mizoram Kohhran Hruaitute Committee (MKHC) tangkawpin buatsaihin, Mizoram chhunga District khawpui zawng zawngah he hun hi hman a ni bawk.

CHIEF MINISTER IN MIZORAM CHU VAIHLO AWM LOHNA STATE NI TURIN A PUANG

June ni 29, Nilaini khan Chief Minister Pu Lal Thanhawla chuan Mizoram chu Vaihlo awm lohna State, Smoke Free Mizoram, ni turin a puang.
Hemi puala inkhawm, a chenna banquet hall-a buatsaihah Pu Lal Thanhawla chuan Mizoramah mei zuk tih reh a nih theih nan kum 22 teh meuh Indian Society on Tobacco & Health (ISTH) Mizoram Chapter in hma alo lak tawh chu rah a chhuah tan chho mek a, mei zu mite pawh an ralti deuh tawh a ni a ti a. Duh angin an thawhrah chaklo mah se, tha thlah lova tumruhna min petu ni zawk se a duh thu a sawi a ni.
Chief Minister chuan meizial heh tak bula awm chu inhremna a ni tiin, thil kan chin dawklakte hi bansan mai a har thin avangin, mei zu mi te pawhin hriselna tan a thalo tih hria a, tumruhna nen an sim theih ngei a beisei thu a sawi.