28th August 2008 zing dar 7:00 khan Chanmarians ten kan nghahhleh em em, Chanmari Branch YMA GOLDEN JUBILEE lawmna chu Pu Lalhrangluaia Sailo (Ex-President, CBYMA) chuan Chanmari kawnah a hawng ta. He hun hman a nih hma hian Section hrang hrang atangin Section huam chhunga member-ten kawngzawhin Chanmari kawn hi an pan a, jubilee flag kengin memberte hian kawng an rawn zawh a ni. Jubilee lawmna hawn a nih hnu hian Branch YMA hruaituten Jubilee DAR an vua a, member pungkhawmte hnenah Jubilee Sweet sem a ni bawk.
Zan dar 8:00-ah YMA Hall-ah Variety Programme hlimawm tak leh changkang tak hman a ni. He hunah hian Pu Vanneihtluanga (Member, Org Com) chuan kalkhawmte hnenah thuchah a sawi a. Pu Vanlalchhawna (Ex-VCP) chuan Vengchhung Telephone Directory a tlangzarh bawk. He hunah hian Belinda, Mami Varte, C.Sanga, Marina te bakah Jubilee Band ten mipui pungkhawmte hi zaiin an awi. VCP pawhin a hla thul khung a rawn veto chhuak bawk!!
Variety Programme hman zawh a nih hian Hall tualah Jubilee Meidet hun hman a ni leh a, Pu T.Lalhluna (Ex-President, CBYMA) chuan Jubilee mei hi a dep kai. Hetih rual chiah hian Jubilee meidet chhawn turin Mini Sports Complex atangin halmawi/halpuah (fireworks) mawi tak tak hal a ni a, Aizawl khawpui a thum dup dup a ni ber mai.
Jubilee Programme hi hman chhoh a ni zel dawn a, Dt 30th August 2008 11:30 am ah hian Jubilee Exhibition hawn a ni ang.
No comments:
Post a Comment