Men on Mag

Heng ho thlalak hi lo thlir ve chhin teh. Zero to Hero an tih hi an ni mai thei lo maw?

Another Pics

Assam Rifles sahdah nuai leh Mutia Committee hi scene hmuh tur tam lo tak an ni.

Global Warming

Tunlai hian Global warming a nasa ta hle mai. Kan Biakin pawh hi he Global warming hian a effect ta em ni? A chhunga inkhawmte hi an nguaiin mutthluk a awl ta hle mai.

YMA Duty

Tun laiin veng chhungah veng dang thalai/tleirawl thenkhatin buaina an siam zeuh zeuh thin tih thawm a awm avangin tunlai hian Branch YMA hruaitute chu zanah vengchhungah an duty thin. Duty a nih hnu erawh chuan hetianga buaina siam thawm hriat tur a awm rihlo thung.

Chanmari Pastor Bial KTP Conference

23rd - 25th January, 2009 hian Chanmari Pastor Bial KTP chuan Chanmari Kohhran Biak Inah Chanmari Pastor Bial KTP Conference Vawi 34-na chu an hmang a. Thupui "Lal Isua a lokal leh dawn (Thup 22:12)" chu Rev Dr.Vanlalnghaka, Shillong chuan a sawi.

Conference-ah hian 2009-2010 hruaitu tur an thlang a, Chu'ngte chu -

Leader - Upa Peter Zohmingthanga (Chanmari)
A/Leader - Pu Zionparlawma (Chanmari)
Secretary - Pu Zothangzuala Chhangte (Chanmari W)
A/Secretary - Pu Lalremruata (Chanmari W)
Treasurer - Upa JH Vanlalhuma (Edenthar)
Fin Secretary- T/Upa Lalsangzuala Hauhnar (Chanmari W) te an ni.

Nakum Conference chu 29th - 31st January, 2010-ah hman a ni ang a, a hmun chu Edenthar Kohhran Biak In a ni ang. Conference Thupui atan "Nun Fimkhur" thlan a ni a, Rev C.Laltanliana chu Speaker a ni ang.

Faina

Tunlai hi taksa vawn uluk hun lai tak a ni. Khua a ro va, vun hi a khawlo hma em em! Thingtlang naupangte phei chu an nu leh paten an enkawl uluk loh chuan an chat khir thei em em thin. Kan Zosap Missionary rawn kal hmasate phei kha chuan "Mizote chu khawvelah hnam bal ber an ni ang"min ti hial a nih kha. Chuvang chuan an thiltihna reng rengah lawmmawn an siam a nih chuan lawmman atan Sahbawn tlang khat an sem thin an ti.

Obama In, Bush Out

44th President of the United States of America atan Barack Hussain Obama lakluh a ni chu khawvel titi ber a ni. President hlui George W Bush chhuak tur chu US President te chuanna tur Helicopter (Executive One) chuan a phur haw nal nal a. Bungalow thil hum haw a neih hriat a ni lo. Obama nupui Michelle Obama inchei dan tur hisap lawkna chuan Fashion World-a chengte a khawih buai nghal viau.

Inauguration neihna hmun, National Mall-ah khan Portable Toilets (Toilet Van) 5000 zet an dah a, Free tickets 24000 zet siam a ni bawk. Swearing hmunah khan sipai 32,000 standby-in an ding thap.

Kumthar Thuchah by P/P Lalngaihawma

Kumhlui kan hman ral takah khan mi tamtakten chatuan ram min pansan a, keini erawh chu a khawngaihna avangin kumthar min hruai thleng a. Chu chu kan fel leh that bik vang a ni lo. Lalpa zahngaihna vang liau liau ani. Chuvangin he kumthar min hruai thlengtu Pathian theihnghilh lohva, a duhzawng tih nana hman hi kan tihmakmawh a ni.

A dawtlehah chuan chu Kanaan ram chu ramsa hlauhawm pui pui leh mi kawlhsen tak takte awmna hmun a ni a. Pathian chakna rinchhanlo chuan an ding zo dawn lo a ni. Keini pawh he kumthar hian engnge min rawn thlen dawn kan hre hauh lo. Kan hmaah hian harsatna nasa takin min hmuak pawh a ni thei e. Pathian chakna rinchhanlo chuan kan ding zo lovang. Chuvangin Pathian kan belh tlat a tul takzet a ni. Amah rinchhan tlatin he kumthar hi i hmachhawn mawlh teh ang u.

A tawpberah chuan Mosia chuan chu ramtiamah chuan Pathian mit chu Israel-te chunga a fuk reng tur thu a sawi a. He kumtharah pawh hian Pathian engkimtithei, engkimhria, khawikipa awm, chuan min thlir reng dawn a. A thu lovin engmah a thleng lovang tih hi ring ila. Amite chu buaina leh harsatna karah pawh vengin a awmpui zel dawn ani. Chuvang tak chuan a duhzawnga nung a, Amah kan hriat reng a tul takmeuh a ni.

Tan lak thar hun a ni e…
Grace Noll Crowell-i chuan, "Lalpa he kumtharah hian ka kiangah kal la, I kutin min chelh reng ang che" a lo ti a. Chutiang bawkin hnam fing zawkte chuan kumthar Pathian duhzawnga an hman theih nan kumthar thutiam (New year’s Resolution) an lo siam thin. A tha thei ang bera Pathian duhzawnga hmang turin an intiam thin. Pathian thuhriltu ropui Jonathan Edwards-a (1703-1758) pawh khan rawlthar anih laiin, "He kumtharah hian Pathian thu ang zelin ka nung ang a, a theih anga hmasawn ka tum ang a, inchhirna tur engmah ka ti lovang a, phuba ka la ngai hek lovang a, thil thalo engmah ka ti lovang" tiin Pathian hnenah alo intiam thin. Keini pawh he kumthar hian engnge arawn herchhuah pui dawn kan hre lo. Chuvangin Pathian hnenah inhlan thar ila,nasa lehzualin a hman atan i inpe ang u.

Ka pi

Hmanlaia Zirtirh Bu-a Ziak leh chhiar zirna -

Inah ka pi a awm,

Hei hi ka pu a ni,

Fu ka pe, zu chu ka pe lo.

Kan lo kawng a chho lo, a bumboh deuh,

Meiin a kan a vangin a fai.

Koro elo, nilo, Zotuklo a ni, a puiin "Mingo, Mingo" a ti.

Young Hearts

"18 till I die" tih ang deuhvin tunlai mi hian upat hi kan lo tum hauh tawh. Hmanlai angin kuthnathawh hahthlak tak tak thawk lem lo kan tam tual tual a, khawpuia chengte phei chu kum tam deuh tawh tak pawh nise la tleirawl fe fe kan tam mai. Thenkhatte phei chu in la "young" thar lehin Beginner Dept naupangte chauh bulah an zai duh a, a ziak en chungin "Sirva te, i zai sa" te an ti thar leh hnuhnawh a nih chu!!!

Tlawng Lui

Mizorama lui lian leh sei ber chu Tlawng a ni a. He lui hi Mizoram tan a hlu hle. A lui tui hi Aizawl mipui nuai 3 dawnin in atan an ring a. Tin, he lui dunga chengte tan eizawnna pawimawh tak a tling.

Sahuan

2nd January 2009 khan Aizawl Zoological Park, Sakawrtuichhunah (PTC thlen hma chiah) ka zuk kal ve a, kan sahuanah chuan ramsa tlem azawng chu a awm ve nual a, Mahse mit la tak zawng hmuh tur a awm rih lo. A hmunhma a thain ransa tam tak dah theihna tur niin a lang.

A enkawltuten an enkawl dan a tha thawkhat hle. He hmunah hian chhungkuaa kal an thahnem hle.

NCC

He thlalak hi eng dang vak a ni lo. New Capital Complex-a Secretariat Building a ni a, tunah hian Minister tharte'n he hmunah hian office an luah tan ta.

Rev Zoramsanga

Zanin (11th January, 2009) dar 6:00 khan Vaivakawn Presbyterian Kohhran Biakinah Mizoram Presbyterian Synod chuan Missionary Pastor 11 te thlahna inkhawm a nei a. Hetah hian Chanmari veng atanga Presbyterian Pastor hmasa ber, Tv/Rev Zoramsanga (Asangtea) s/o Pu Lalkhumtira, Section I chu a tel ve. Rev Zoramsanga hi Karbi Anglong Mission Field-a Pastor Bial hawn thar, Dongkamukam-ah Pastor hna hi a chelh dawn a ni. 18th january, 2009 hian Induction Service neiin a hna hi a thawk tan ang.

Chanchintha Thlen ni (Missionary Day)

Vawiin, January 11, 2009 hi Chanchin Tha Thlen Ni a ni a. Pu Buanga leh Sap Upa ten Mizoram leilung an rawn rah ni hi hriat reng nan Mizoram Presbyterian Church Synod Inkhawmpui 1974 chuan January 11 chu kum tin Chanchin Tha thlen Ni-a hman a lo rel a, chuta tang chuan tun thlengin hman a la ni ta zel a. kumin hi a kum 115-na lai a lo ni ta a ni. Kum 1994 khan Chanchin Tha thlen kum 100-na (Gospel Centenary) chu ropui taka lawm a ni nghe nghe.

Welsh Missionary, Khasi rama thawk Rev. William Williams leh Khasi pakhat Aitken-a te chu kum 1891 khan Mizoram rawn enin an lo kal a, rei lote an cham hnuah ram boruak a la ven loh avangin an haw leh rih a. Rev. William Williams chuan Welsh Mission Board-ah rawtna a thlen angin Mission Board chuan Mizoram chu an Mission Field atan lungrual takin an pawm a, thawktu atan Rev. William Williams chu ruat nghal a ni a. He thu hi Welsh Kohhran General Assembly-ah thlen leh a ni a, General Assembly pawhin Mission Board rawtna chu a pawmpui a. Amaherawhchu, hetih lai hian Mizorama Missionary tura an beisei Rev. William Williams chuan chatuan ram a lo pan tawh a ni. Mizorama kal tur Missionary an zawn laiin, chutiang thu engmah hre lovin London mi hausa Robert Arthington-a chuan Mizorama thawk turin Missionary pahnih Rev. J.H. Lorrain (Pu Buanga) leh Rev. F.W. Savidge (Sap Upa) te chu a rawn tir a, January 11, 1894-ah Sairang an lo lut a ni.

Kuminah hian Presbyterian Synod chuan Chawhnu & Zan Inkhawm programme an siam a, thupui atan "Pain mi tir angin ka tirh che u hi " leh "Thiltihtheihna neia rawngbawl" hman a ni.

Hello Chanmarians (Happy New Year)

Chanmarians Blogger zawng zawng Kumthar Chibai Ule. Helama a buaipuitupa hi a chhangchhe deuhva, Blog hi update a harsa deuh a ni, min lo hrethiam teh u.

Kan veng chhungah tunlai hian thil ropui tak a awm lem lo. Hmanni lok (9th Jan) khan Vanlalrinchhani d.o Upa Rolungmuana Sec IV chuan Bawngkawn lamah pasal a nei a. 16th Jan hian Lalrindika (Osco-a) chuan nupui a nei dawn bawk. Osco hian a nupui tur hi "A ehch ol kutul" a ti. Chu chu a ni deuh mai. A reng reng thu-ah... ka'n ti teh ang... Phai lam atangin blog in visit a, C-Box tal hi chu han thai trial koi ve mai mai teh u. Attendance Register atan te pawh a tha ve a, helama a buaipuitute pawh min encourage ve alom mawle.

Engpawh nise, kum tharah hian hlawhtlinna sang tak kan duhsak a che u.