Sunday, July 26, 2009

"ZONUN ZE MAWI" i dinthar leh ang u

Central YMA-in kumina ‘Zonun ze mawi’ inzirtir uar kuma a puang hi thalaite tan mai ni lo, thang leh tharten an chhawm nun zel tur a nih vangin inzirtir thar leh hi a tul tawh takzet a ni. Zonun ze mawi ti vul leh tur hian YMA Member te hi kan awm mai mai a thiang lova, chet a huna che chhuak nghal thei tura kan puan ven kan sawi chhin a hun ta.
Khawhar in riah chungchangah te, thlan laih leh khawhar chhungte kan tanpui theihna kawng hrang hrangah te leh a tul huna tlawmngaihna kan lanchhuahtirna hmun turah te hian nasa zawka Zonun ze mawi hi kan dinthar leh hi a tul tawh a. Zonun zia hi Mizo te thinlung chhungah hian a beh tlat avangin lak hran thei a ni lova, khawi hmunah pawh awm ila min suih nghet zawk a ni. Chu chu kan pi leh pute atanga kan chhawm nun a ni. A hun taka Zonun ze mawi kan lan chhuah tir hian midangte tan malsawmna kan thlen a ni tih hria ila. Hmanlaia mihuaisen leh tlawmngaiten Thingserh sata ‘Nopui’ an dawmtirte nen danglamna a awm chuang lova. YMA chu ‘Fak leh Chawimawina beisei lova midangte tana thil tha tih” a ni tih thu hi kan hriat nawn fo a tul ta hle.
Zonun ze mawi nena inzawm tlat chu rinawm hi a ni. Hei hian zahawmna leh malsawmna a keng tel a; aia upa kan biak danah te, zirnaah te, eizawnnaah te, inthenawm khawvennaah te hian rinawmna kan lanchhuah tir tur a ni. Khawlaia intihbuai leh au thler duai duai te, midangte tana bengchheng khawpa music play te, bawlhhlawh a hmun lova paih te, ran kan khuah khirh danah te leh zuk leh hmuam kan thlahdah dan han hmuh hian Zonun ze mawi dinthar leh a tul hle a, midang te tana malsawmna kan nih theih nan kan nitin nun hi kan her rem a hun takzet a ni.

2 comments:

htta said...

Zonun ze mawi hi kan dinthar leh a tul tawh hle. Thalaite hian kan hlamchhiah deh niin a lang, aia upa kan zah danah te, miharsa kan en danah te leh chhiatni thatni bakah thil tam tak sai tur a awm.

A_es said...

Zonun ze mawi hi tamtak din thar leh trul a awm - aia upate zah chungchangah poh hian zir ngai kan ngah ta hle. Pi pute tih dan chhawm zel theihloh tam tak kha chu a awm, entirnan - kuma upa zawkin a aia naupang zok poh a 'PU' alo ngai ta a, amahrohchu tam tak tih chhunxom tur kan ngah hi kan inzirtir hle angai tak2.