Mi 78 in thisen an pe

Chanmari Branch YMA huaihawtin July 27, Inrinni khan Chanmari YMA hall-ah thisen pek runpui neih a ni a. Mipa 57 leh hmeichhia 21, a vaiin mi 78 ten thisen an pe a. Thisen pek tum, taksa lam harsatna avanga pe thei ta lo mi 50 zet an awm bawk.

Thisen hi Synod Hospital, Durtlang hnenah pek a ni. Thisen pe zinga upa ber chu, hmeichhia-ah Pi Zohmingliani, kum41, Sec-IV leh mipa-ah Pu H. Lalhlimpuia, kum 51, Sec-II te an ni.

Kan Then Tak

 

Pu P.C. Vanlalsanga (69), Sec-III, Presbyterian Kohhran hi Pu Pangthianga (L) leh Pi Khuangdailovi (L) te fa 5 (M-2; H-3) zinga ami lai niin, June 9,1944-ah Pangzawlah a lo piang a. Kum 1964 vel khan Chanmariah an lo pem a. Kum1975 khan Sangkhumi d/o Lianchhuanga (L), Tlangnuam nen innein, fa 5 (M-3;H-2) leh tu 7 a nei.
St. Paul’s atanga matric pass in, Jowai-ah PU thleng a zir a. Lehkha a zir zawh hnuah contract leh, kum eng emawzat Chanmariah retailer hna a thawk a.Amah hi infiamna ngaina, taima leh mitthi/khawhar in kal taima tak a ni.
Kum 2009 March-ah Civil Hospitalah a pile cancer zai a ni a. An zai dam thahle. Kum 2010 June atangin a HB a hniama, kum 2011-ah thisen tlakchham avanginKolkata-ah kalpui a ni. August 2011-ahCivil Hospital-ah admit a ni a, March2012-ah damdawi in a chhuahsan. Thisen
put vangin July 15, Thawh\anni khan CivilHospital-ah dah luh a ni a, July 18, Ningani zanah thisen a lo put leh avangin a chau zual a, July 19, Zirtawpni chawhma dar11:30 khan chatuan ram min lo pansan ta a ni. Hemi zan hian tlaivarpui a ni

Kan Then Tak

Pu C. Romawia (49), Presbyterian Kohhran hi January 1, 1964 khan Champhaiah a piang a. Pu Pakawlha (L) leh Pi Laithuami te fa 7 zinga 5-na a ni. GM High School, Champhaiah Class X thleng a zir. Zirna chhunzawm lovin Aizawlah sumdawnga bul tanin a inbengbel. Kum 1991 khan Lalramdinthari d/o Lalbiakthanga, Chanmari nen inneiin fa 3 (M-2; H-1) an nei. Sports lam hi a tuina tak niin intlansiakah phei chuan kum 1983 khan Mizoram pum huap High School Games-ah Gold Medal a dawng tawh nghe nghe.
    Kum 2009 khan a insawisel tan a, Doctor-te rawnin a thin a tha lo tih hmuhchhuah a ni a.Tum tam tak damdawi in hrang hrangah admit a ni a. May 13, Thawhtanni khan Civil Hospital-ah admit a ni a, heta tang hian zual lam pan zelin June 16, Pathianni chawhnu dar 2 khan chatuan ram min lo pansan ta a ni.

Chatuan Ram Pan Ta

Pu Hualzauva (79), Sec-I, Presbyterian Kohhran hi Pu Chhawna leh Pi Laltinsawii te fa 7 (M-4;H-3) zinga upa lam atanga pathumna niin, June 18, 1935 khan Tuahzawlah a lo piang a. Kum 1959-ah Pi Biakkungi nen Hmunpui-ah inneiin, fa 7 (M-4;H-3) an nei.
    Rambuai sawikhawm vangin Rawpuichhipah a khawsa a, kum 1972-74 ah  Rawpuichhip VCP a ni. Kum 1986-ah Chanmariah an khawsa tan. Amah hi mi hrisel leh kawm nuam tak a ni.
    September 2010 khan stroke nei tanin Synod Hospital leh Civil Hospital-ah enkawl a ni a. Hemi hnu hian Newlife Hospital-ah leh in lamah enkawl a ni a. Kumin May thla khan Greenwood Hospital-ah enkawl leh niin ICU-ah dah a ni a. May 22, Nilaini zing dar 3:40 khan chatuan ram min lo pansan ta a ni. Hemi ni hian vui nghal a ni.

  Chatuan Ram Pan Ta

  Dr. H.Thanglawra (92), Sec-III, Presby. Kohhran hi Pu Saihenthanga (L) leh Pi Lianzingi (L) te fapa 8 zinga a naupang ber dawttu niin Oct. 2, 1921-ah Parbungah a piang a. Pi S.N.Hnemi nen kum 1946-ah inneiin, fa (M-5;H-4), tu leh tuchhuan 103 a nei a, khup thum a hmu a ni.
    Kum 1946-ah Churachandpur High School atangin matric,1947-ah Intermediate of Art leh 1950-ah B.A. Premier/Cotton College of Assam atangin a pass a, 1957-ah Santiniketan, W. Bengal atangin Bachelor of Teaching a pass a, 1963-ah Northern Illinois University, USA atangin M.Sc (Edn) pass lehin, NCERT, New Delhi atangin National Award 1964-‘65 khan a dawng a. 1999-ah International University, Washington DC, USA in Doctor of Philosophy (Ph.D) a hlan a ni.
    A hovin Assam leh Manipur-ah sikul 7 din a ni a. A hna thawh tawhnate -Pherzawl High School, B.D.O (1957-58), Lecturer - Hrangbana leh Aizawl College, Principal - Manipur College (1970 -74), Mizoram Institute of Education (1975 -86), Lawngtlai College (1988 -89), Lalhmingthanga College, Durtlang(1992), TLR City College, Aizawl(1994). Kum 1986 khan a pension a ni.
    Newlife Hospital-ah May 5, 2012-ah Pneumonia vangin admit a ni a. March 16, 2013-ah Newlife Hospital-ah admit leh niin, ICU-ah Ventilator hmanga enkawl a ni a. May 13, 2013 tlai dar 5:35 ah chatuan ram min lo pansan ta a ni. Hemi zan hian tlaivarpui a  ni. Chanmari Branch YMA chuan lusun chhungte a tawrhpui takzet a ni.

Chatuan Ram Pan Ta

Pi Vanlalruati (47), Sec-II, Baptist Kohhran hi Pu Hrangbana (L) leh Pi Rualkhumi te fa 5 (M-3;H-2) zinga a mi lai niin May 6, 1967 ah a lo piang a. Zirna lamah MA (Eng) a ni a, Govt. Mizo High School-ah a thawk tawh thin. Mi tawng tlem leh taima, pasal fanaute tana inpe tak niin, lemziak a thiam hle.
    Kum 1990-ah Lalthanpuia Chhangte s/o Revd. Dr. C.L. Hminga, Serkawn nen inneiin fanu pakhat an nei.
    Kum 2004-ah thyroid natna a nei tan a. December 2010 khan tlu sualin a ke a titliak a. Kumin March thla khan Delhi ah enkawl turin a kal a. Heta a awm lai hian kal natna leh pum lam thaloin a tlakbuak leh a. April 29, 2013 khan ICU-ah dah niin a tuk April 30 zing dar 4 khan chatuan ram min lo pansan ta a ni. A ruang hi a tuk May 1 khan Aizawl rawn thlenpui niin hemi tlai hian vui nghal a ni. Amah hi YMA member a ni.

Cricket-ah Chanmari Champion leh ta

Central YMA Cricket Tournament 2013 neih zawh takah Chanmari Branch YMA chuan Zarkawt Branch YMA chu hnehin azawnin vawi 3 leh a zavaiin vawi 4 an champion ta.

Chatuan Ram Pan Ta

Pu Subash Shyam (61), Sec-I, Presbyterian Kohhran hi Sitandar Chandra Shyam leh Manisha Shyam te fa 6 (M-3;H-3) zinga a naupang ber niin Feb 15, 1952 khan Shillong-ah a piang a. Shillong-ah seilianin 1971-ah Aizawlah a khawsa tan. 1999-ah Lalrizami nen innein fa 6 a nei a ni.
    Mi taima tak a ni a. Mizorama a awm tirhin Lala dawrah a thawk a, chumi hnuah restaurant a siam a. Vijaya Bank-ah collector hna a thawh hnuin tunah hian Bawngkawnah restaurant a siam leh a. Kumin March thla khan  baptisma a chang a ni.
    Kum 2102 khan insawisel tanin October thla khan Mumbai-ah a inentir a, Motor Neuro Disease a ni tih hmuhchhuah a ni a. March 2013 ah in check up lehin hemi thla vek hian Kolkata-ah enkawl a ni leh a. April 19, 2013, Zirtawpni zan dar 9:35 khan chatuan ram min lo pansan ta a ni. Hemi zan hian tlaivarpui a ni.

Chanmari YMA in Tleirawlte pualin hun hmang

 Chanmari Branch YMA chuan Chanmari veng chhunga kum 12 -17 te pualin April 7 leh, kum 18 - 23 te pualin April 14, 2013 khan YMA hall ah hun a hmang a. YMA a an mawhphurhnate, sex leh ruihtheih thil laka fimkhur a tul thu te, incheina hun leh hmun hriat te leh nun kawng dik an zawh theih nana an hriattur pawimawh te hrilh an ni a. YMA in misualte a zilhhau dan hrilh an ni bawk. YMA President Pu Lalhmangaiha leh Pu Vanneihtluanga ten thu an sawi a ni. (Pic Kum 18-23 on 14 April)

CYMA Cricket leh MPL ah Chanmari a ropui

    Cricket : Central YMA buatsaih 8th Inter Branch YMA Cricket Tournament khelh mekah April 2, Thawhlehni khan Ramhlun Sports Complex-ah Chanmari  Branch YMA leh Venghnuai Branch YMA te an inkhel a, Chanmari hian wicket 9 in hnehna an chang. He inkhelah hian Chanmari tan Lalawmpuia Renthlei in wicket 3 lain, Lalfakzuala Renthlei in run 33 siamin a tawp thlengin a out lo.
    Chanmari hian April 8, Thawhtanni khan Ramhlun Sports Complex-ah Saikhamakawn nen Pre-Quarter Final khel lehin Chanmari hi Wicket 6 in an chak a. He inkhelah hian Chanmari tan Lalhlimpuia (Tetea) chuan wicket 4 a la. April 15, Thawhtanni zing dar 9 ah Chanmari leh Thuampui Branch YMA Team ten Rajiv Gandhi Stadium, Mualpuiah Quarter Final an khel ang.    

MPL  : April 6, Inrinnia MFA Cup final, Serchhipa khelhah Chanmari Football Club  (CFC) chuan Dinthar FC chu 2-0 a hnehin cheng Nuai khat leh No mawi an hawn a. April 13, Inrinni a AR Ground-a MPL Under 17 Competition neihah CFC Under 17 te chuan Dinthar Under 17 te 2-1 in an hneh a, Hemi ni chawhnua MPL khelh chhunzawmah CFC chuan Dinthar FC bawk chu 3-1 in an hneh leh a ni. CFC Dawngtea’n hattrick a siam a ni.(Pic: Chanmari Branch YMA Cricket Team) (Report by Valtea, Editor, Chanmarians)