KAN THEN TAK

Pu Dengruma (73), Sec-III, Presbyterian Kohhran hi Pu Laibata (L) leh Pi Chawnglali te fa 8 (M-6;H-2) zinga a upa ber niin, May 22, 1939 khan Thingdawlah a lo piang a. Kum 1971-ah Pi Lalringliani d/o Aisanga (L) nen inneiin fa 8 (M-6;H-2), tu 24 leh tuchhuan 1 an nei.
    Kum 1969-ah PWD-ah driver-in a lut a. Kum 1969-ah Chanmariah an cheng tan a. Kum 1989-ah 1st Class Contractor-ah a inhlangkai a ni. Amah hi mi zaidam em em  leh ngawichawi tak, mi pawisawi hlau tak mi a ni a.
    Kum 1996 khan Zunthlum a nei tih hriat chhuah a ni a. Kum 2010 Bethesda Hospital leh  Aizawl Civil Hospital-ah awmin Zunthlum hnathawh vanga Kal thalo tih hriat a ni. Zunthlum vangin August 2011 khan Aizawl Civil Hospital-ah a mit (eye) zai a ni a. August ni 4 - 31, 2012-ah Vaivenga Hospital-ah Kal thalo vanga awm lehin, dialysis tih a ni a. In lama enkawl chhunzawm a nih hnuah December 24, Thawhtanni zing dar 6:30 khan chatuan ram min lo pansan ta a ni. Hemi ni hian vui nghal a ni.

KAN THEN TAK

Pi Darliani (83), Sec-III, Presbyterian Kohhran hi Pu Muala leh Pi Chaldaizovi te fa 5 (M-2;H-3) zinga a mi lai niin February 1930-ah a piang a. Amah hi   Thenrual kawm thiam tak leh kohhran bel tlat mi a ni.
    Kum 1948-ah Upa K. Chaldailova (L) nen inneii, kum 1972-ah Chanmari vengah an khawsa Tan a. Fa 6 (M-3;H-3), tu 10 leh tuchhuan 2 a nei a; December 21, 2002 khan a pasalin a lo boralsan tawh a ni.
    BP sang natna a nei Thin a. Kumin May thla aTang khan stroke nei Tanin ke-in a kal thei ta meuh lova. December 20, 2012 zanah a thawk a buai avangin Newlife Hospital-ah dah luh a ni a. A tuk December 21, 2012, Zirtawpni zing dar 8:30 ah chatuan ram min lo pansan ta a ni. Hemi ni hian YMA Hall-ah vui nghal a ni.

KAN THEN TAK

Tv. Lalchhanchhuaha (24), Sec-I, Presbyterian Kohhran hi Pu Vanlalawia leh Pi Lalduhawmi te fa 5 (M-2;H-3) zinga a naupang ber dawttu niin January 24, 1988-ah Synod Hospital, Durtlangah a piang a.         Amah hi unaute ngaihsak mi leh thenrual pawl thiam tak a ni a, khawhar ina kal a taima hle bawk.
    Kumin August thla khan Greenwood Hospital-ah thla khat vel a awm a. October 27 khan internal bleeding vangin Greenwood Hospital-ah dah luh leh a ni a. Hemi hnu November 14-ah Greenwood Hospital-ah bawk dah luh leh a ni a. A chauh zual avangin December 17, 2012, Thawh\anni zingah ICU-ah dah luh niin, hemi zan dar 6 hian chatuan ram min lo pansan ta a ni. A ruang hi tlaivar pui a ni.

Mizoram Combined Competitive Exam, 2012 a Chanmari veng atanga tlingte

1. PC Lalnuntluangi d/o PC Liansanga (L), Sec-III - MCS 3-na

2. Remlalliana Hnamte s/o Lalvena Hnamte, Sec-I - MPS 8-na

3. JH Lalparmawii d/o JH Hmangaihthanga, Sec-II - MIS 1-na

Zorinsangi (thla 3), Sec-I, Presbyterian Kohhran hi Pu Laljosia leh Pi Vanlalhriati te fa 3 (M-1;H-2) zinga a naupang ber niin August 21, 2012 khan Synod Hospital, Durtlangah a lo piang a, nau hrisel tak a ni.
    November 28, 2012 zanah thawhah a rawn nei thut a. A pa Pu Laljosia hnathawhna Mualvum atangin November 29, 2012, Ningani zingah Synod Hospital, Durtlangah kalpui a ni a. Oxygen te pek a nih hnuah hemi ni chhun dar 12:15 khan Asthma vangin chatuan ram min lo pansan ta a ni. Hemi ni hian vui nghal a ni.

Pi Hauchhungi (kum 72), Sec-IV, Presbyterian Kohhran hi Pu Lalbuana (L) leh Pi Tlangkungi te fa 9 (M-4;H-5) zinga a 5-na niin January 1, 1941 khan Hnahlanah a lo piang a. Pu C. Vanthanga nen inneiin fanu 1 an nei a ni.
    Amah hi mi inngaitlawm, zakzum leh taima tak a ni a. A tu leh fate tana mi inpezo tak a ni.
    Kum 2011 khan hnute cancer a nei tih hriat chhuah a ni a. Hemi kum hian TATA Cancer Hospital, Mumbai-ah zai a ni a. Kumin May thlaa an in check-up thlengin amah hi a tha a. Hemi hnu hian thazam na leh BP sang vangin Delhi leh Aizawl damdawi inah te enkawl a ni leh a. Kumin September thla khan a thluakah cancer a lo  kai tih hriat chhuah a ni a, hemi thla hian Grace Nursing Home-ah enkawl a ni. Hemi hnu hian in lamah enkawl chhunzawm niin November 29, 2012 chawhma dar 10:40 khan chatuan ram min lo pansan ta a ni. A ruang hi tlaivarpui a ni

Zohmingliani (Pic on 15 August, 2012)

PI ZOHMINGLIANI

    Pi Zohmingliani (62) hi Pu Sawiluaia (L) leh Pi Zukmani te fa sawmpahnih (12)  zinga upa ber dawttu niin April 25, 1950 khan Police Lane, Aizawlah a lo piang a. January 27, 1963 khan Pastor Chhawnvunga’n Champhai-ah a Baptist-a. An unau upat dan indawt chu hetiang hi a ni :
1.    Thangrikhuma (thla 7 in a boral)
2.    Zohmingliani w/o V. Sangpuia, Chanmari
3.    Tlangthansiama h/o Chhuanmawii, Mission Vengthlang
4.    Lianmawii w/o H. Lalhmuaka (L), Ramhlun Venglai
5.    Zothanpuii (Laii) w/o Zabiaka, Chanmari
6.    Zokhumi Colney w/o Lalrinthanga, Chanmari
7.    Nuzawni Ralte, Chanmari
8.    R. Vanlalruata h/o Chawngzikpuii, Zemabawk North
9.    Lalrindiki, Chaltlang
10. R. Lalhmingmawii w/o Lalchhanhima, Chanmari
11. Lalbiakfeli w/o Lalremruata, Chaltlang
12. David Lalmuankima (Valtea) h/o Zoremtluangi, Chanmari

    Kum 2004 August 17 khan a pa Pu Sawiluaia hian a lo boralsan tawh a ni.
 

Zirna leh hna : Lehkha hi a thiam thei hle a. Kum 1973 khan Republic High School atangin Matric a pass-a. Chhungkaw harsatna vanga hna thawh a ngaih vang leh, unau zinga a upa ber a lo nih bawk si avangin lehkha hi a zir chhunzawm thei ta lova. May 1, 1974 khan District Education Office, Aizawl District-ah LDC in a lut a. May 12, 1983-ah UDC-ah a kaisang a. UDC a nih chhung hian DEO, Aizawl East-ah a awm. Kum 2000-ah SDEO, Aizawl North-ah a awm leh a. May 6, 2004-ah Assistant-ah kaisangin Mizoram Home Guard Headquarters, Luangmualah transfer a ni. Heta a awmnaah hian Establishment a khawih a, a thih ni thlengin he hna hi a thawk a ni.
 

Chhungkua :  Zohmingi hian fapa pakhat leh fanu pathum a nei a, chungte chu :
    1. Hmangaihzuali w/o Malsawmkima, Ramthar
    2. Alex Zoliana h/o R. Zoengmawii, Zemabawk North
    3. Lalsangliani w/o Lalsangzela, Venghlui
    4. Lalthlamuani, Chanmari
    Heng bakah hian tu - mipa 3 leh hmeichhia 3 a nei bawk a ni.
  
    Pu V. Sangpuia s/o Darngaia (L), Lunglei, Bazar Veng nen inneiin an pahnih hi chuan fa an nei lova, a fate zinga a naupang ber Lalthlamuani erawh a naupan tet atanga an hnena awma seilian a ni a, tun thleng hian an la khawsa ho a ni.

    Chanmari vengah kum engngemaw zat an awm hnuah kum 2009 khan Zotlang, Aizawlah an insawn a. Chumi hnuah 2011 January thla khan tuna an awmnaah hian an awm leh a ni.

A mizia : A nu leh pate hian kum 1963-ah Chanmariah an pem luh pui a. A nulat lai chuan nula hmeltha, zahpuiawmlo leh khawtlang leh kohhrana a kul a taia inhmang thin a ni. Amah hi nu hlim thei tak, inthlahrung leh, a bula awm nuam tak leh taima em em, hna thawk reng mai a ni a. Midang tan a neih ang angte pek phal loh nei lovin a thilphal em em reng a. Inchhungkhur ngaihtuah em em leh fate hmangaih thiam tak a ni a, an nupa hian an ingainain khawi lo kalnaah pawh an inzui reng a ni.
    

Chanmari Baptist Kohhran member a ni a. Mi inthlahrung leh inkiltawih tak a nih avang hian rawngbawlna langsarah a inhmang ngai lova. Lehkha chhiar a peihin Bible leh Pathian thu chhiar a taima hle a. A hrisel loh avang hian tawngtai a ngai pawimawh a, Pathian thu a ngaihven em em thin bawk.

A nat dan : Kum 2006 khan thin (liver) tha lo vangin Kothari Hospital, Kolkata-ah enkawl a ni a. Vawi engngemaw zat a in check up hnuah a natna hi a damfel a. Dammawh hritlan leh insawiselna chu nei ve bawk thin mah se buaipui ngai em em a nat zui erawh a nei ta lem lo. A hriselnate pawh thain a hmelte pawh hmuh a nuam hle a. A unaute leh inpuia a nu tlawhin a lengkual zauh zauh thin bawk.
    

Nerve na avangin a insawisel thin a. November 12, 2012 khan inentirin X-Ray leh Endoscope-te tih a ni a. In lamah inenkawlin November 16, 2012 (Zirtawpni) thleng khan Office pawh a la kal a ni.  November 19, 2012 (Thawhtanni) zan khan a thaw a rawn hah thut mai a. Unau leh chhung leh khatte pawh hrilh chuang lovin in lamah an inenkawl a. A tuk November 20, 2012 (Thawhlehni) zingah a natna chu a zual zel avangin Newlife Hospital, Emergency Ward-ah admit a ni a. Oxygen-te pek nghal niin a natna hriat chhuah tuma enkawl a ni a. A thawhah chu a reh mai loh bakah a BP a hniam hle a. Hemi ni chawhnu lamah hian ICU-ah dah luh a ni a. ICU-a a awm hnu hi chuan biak theih lova awmin Ventilator vuah a ni a. A natna hi lungna ni a hriat a ni. Tichuan hemi zan dar 6:35 hian chatuan ram min lo pansan ta a ni.

 A ruang hi tlaivarpui niin a tuk, November 21, 2012, Nilaini chhun dar 12-ah Chanmari YMA Hall-ah vui a ni a. A vuinaah hian mi an thahnem hle a, hall chhung, hall kawt leh kawngpui thlengin vuitu an khat tlat a ni.

CHANMARI GAMES 2012

Chanmari Games 2012 hi November 3, Inrinni chhah High Field-ah tan a ni a, November 16, Zitawpni zanah Govt High School Hall ah indoor item neih niin, November17, Inrinniah High Field ah zawh a ni. Games ah hian Item eng emaw zat neih a nih bakah YMA Chhang Item neih a ni bawk.
Result : 1st - Section II;. 2nd - Sec- IV; 3rd - Sec-I; 4th - Sec-III. Result kimchang chu Chanmarians chanchinbu Issue No 47. Nov 18, 2012 phek 3-na ah tarlan a ni e.

KAN THEN TAK PI SAWIKUNGI

 

Pi Sawikungi (84), Sec-I, Presbyterian Kohhran hi Pu Thangdaia leh Pi Kapzeli te fa 8 zinga a upa ber atanga 3-na niin kum 1928 khan Rullamah a lo piang a. Kum 1962-ah Pu Parova nen inneiin fanu pakhat an nei a ni. Amah hi mi thil phal leh taima tak niin kohhran bel tlat mi a ni a, a dam phawt chuan inkhawm a thulh ngai lo a ni.
    Kum 2004, October thla atangin thisen sang a nei tih hriatchhuah a ni a. Kumin September 15 khan a natna hi zualin in lamah enkawl a ni a. Enkawl a nih lai hian chau telh tehlin chaw pawh a ei thei lova. November 6 zanah chau zual lehin a tuk November 7, Nilaini zing dar 7 khan chatuan ram min lo pansan ta a ni. Hemi ni hian vui nghal a ni.

Tv.  LALREMRUATA CHANCHIN

(1980 - 2012)

    Lalremruata (Mapuia), Section III hi Pu Lalnithanga leh Pi Lalrinthangi te fapa upa ber niin ni 7th July, 1980 khan Civil Hospital-ah a lo piang a, a unaute chu an upat dân indawtin hengte hi an ni :
    1. Tv. Lalremruata
    2. Pu Lalremtluanga h/o Melody Lalnunthari
    3. Tv. Lalremdika
    Kum 1984-ah R.B. School-ah lut tanin Nursery atanga Cl - VI thleng a kal a, 1985 atang khân Dawrpui Vengthar Middle School-ah Cl - VII zir lehin Cl - VIII chu Govt. High School-ah a kal leh a. Amaherawhchu, zirna lamah a tluan loh avangin  Cl - VIII bak hi chu zirna lam hi a chhunzawm ta lo a ni.
    Rawngbâwlna lamah a theih ang tâwka pên chhuak vein kum 1995 khan Gospel Reapers Team a zui a, chumi hnuah veng chhungah a theih ang tawkin a inhmang zui bawk a ni.
Hnathawhna lam : Hnathawh mumal nei lova tlangvala pumpa han awm reng mai chu hrehawm a ti hle thin a. Kum 2007 atang khan Bawngkawnah Motor Workshop a hawng ve a, amah pawh he a hna lamah hian a tui em em a, a theih ang tawka rim taka a thawh avangin a hlawhtling viau nghe nghe a ni.
A damloh dân : October 2012 thla tir atangin hritlang khawsikin a tlâkbuak a, ding chung na angin a tirah chuan ngaih a ni a. Mahsela, insawisêlna a neih zui zêl avângin ni 8th October, 2012-ah Doctor hnênah a inentir a. Heti chung hian taksa lamah na êm êm sawi bik tur a neih lem loh avangin a workshop-ah a kal chhunzawm a. Amaherawhchu, a taksa te a chauh zui tak deuh avângin workshop lam chu chawlhsanin hreh deuh mahsela a chhungte nawrna avângin Dr. Rosangluaia hnênah a inentir leh a, damdawi a lo chawh te chu eiin tha chho leh mai tura ngaih a nih laiin beisei angin hma a sawn chak thei lo a, chuvangin ni
22th October, 2012-ah New Life Hospital-ah dah luh a ni. Hemi ni hian FFP (thisen vâr) unit 4 pêk nghal a ni. Ni 25th October, 2012 ah thisen pangngai unit 2 pêk leh niin ni 31st October, 2012 ah thisen unit 4 dang pêk leh a ni. Tlêm tlêma bleeding awm chu ni 31st October, 2012 ah khân a lo nasat deuh tawh avangin ni 1st November, 2012 ah FFP unit 4 leh thisen pangngai unit 4 pêk chhunzawm leh a ni.
    A hun tawp dâwn lamah hian nasa taka Pathiana innghatin amah pawh a lâwm êm êm a, a natnain thlah lo mah se Pathian hnênah lawmthu sawiin a tawngtai mawlh mawlh reng a, “Haleluia, min lo nghak r’u, ka lo kal têp e,” tiin a au chhuak thin a. Natna khuma a mut reng lai chuan hun rei tak tak chhung inchung lam a melh reng thin a, amah ekawltu Nurse-in, “Mapui, engatinge chung lam i melh reng a, hmuhnawm a awm em ni?” a tih chuan, “Aw, phengphehlep mawi tak tak awm te khi i hmu ve thei lo em ni, min hruai turin an rawn kal a nih khi, ka kal tep tawh a ni,” tiin a lo chhang a ni.
    Ni 1st  November, 2012 atangin a natna hian zual lam a pan avângin biak theih lohin a awm ta a, oxygen leh ventilator te nêna tangkawpin enkawl chhunzawm a ni a, a that chhuah leh theihna tûrin Doctor te leh Nurse ten theihtawp an chhuah chungin tukin zing (2th November, 2012) dar 4:15 khan chatuan ram panin min lo chawlhsan ta a ni.
   

CHANMARI BRANCH IN YMA CONFERENCE-AH DRAMA CHANG

YMA General Conference vawi 67-na October  23-25 chhunga Kawrtethawvenga neih ah Chanmari Branch YMA YMA atangin member 22 an kal a, drama ropui tak an entir bawk.

Conference a kalte hi Pu Tlangtinthanga (Secretary Pu Vanlalruata puzawn) inah an thleng a. Nulate thlen inah riakin, mipate chu primary school-ah an riak thung.

'Zo United' tih drama, Pu David Lalmuankima, Editor, Chanmarians ziah chu conference tawp zanah mipui 5000 chuang hmaah hnehsawh takin an chang a, entuten hmuhnawm an tiin mipui au ri a nasa hle. Conference-a kalte hi October 26, Zirtaw3pni khan an lo haw leh a ni.

MAY HER SOUL REST IN PEACE

Malsawmsangi Khiangte (25), Sec-I, Presbyterian Kohhran hi Pu K. Lalvuana leh K.P.Thangi te fa 6 zinga a naupang ber dawttu niin August 19, 1987 khan Civil Hospital, Aizawlah a piang a. An unau chu hengte hi an ni:
1.    Ramthanngura (kum 15 mi niin 13th August, 1992 ah a thi)
2.    Lalhmingtani w/o Vanlalneiha Ralte, Chanmari
3.    Lalruatpuii w/o Lalremruata Kullai, Ramthar Veng
4.    Lalzikpuii (London-a M.Sc. Nursing zir mek)
5.    Malsawmsangi Khiangte
6.    Lalchhantluanga (Bangalore-a B.A. 3rd year zirlai)
Zirna :
    Centenary School, Dawrpui ah Class II - Class VII a zir a, St. Paul’s Higher Secondary School-ah High School kalin, 2004-ah HSLC (Matric) a pass a. St. Edmunds’ College, Shillong-ah Class XI & XII (Commerce) zir zo lehin Hrangbana College-ah B.Com a zir zawm leh a. Hemi hnu hian Mizoram University-ah M.Com zir lehin kumin 2012 August thla khanr esult chhuakin First Division-ah a pass a ni.
Hnathawh :
    M.Com a pass hnuah a school kalna thin Centenary School, Dawrpuiah zirtirtu hna a hmu a. Heta a thawh lai hian Social Welfare Department hnuaia Mizoram Social Defence and Rehabilitation Board hnuaiah interview a nei a. School-a a thawh hun a tawp dawn tepah he hna atana lak a nih thu a hre hman a. October 19, 2012 (Zirtawpni)-a a ruangin an in a thlen hma lawk hian Accountant-cum-Computer Operator hna atana appointment order lehkhain an in a thleng a, a hna hmuh thar chu a zawm hman ta lo a ni.
Kohhran leh Khawtlangah :
    Malsawmsangi hi Chanmari Presbyterian Kohhran leh khawtlang tana a theih ang tawka inpe leh mi tangkai tak a ni a. 2012 Chanmari Presbyterian Kohhran Naupang Sunday School-a Primary Department-ah Zirtirtu a ni a, Chanmari Branch KTP, 2012 -a Amosa Group-ah Treasurer a ni mek bawk. KTP member active tak niin Kohhran Zaipawl member hlun a ni bawk.
    2011 Chanmari Branch YMA-a Sports Sub-Committee Member leh, Section I Committee a lo ni tawh bawk. Vengchhungah chhiat tawk leh mitthi lumen ngai an awmin a dam phawt chuan a tel loh tum a awm mang lo va, khawhar lenpui a taima hle.
A Mizia :
    Thian kawm thiam leh kawm nuam tak, fiamthu duh tak a ni a. Thianzaho zinga hotu ena en nghal theih, leadership quality nei tha tak a ni. Nula zaidam tak leh mi huatthu leh chanchin tha lo sawi duh ngai lo, mi rel ngai lo a ni a, a mawhphurhna hrang hrang tha taka hlen tlat zel tum mi a ni. A thiante zinga harsatna neite a theih ang tawkin a fuih thin a, “Pathian chinfel theihloh khawpa harsatna nasa a awm lo” tiin. Naupang a ngainain a lawm em em a, Centenary School, Dawrpui-a naupang zinga a han thawk hian a nun a tihlim em em a, a thawh hun a tawp dawn pawhin a ui em em a ni.
Thlarau lam nun : Kohhran leh chhungkuaa Pathian thua zirtirna a dawn te avangin Pathian tih mi tak a ni a. Kum 2009-a Chanmari Kohhran Camping atangin siamtharna a chang a. A theihtawpa Pathian rawng bawl chung zelin September, 2012-a Kohhran Camping-ah Thlaraua harhtharna chang lehin lamtual chenin hlim takin a lam thin a. Ocrober 18, 2012, Ningani tuka nikhua a hriat loh hlim hian, “Haleluiah Amen” tiin a au a, “Vanram kan thlen hun chuanin...” tih hla a thluka a sak chu a rawl chhuah hnuhnung ber a ni ta a ni.
A nat dan :
    October 14, 2012 Pathianni zan inkhawm laiin a chau deuh va, damdawiinah kalpui a ni a. A tukah erawh chuan school pawh kal lehin zanah pawh a inkhawm hram a. Nilaini kha school-a a thawh tawp ni a nih avangin nuamsam vak lo chungin a kal hram a, zanah erawh chuan khawsik avangin a muhil thei ta lo va. October 18, 2012, Ningani tukthuan eikham atangin a khawsik a  tlun a, nikhua a hre lo zui a. Newlife Hospital-ah kalpui niin ICU-ah an lo admit a, a dinhmun a hniam em avangin khawl hmanga thawktir hial a ngai zui a. October 19, 2012, Zirtawpni chhun 12:15 khan chatuan ram a lo pan ta a ni. Doctor-te sawi danin a natna hi Leptospirosis (natna hrikin a thlen khawsik chi khat) a ni.
    A ruang hi tlaivar pui niin atuk October 20, 2012, Inrinniah Bialtu Pastor Rev. K. Lalhmingliana’n a vui a. Lumen zana tlaivar leh a vuinaa mipui kal hi an thahnem hle a, hetiang taka lumenna leh mitthi vuinaa mi an kal that hi Chanmari-ah hian a khat hle ang. Mitinin amah hi an ui takzet a ni.

KAN THEN TAK

Pu Lalrinkima (37), Sec-I, Presbyterian Kohhran hi Pu R.C.Kunga (L) leh Pi Rohmingthangi te fa 5 (M-2; H-3) zinga a upa ber dawttu niin, August 17, 1975 khan Chanmari-ah a lo piang a. Lallawmzuali nen innein fa 3 (M-2; H-1) an nei.
    Amah hi mi hlim thei tak leh lehkha thiam thei tak a ni a. Kum 1992-ah matric pass-in, 1995-ah Hrangbana College-ah PU a pass a. Kum 1999-ah RIPANS-ah Health Worker training zovin 2-na a ni. Hemi kum hian Tuidamah post a ni a, chumi hnuah Bualpui-ah leh Kawlkulhah a awm leh a, 2006-ah Aizawlah a insawn leh a ni.
    Kumin September thla atang khan natnain tlakbuakin in lamah enkawl a ni a. October 7, Pathianni zinga a irhfiak chu a reh mai theih loh avangin doctor te rawna enkawl a nih mek laiin hemi ni chhun dar 1 hian chatuan ram min lo pansan ta a ni. A ruang hi tlaivar pui a ni.

KAN THEN TAK

Lalrinkimi (Kimkimi) hi Pu Lalthlamuana leh Pi Zadingpuii te fa panga zinga a naupang ber niin September ni 21, 2004 khan Aizawl Civil Hospital-ah a piang a. An unau upat dan indawt chu hetiang hi a ni :
    1.     Lalhmuchhuaki
    2.     Lalremruata (L) [Sen laia thi]
    3.     Lalpekmawia
    4.     Lalhmangaihzuali
    5.     Lalrinkimi
    Lalrinkimi leh Lalhmangaihzuali te hi phir an ni.
    Lalrinkimi nu Pi Zadingpuii hi Pi Selzami Vahpa fanu a ni a. Pi Selzami hian kum 2 a nih atangin a enkawl a, pasal pawh a hnen atanga nei a ni. Kum 1999 khan Kimkimi nu leh pa te hi an innei a, vanduaithlak takin kum 2004 khan an inthen leh a. Hetia an inthen leh takah chuan Pi Zadingpuii te nufa za hi Pi Selzami hnenah Chanmari Vengah an rawn let leh a ni.
    Kum 2010-ah Highland Public School, Chaltlangah Kg I a zir Tan a. Kum 2011-ah Kg II zir lehin, natnain a tlakbuak tak avangin a zir tluan thei ta lo a ni. Chanmari Presbyterian Kohhran Sunday School-a Primary Department zirlai a ni.
    Kum 2011 July thlaah a ke dinglam ngalruh chhunglam a rawn puar a. Na a ti hran lo nain Doctor panpui a ni a. Hemi thla vek hian Newlife Hospital-ah zai a ni . Zai a nih rual hian biopsy lak nghal niin Tissue Cancer a ni tih hriatchhuah a ni a. Doctor-ten Mumbai-ah refer-in July 2011 khan Tata Memorial Hospital, Mumbai panpui nghal a ni. A natna chu a taksa hmun hrang hrangah a tai darh tawh tih hriat belh a ni a. Thla khat zet enkawl a nih hnuah lo haw pui leh a ni.
    Aizawla an lo haw hnu hian Nazareth Hospital, Chaltlangah Chemotherapy vawi 12 a la a. Hemi hnu hian a ke dinglam ngalruh pawn lam chu a rawn puar chhuak leh a. Hei hi July, 2012 khan Aizawl Civil Hospital-ah zai leh a ni a. That lam a pan theih mai loh avangin August 30, 2012 khan Nazareth Hospital-ah dahluh leh a ni. A lu scanning an tih hnuah a natna hian a lu (thluak) a lo kai tawh tih hmuhchhuah a ni a. A lu chu vawi 4 hem (Radiation) a ni a. Hetia a lu hem a nih hnu hi chuan rawn harh ve thin bawk mah se mumalin nikhua a hre meuh tawh lo a ni. A taksa a chau zui  zel a, a khat tawkin a kaih deuh reng bawk a, Oxygen te pek ngaiin a awm zui ta zel a. Nimin September ni 21 kha a kum 8 tlin champha (Birthday) a ni a, chau tawh tak ni mah se, an thenawmnu Pi Nu-i’n a puala Birthday Cake a lo order sak diam tawh te chu damdawiinah keng chho in chawhma lamah cake te pawh chu an zai a. A kum 8 tlin ni tak chawhnu dar 2:10 khan chatuan ram a lo pan ta a ni.
    Kimkimi hian a phak tawkin Pathian a hre em em a, tawngtai a ngaina a, a pi tan te, an chhungkaw tan te, thenawm khawveng tan te a tawngtai fo thin a ni a. A damloh hnu hian Pathian hnenah tawngtaiin damna a dil thin fo thin a ni.

KAN THEN TAK

Pi Lalramdinthari (42), Sec-IV, Presbyterian Kohhran hi Pu Malsawmthanga leh Pi Rinthangi te fa 6 (M-3; H-3) zinga a upa lam atanga chhiara 3-na niin, March 12, 1970 khan W. Phailengah a lo piang a. Kum 1989 khan Lallianmawia Sailo, Chanmari nen inneiin, fa 3 (M-1;H-2) an nei a ni.
    Nu leh pa thu awih tak leh thenrual pawl thiam tak a ni a, W. Phaileng Pastor Bial Zaipawl Member leh W. Phaileng Chhim Veng Branch KTP Committee Member a ni thin. Eizawnna lamah chuan thawmhnaw zuara sumdawng a ni.
    Kum 2011 July thlaah a pum lam in sawisel tanin December thlaah a chi bawm a cancer a ni tih hriatchhuah a ni a, hemi thla vek hian Civil Hospital-ah zai a ni. Hemi hnu hian a rilpui a cancer a ni tih hriatchhuah ni lehin February, 2012 khan Civil Hospital-ah zai a ni leh a. Chemotherapy leh radiation la tura tih ni mah se, vawi hnih lai zai a lo nih tawh avangin treatment la lovin in lamah enkawl zui a ni a. September 11, Thawhlehni zan dar 8:30 khan chatuan ram min lo pansan ta a ni. Pi Lalramdinthari hian a mit hi Civil Hospital-ah a donate a ni. A ruang hi tlaivar pui a ni.

KAN THEN TAK

Pi Zochhuanthangi (65), Sec-III, Presbyterian Kohhran hi Pu V.L. Buka (L) leh Pi Laichhingpuii (L) te fa 9 (M-5; H-4) zinga a 4-na niin August 11, 1947 khan Sihphirah a lo piang a. Zirna lamah chuan B.A. a zo. 1970-ah Pu P. Lianchhunga nen inneiin fa 5 (M-3; H-2) an nei a ni. Amah hi Pu Lalbiaktluanga (BT-a) leh Pu Lianzidinga (Angid-a) te nu a ni.
    1968-ah Store Keeper hna thawkin PWD-ah ADA hna a zawm leh a, September 2010 khan DA in a pension a ni. Sunday School Zirtirtu leh rawngbawlna dangah inhmang thinin kumin hian Chanmari Presbyterian Kohhranah Ramthar Committee Member, Nilai Zan thupui hawngtu leh Zing tawngtai inkhawm hruaitu a ni.
    Kumin March thla khan Chaw Kawng Cancer a nei tih hriatchhuah a ni a. April thlaah zai niin Chemotherapy a la bawk a. September 4 khan Regional Cancer Centre, Zemabawkah dahluh leh niin September 6, Ningani chawhma dar 11:30 khan chatuan ram min lo pansan ta a ni. A ruang hi tlaivar pui a ni.

KAN THEN TAK

Pu K. Khualkunga (72), Sec-III, Presbyterian Kohhran hi Pu Chalruma (L) leh Pi Chalneki (L) te fa 17 (M-10; H-7) zinga a upa ber niin September 12, 1940 khan Vanzau-ah a lo piang a. 1972-ah Pi Rualchhingi nen inneiin fa 6 (M-3; H-3) an nei a ni. Amah hi Pu K. Vanlalrinchhana (Rinchhana) leh Tv. K. Lalngaihawma (Ngaihtea) te pa a ni,
    Khawtlang leh kohhrana mi tangkai tak niin Lamzawl Branch YMA leh  KTP ah te OB a ni thin a. Lamzawl Games & Sports Association-ah leh Hliappui MUP Unit-ah kum 10 ve ve President ni tawhin  Political Party-ah Unit, Block leh Group President a ni tawh bawk. Kum 2002-ah Hliappui atangin Chanmari-ah an lo pem.
    1996 atangin Chuap thalo nei tanin kumin June thla khan zunthlum a nei tih hriatchhuah a ni a. Hemi hnu hian Malaria leh Mitliam nei lehin inlamah enkawl a ni a. September 6, Ningani zing dar 4 khan chatuan ram min lo pansan ta a ni. A ruang hi hemi ni hian vui nghal a ni.

Chanmari leh Ramhlun North Branch YMA Meet a nuam hle

August 24 zan khan Chanmari YMA Hall-ah hun hman a ni a, hall leng lovin mipui an pungkhawm. Ramhlun North lamin solo ah Nl. Zoramchhani rawn thlawhchhuakin, la hmuh ngai loh bodymime an entir a, acoustic guitar leh phaiphuleng nen chauh a rem zaipawl tha tak te, kan hriat lar em em Thanglunghnemi zai te, Mizo  hnam thuam chi hrang hrang lantirna costume parade te, Hla Do dangdai tak leh Chheih lam hmuhnawm tak te an entir a, a hmuhnawm hle.

Chanmari lamin Nl. Rosy K. Remsangpuii zai tirin kum 2010 Lunglei YMA General Conference a an lo entir tawh musical drama 'Kan hre vek' tih te, Lana leh Khawvel Lawmsanga te inthehthilna Mock Band bakah Pu Hruaia Sailo special item te an entir bawk. Mipui an va nui nasa em!

Zan dar 8 atangin dar 11 thleng hun hman a ni a, Ramhlun North atangin mi 250 vel leh Chanmari atangin mi 300 vel an kal. Nuam tak a ni. Zonet Cable TV in Live in an pe chhuak bawk. He huna tel ve lo Chanmari khua leh tuite chu 'Lenlai chan an ni e'. A nuam tak zet.

Chanmari Presbyterian Kohhran

Chanmari Pastor Bial Kristian Thalai Pawl chuan 7th July, 2012 (Inrinni) zan, 8th July 2012 (Pathianni) chawhnu leh zanah hian Chanmari Kohhran Biak Inah "Half Yearly Meet" an hmang dawn.

15th July, 2012 (Pathianni) hian Mizoram Presbyterian Church Synod Programme duansa angin "Music festival" (Hla kutpui) hman a ni bawk ang. Hla kutpui hi kohhranin mahni kohhran remchanna ang zelin an hmang dawn a ni

Chanmari Branch YMA in YMA DAY Vawi 77-na Tachhipah hmang

Chanmari Branch YMA atangin bus 1, lirthei 16 leh 2-wheeler 8 hmangin mi 100 vel an kal a nilengin hun hman a ni. Thusawitute - Pu Vanneihtluanga, Khual Duhawm, Pu Lalhmangaiha, CBYMA Vice President, Secretary Report leh Tachhip lam atangin. Item te - Solo Nl. Rosy K. Remsangpuii. Mock Band - Section I & IV. Special Item - Pu Lalhruaitluanga Sailo. Ruah a sur nasat avangin YMA Park, Sibuta Lung etc tlawh theih a nih tak loh bakah a huhova Chai tur pawh neih theih a ni ta lo. YMA Day a Branch dang tlawha hun hman hi veng dangte la chin ve loh thil a ni awm e. Nikum khan Chanmari Branch YMA hian Hermon Children Home, Durtlang chu ruaitheh sakin hun a lo hmanpui tawh bawk a ni.

Khawchhia vangin duhthusamin hun hman theih ni ta lo mah se, Tachhipa kalte hian nuam an ti hle. Chanmari Branch YMA hian Tachhip Branch hnenah steel almirah a present a ni. (For detail see Chanmarians No. 25 June 17, 2012 issue)

CHANMARI VENG MI CHHUANAWM PU P. LALNITHANGA KAN THEN TA

         Pu P. Lalnithanga (84) hi Pu Darlianthuama (L) leh Pi Rothawmi (L) te fa 5 zing a naupang ber niin January 13, 1928 khan South Hlimen-ah a lo piang a. 1956-ah Zopari d/o Chawnga, Dawrpui veng nen inneiin fa 4 an nei -

1. Zohmingliana h/o Lallianchhungi, Chanmari, Aizawl

2. Lalphunchhunga h/o Laldinpuii, Chanmari, Aizawl

3. Laldingpuii w/o P. Lianhrima, Zonuam, Aizawl

4. Zorempuii w/o Lalrinliana, Tuikhuahtlang, Aizawl

    1945-ah Shillong atangin Matric a pass a. Hemi hnu hian Guwahati-ah Stenograph leh Diploma in Secretarial Practice zir zovin 1955-ah Guwahati University atangin B. Com. a pass leh a, Mizo zinga B. Com. pass hmasa ber a ni. 1955-ah Assam Civil Service-ah a tling leh. Lehkha a zir lai leh a zir zawh hnuin heng hnate hi a thawk -

1. Havilder Clerk (Jabalpore)

2. Zirtirtu (Boys ME School, Aizawl 1947)

3. Clerk (DC Office, Aizawl 1947)

4. Assistant Agriculture Inspector (Aizawl)

5. Stenographer (Guwahati High Court)

6. EAC (Aizawl 1955)

7. EAC (Lunglei 1956-58)

8. EAC (Silchar 1958-62)

9. Senior ADC (Aizawl 1962-65)

10. SDO Sadar (Dubri 1965-67)

11. Under Secretary (Shillong 1967-69)

12. Additional DC (Mizo Supplies) (Silchar 1969-70)

13. Deputy Secretary (Shillong 1070-71)

14. Additional DC (Aizawl 1971-74)

15. Director, Settlement & Land Records (Aizawl 1974-79)

16. Director, Census Operations (Aizawl 1979-84)

17. Deputy Commissioner (Aizawl 1984-86)

    Heng bakah hian a pension hnuah pawl hrang hrang leh hna hrang hrang - Aizawl District Consumers Redressal Forum, Administrative Reforms Commission, ZEF, Gideons International leh Tualchhung Kohhranah te rawngbawlna a chelh leh. A lehkhabu ziah te :

1. Tuipui Ralah Zaipawl Rualin (1981)

2. Infiamna Khawvel (1984)

3. Hmasawnna Leh Changkanna Bul (1986)

4. Civil Service Leh Kei (1988)

5. Mifing Thu Leh An Thuril Sawite (2003)

6. Political Development In Mizoram (2006)

7. Words of Wisdom (2006)

8. Mizorama Politics Inlumleh Chhoh Dan (2008)

9. Finna Thu (2008)

10. Thumak Tak Chu (2008)

11. Emergence of Mizoram (2010)

    Chanchinbu hrang hrangah Article 168 chhuahin  Chanmarians chuan 2010 Best Article leh Best Contributor Award leh 2011 Best Article Award a lo hlan tawh bawk a ni.

    2006-ah thisen cancer a nei tih hriatchhuah a ni a. May 1, 2012 khan Kal thalo avangin Medica Superspeciality Hospital, Kolkata panpui a ni a. May 25 atangin nikhaw hre lova awmin May 30, Nilaini zing dar 4:30-ah chatuan ram min lo pansan ta a ni. A ruang hi a tuk May 31, Ninganiah Aizawl rawn thlenpui niin hemi ni hian vui nghal a ni. Amah hi Section IV-ah chengin Chanmari Presbyterian Kohhran member a ni. Hetiang ang mi chungchuangin min kalsan ta hi Chanmari veng tan chuan channa nasa tak a ni.

R.K. Johnson (1961 - 2012)
Pu R.K.Johnson (51) hi Pu Lalzapa Rokhum (L) leh Pi Lalthantluangi te fa 8 zinga a naupang ber dawttu niin 1961 khan Kawnpui, Churachandpur-ah a lo piang a. An unau hetiang hi an ni:
1. R.K. Sangzuali w/o Kamzakhup Thangsing (L), Churachandpur
2. R.K. Ropari (L)
3. R.K. Rodingliana h/o Lungtiawii, Churachandpur
4. R.K. Rohmingliani w/o Malsawma Parte, Dam Veng
5. R.K. Lalengliana h/o Chuauhnuni, Champhai
6. R.K. Vanlalsawmi, Champhai
7. R.K. Johnson (L) h/o Lalnunmawii, Chanmari
8. R.K. Zarzoliana (L)

1982 khan Chanmari, Aizawlah a u Rozami (w/o Pu Lalkhumtira) te inah a awm tan a. 1990 khan Lalnunmawii d/o Pu Thanthuama Pachuau (L), Chanmari nen inneiin fa 5 an nei :
1. Lallawmzuala
2. Lalbiakkima
3. Vanlalhruaia
4. Lalrinzuali
5. Lalnunfeli
Nat lawk pawh nei lovin May 25, 2012 zana a mu chu a tuk May 26, Inrinni zingah an kai tho zo ta lova, zing dar 7:30 khan chatuan ram min lo pansan ta a ni.. Amah hi Chanmari Retailer ni lai mek a ni a, Chanmari Presbyterian Kohhran member niin Section I ah an chhungkuain an cheng mek a ni.

Chanmarians 2012 Editorial Board

Standing : (L-R) Lalremsiama (Cir. Man), Lianzidinga (Cir. Man),
Lalremtluanga (Cir. Man), Laldingliana (Cir. Man)
& Andrew Lalremkima (Jt. Editor)

Sitting (L-R) : Vanlalruata (OB Incharge), David Lalmuankima (Editor),

Lalmalsawma Sailo (Jt. Editor) & Lalhruaitluanga Sailo (Jt. Editor)

Championship Lawmna

Trophy thlalakpuitute

Red Ribbon Inter-Village Football tournament-a kan champion chu 26th April 2012 khan nilengin kan lawm. He hunah hian khuallian chu kan Bialtu M:LA Pu Lal Thanzara a ni.

Chawhnu dar 1:00-ah a lawmna Programme hi neih a ni a, he hunah hian Khuallian, President, Branch YMA, AMC, Local Council Chairman te bakah mi thenkhatin thu an sawi a, Player te chawimawina hun hman a ni bawk.

Tlai lamah khawtlang huapin ruai theh a ni a, ruai kiltu an thahnem hle. Zan dar &:30 ah YMA Hall-ah a lawmna hun neih chhunzawm zel a ni a, hetah hian zaithiam hrang hrangte zaiin hlim takin hun an hmang a ni.