Krismas a lo hnai leh ta hle mai. Krismas hun laia Mizote lunglenna ber chu Krismas hla saa zai khawm/carol hi a ni. Chung hla zingah chuan Upa Rokunga (L) hlate hi an lar hlawm hle. Amaherawhchu Pu Rokunga hlate tluk hiala Mizote thinlunga Krismas hla riak reng thin chu heng kan veng rohlu pahnihte (Pu Thandanga leh Pu Charlie Lalkhawliana) te hla hi an ni.
Pu Thandanga hla phuah leh thluk siam , "Khawvel thim en tura chu" tih leh Pu Charlie Lalkhawliana hla "Kumsul liam hnu kan nun ngaihlai tho leh thin" te chu Mizo zingah chuan a hrelo fa an awm lovang e, tih khawpin an lar a. Heng hla pahnihte phei hi chu Kristian Hlabu-ah pawh telh an ni nghe nghe. Tin, Pu Lalkhawliana hla "Kan nghah Krismas lawmna ni kawl a eng tan ta" pawh tunlai Krismas hla lar ber zinga mi a ni. Chanmarians te phei chuan kan thiam deuh vek a nih hi.
Heng kan veng pa hlu tak takte zarah hian Mizoten Krismas hla duhawm tak kan neih theih avang hian anmahni hi kan chhuang a, kan ngaisang hle. An thiante viz. Pu F.Sapbawiha, Pu Hranthanga etc te awm tawh lo mah se, hlim leh hrisel taka Krismas an hman kan duhsak e.
No comments:
Post a Comment